Like nga ti yɛ ɔ fata kɛ be de e’n

Ndɛ sɔ mɔ Zɔbu kannin w’a di afuɛ akpi nsan tra su’n, andɛ e wun kɛ ɔ ti nanwlɛ. Afin kɛ ɔ fɛ i mɛn’n i bo bolɛ’n nun lele’n, sran’m be kunndɛ kɛ bé ká gbanflɛn nin talua naan bé trán nguan nun titi. Sanngɛ, ɔ yoman ye. E kwlakwla e wu.

Sran kwlaa kunndɛ kpa kɛ ɔ́ trán nguan nun titi. Biblu’n kle kɛ i sɔ’n fin Ɲanmiɛn. (Akunndanfuɛ’n 3:11) ?Kɛ a niɛn i sa’n, sɛ Ɲanmiɛn m’ɔ ti sran klofuɛ’n ɔ kunndɛ kɛ e wu’n, nn ɔ́ yó maan e ɲin trán nguan m’ɔ leman awieliɛ’n i sin? Ɔ kwlá yoman sɔ mlɔnmlɔn. Ɲanmiɛn Ndɛ’n se kɛ wie’n ti e kpɔfuɛ naan cɛn wie lele’n, ɔ su tranman lɛ kun.​—1 Korɛntfuɛ Mun 15:26.

Wie’n ti e kpɔfuɛ sakpa. Afin sran fi kunndɛman kɛ ɔ́ wú. Kɛ e wun kɛ sa wie su wa ɲan e’n, e jranman lɛ. E kunndɛ fiawlɛ, annzɛ e sasa e wun. Kɛ e tɔ tukpacɛ’n, e yo e wun ayre. E yo like kwlaa nga e kwla yo naan y’a wuman’n.

Nán andɛ sa yɛ wie’n kun sran ɔn. Sanngɛ, e kwla lafi su kɛ cɛn wie lele’n, wie’n su tranman lɛ kun. Afin, Ɲanmiɛn Kpli Zoova w’a yiman sran naan ɔ di afuɛ nɲɔn kun naan i sin’n, ɔ wu. Kɛ ɔ́ yí sran’n, like ng’ɔ kunndɛli’n yɛle kɛ sran’m be tran nguan nun asiɛ’n su tititi. Ɲanmiɛn i klun sa sɔ’n, ɔ́ kpɛ́n su. Afin like ng’ɔ se kɛ ɔ́ yó’n, ɔ yo.​—Ezai 55:11.

?Ngue yɛ maan wie’n su tranman lɛ kun ɔn? Kɛ ɔ fɛ i laa lele andɛ’n, sran’m b’a kpli lele kɛ bé kwlá wie’n. Sanngɛ, ɔ yoman ye. Dɔɔtrɔfuɛ’m be yili ayre fanunfanun. Ayre sɔ’m be ti’n, tukpacɛ wie’m be kleman sran’m be yalɛ kun. Asa kusu’n, be si klɔ sran i wunnɛn’n nun ninnge kpanngban. Lika wie’m be nun’n, sran’m be cɛ kpa siɛn’n. Sanngɛ, ɔ nin i sɔ ngba’n, sran’m be te wu. Biblu’n se kɛ: “Ninnge kwlaa be sa be sin asiɛ wun.”​—Akunndanfuɛ’n 3:20.

Ndɛ fɛ’n ng’ɔ o lɛ’n yɛle kɛ, nán klɔ sran yɛ ɔ́ yó naan sran’m b’a wuman kun ɔn. Kɛ ɔ ko yo naan y’a wuman kun’n ti’n, Ɲanmiɛn Zoova fali ajalɛ kun. Ajalɛ sɔ’n, Zezi Klist yɛ maan ɔ́ yó ye ɔ.