?Klistfuɛ mun yɛ be kpɛli Paki dilɛ’n i ba sakpa ɔ?

Fluwa kun seli kɛ Paki’n ti “Klistfuɛ’m be cɛn cinnjin kpa. Kɛ bé dí’n, be wla kpɛn Zezi Klist i cɛnlɛ’n su.” (Encyclopædia Britannica) ?Sanngɛ, Klistfuɛ mun yɛ be kpɛli cɛn dilɛ sɔ’n i ba ɔ?

Sɛ e waan é sí kɛ like kun ti kpa’n, é nían wafa nga like sɔ’n ti’n i ngbɛsungbɛsu’n kwlakwla. I wafa kunngba’n, maan e bo e ɲin ase e nian ninnge nga sran’m be yo be Paki nun’n, be kpa. I liɛ’n, sɛ Klistfuɛ mun yɛ be kpɛli cɛn dilɛ sɔ’n i ba’n, é wún i wlɛ.

Maan e dun mmua wun i wlɛ kɛ, Zezi w’a semɛn i sɔnnzɔnfuɛ mun kɛ be wla kpɛn i cɛnlɛ’n su. Sanngɛ, ɔ seli be kɛ maan be wla kpɛn i wie’n su. Pɔlu flɛli i sɔ’n kɛ “e Min’n i aliɛ.”​—1 Korɛntfuɛ Mun 11:20; Lik 22:19, 20.

Fluwa nga e boli su ndɛ’n i su fitilɛ nun’n, ɔ kan ninnge nga sran’m be fa di Paki’n be ndɛ. Ɔ se kɛ ninnge sɔ’m “be kleman” kɛ Zezi i cɛnlɛ’n yɛ be wla kpɛn su ɔ. Sanngɛ, “amuɛn sɔfuɛ mun yɛ lalafuɛ nun’n, be fa ninnge sɔ mun sɔ be amuɛn mun ɔn.” Ninnge sɔ’n i wie yɛle, gbanmlɔ’n nin klenzua. Fluwa kun ekun se kɛ: “Klenzua’n ti nguan’n i nzɔliɛ. Yɛle kɛ, kɛ like’n wo klenzua’n i klun lɔ’n, ɔ ti kɛ w’a wu sa. Kɛ ɔ bo i m’ɔ fite’n, nn w’a ɲan nguan.” Ɔ se ekun kɛ: “Sran kwlakwla si kɛ gbanmlɔ’n, ɔ wu ba kpanngban kpa. Ɔ maan, ɔ ti blɛ mɔ waka’m be yi nɲa’n, i nzɔliɛ.”​—The Encyclopedia of Religion.

Be flɛ fluwa sifuɛ dan kun kɛ Filipu Wɔltɛli. Ɔ kannin like nga ti yɛ Paki dilɛ’n wa yoli asɔnunfuɛ’m be cɛn dilɛ’n i ndɛ. Ɔ seli kɛ: “Blɛ wie nun’n, asɔnun’n wa kunndɛli kɛ amuɛn sɔfuɛ’m be kaci asɔnunfuɛ.” Ɔ maan, be wa fali “blɛ mɔ waka’m be yi nɲa’n,” i cɛn dilɛ’n yoli Zezi i cɛnlɛ’n i cɛn. Kɛ ɔ fɛ i lɛ’n, amuɛn sɔfuɛ’m be cɛn sɔ’n wa kacili “Klistfuɛ’m be cɛn dilɛ.” Ɔ maan, sran kpanngban be wa kacili asɔnunfuɛ.

Kɛ Klistfuɛ klikli’m be wieli wu’n, yɛ sran’m be jasoli be yoli sɔ ɔ. Afin be ɲin su’n, like ng’ɔ ti amuɛn sɔfuɛ’m be liɛ’n, be “trɛ i ase.” Yɛle kɛ, b’a kplinman su kɛ sran’m be yo i sɔ like asɔnun’n nun. (2 Tɛsalonikfuɛ Mun 2:7) Akoto Pɔlu seli kɛ, kɛ ɔ “ko wɔ’n,” sran wie’m bé wá “jáo bé kán ndɛ b’ɔ ti-mɛn i su’n bé fá láka Klistfuɛ mun naan be su be su.” (Sa Nga Be Yoli’n 20:29, 30) Afuɛ nga be flɛ i 96 nun’n, akoto Zan seli kɛ sran wie’m be su laka Klistfuɛ mun bɔbɔ. (1 Zan 2:18, 26) Kɛ ɔ fɛ i lɛ’n, Klistfuɛ’m be fali amuɛn sɔfuɛ’m be nzuɛn’n.

Sran wie’m be kwla se kɛ ninnge nga be yo be Paki dilɛ nun’n, be timan tɛ. Naan ninnge yolɛ wafa sɔ’m be ti’n, “be nga be timan Klistfuɛ’n” be kwla wun like nga ti yɛ Ɲanmiɛn cɛnnin Zezi’n i wlɛ. Sanngɛ, kɛ Pɔlu i ɲin o su’n, w’a bumɛn i sɔ le. Ɔ boli jasin fɛ’n kleli Rɔmufuɛ’m be famiɛn diwlɛ’n nun amuɛn sɔfuɛ mun. Sanngɛ, w’a yoman sran sɔ’m be ninnge mun wie naan be kaci Klistfuɛ. I kpa bɔbɔ’n, ɔ seli i niaan Klistfuɛ mun kɛ: “Nán amun nin be nga be lafi-man Krist su’n, bɔ amun nzuɛn’n sɛ-man’n, an san nun. ?Nzu anuansɛ yɛ sran kpa nin sran tɛ’n be di-ɔ? Wia’n nin aosin’n be kwla tran likawlɛ? I sɔ’n ti’n, e Min Nyanmiɛn seli kɛ: ‘An jao be nun, nán an fa amun wun mantan be. Nán an kan fiɛn, yɛ ń sɔ́ amun nun.’”​—2 Korɛntfuɛ Mun 6:14, 17.

?Ngue yɛ Paki dilɛ’n i su ndɛ kpe kan nga y’a yiyi nun yɛ’n, ɔ kle e ɔ? Ɔ kle e weiin kɛ nán Klistfuɛ mun yɛ be kpɛli cɛn dilɛ sɔ’n i ba ɔ.