Like nga junman difuɛ nsan be wun ɲanndra’n kle e’n

1, 2. ?Ngue ti yɛ Zezi buli junman difuɛ nsan mɔ be mannin be talan’n, be wun ɲanndra’n niɔn?

CƐN kun’n, Zezi buli junman difuɛ nsan mɔ be min’n mannin be talan’n, be wun ɲanndra. Ɔ buli ɲanndra sɔ’n naan i sɔnnzɔnfuɛ nga Ɲanmiɛn kpali be sieli be ngunmin’n, be wun junman ng’ɔ fata kɛ be di’n i wlɛ. Sanngɛ, ɲanndra sɔ’n ti be nga be lafi su kɛ bé trán asiɛ’n su wa’n, be liɛ wie. I sɔ’n ti, ɔ fata kɛ Klistfuɛ’m be kwlakwla be wun ɲanndra sɔ’n i bo.

² Zezi i sɔnnzɔnfuɛ’m be usɛli i kɛ: “?Nguɛ yɛ ɔ ti ɔ balɛ’n nin mɛn’n i awieliɛ’n i nzɔliɛ nin-ɔn?” Kɛ ɔ́ tɛ́ be su’n, yɛ ɔ buli junman difuɛ nsan mɔ be min’n mannin be talan’n, be wun ɲanndra’n niɔn. (Mat. 24:3) Ɔ maan, sa ng’ɔ kannin be ndɛ ɲanndra sɔ’n nun’n, be ti i balɛ’n nin mɛn’n i awieliɛ’n i nzɔliɛ wie. Yɛ be kpɛn su e blɛ liɛ’n nun.

3. ?Kɛ ɔ fɛ i Matie 24:45 lele 25:46 nun’n, ngue yɛ ɲanndra nga Zezi buli be’n, be kle e ɔ?

³ Kɛ ɔ fɛ i Matie 24:45 lele 25:46 nun’n, Zezi buli ɲanndra nnan. Be yɛle sran kpa nanwlɛfuɛ m’ɔ si ngwlɛlɛ’n i wun ɲanndra’n, nin talua blu be wun ɲanndra’n, nin junman difuɛ nsan be wun ɲanndra’n. Kpɛkun, ɔ buli bua nin boli’m be wun ɲanndra’n. Sa nga Zezi kan be ndɛ ɲanndra sɔ’m be nun’n, be ti i balɛ’n i nzɔliɛ. Ɲanndra nnan sɔ’m be nun’n, Zezi kleli like nga bé fá síe i sɔnnzɔnfuɛ nanwlɛfuɛ’m be nzɔliɛ mɛn’n i awieliɛ blɛ’n nun’n. Klistfuɛ nga Ɲanmiɛn kpali be sieli be ngunmin’n, be ti yɛ Zezi buli sran kpa nanwlɛfuɛ m’ɔ si ngwlɛlɛ’n, ɔ nin talua blu, ɔ nin junman difuɛ nsan mɔ be mannin be talan’n, be wun ɲanndra mun ɔn. Sran kpa nanwlɛfuɛ m’ɔ si ngwlɛlɛ’n, yɛle sran akpasua kaan mɔ Zezi fali be sieli i sran’m be su kɛ ɔ man be aliɛ mɛn’n i awieliɛ blɛ’n nun’n. Zezi buli ɲanndra naan ɔ́ klé be kɛ be yo nanwlɛfuɛ nin ngwlɛlɛfuɛ titi. I sin’n, ɔ buli talua blu be wun ɲanndra’n. Ɔ buli ɲanndra sɔ’n naan ɔ́ klé i sɔnnzɔnfuɛ nga Ɲanmiɛn kpali be sieli be ngunmin’n be kwlakwla kɛ maan be buabua be wun, yɛ be tran minndɛ. Afin be siman cɛn nin dɔ nga Zezi bá’n. Junman difuɛ nsan be wun ɲanndra liɛ’n, Zezi buli naan ɔ́ klé be nga Ɲanmiɛn kpali be sieli be ngunmin’n kɛ be tu be klun be di junman ng’ɔ mannin be’n. I agualiɛ su’n, ɔ buli bua nin boli’m be wun ɲanndra’n. Ɔ buli ɲanndra sɔ’n mannin be nga be lafi su kɛ bé trán asiɛ’n su wa’n. Naan be ukɛ i sɔnnzɔnfuɛ nga Ɲanmiɛn kpali be sieli be ngunmin’n tititi.a Like suanlɛ nga wá yíyí junman difuɛ nsan be wun ɲanndra’n nun.

BIAN KUN FALI SIKA LƆUN KPA WLALI I JUNMAN DIFUƐ’M BE SA NUN

4, 5. (a) ?Bian m’ɔ su kɔ lika mɔ Zezi kɛn i ndɛ’n yɛle wan? (b) ?Ngue yɛle talan’n?

⁴ An kanngan Matie 25:14-30 nun. Zezi waan bian kun su wa kɔ lika. Ɲanndra sɔ’n ɔ nin ɲanndra kun ekun mɔ Zezi buli’n, be fa be wun. I lifuɛ’n nun’n, Zezi kannin kɛ bian kun ɔli nvle wie nun mmua kpa naan “be fɛ i sie famiɛn.” (Lik 19:12) E fluwa’m be kleli titi kɛ Zezi m’ɔ ɔli ɲanmiɛn su afuɛ 33 nun’n, i ndɛ yɛ ɲanndra nɲɔn sɔ’m be kan ɔn. Sanngɛ, kɛ Zezi ɔli ɲanmiɛn su’n, b’a siemɛn i famiɛn be ja’n nun lɛ.b Ɔ minndɛli lele afuɛ 1914 nun, naan “Nyanmiɛn maan ɔ tiɛ i kpɔfuɛ’m be su.”​—Ebr. 10:12, 13.

⁵ Ɲanndra nga Zezi buli’n nun’n, ɔ kleli kɛ bian’n le talan mɔcuɛ. Blɛ sɔ’n nun’n, ɔ ti sika lɔun kpa.c Kɛ bian’n wá tú ajalɛ’n, ɔ flɛli i junman difuɛ mun. Ɔ fɛ i sika’n wlali be sa nun. Yɛ ɔ ɔli ɔ. Ɔ kunndɛ kɛ be fa di aata. Bian sɔ’n i sika’n ti i cinnjin kpa. Zezi kusu’n, like kun ti i cinnjin kpa wie. Like sɔ’n yɛle junman ng’ɔ dili i asiɛ’n su wa’n.

6, 7. ?Ngue yɛ talan’n ti i nzɔliɛ ɔ?

⁶ Jasin fɛ’n bolɛ’n yoli Zezi i cinnjin kpa. Jasin fɛ’n m’ɔ boli’n ti’n, sran kpanngban be yoli i sɔnnzɔnfuɛ. (An kanngan Lik 4:43 nun.) Sanngɛ, ɔ si kɛ junman’n i dan lika te o lɛ, naan sran kpanngban ekun be kwla kaci i sɔnnzɔnfuɛ. I sɔ’n ti’n, ɔ seli i sɔnnzɔnfuɛ mun kɛ: “An nian kɛ awie’n w’a blo bɔ w’a ju i kpɛlɛ-ɔ.” (Zan 4:35-38) Sɛ fie difuɛ kun i awie’n i kpɛlɛ’n ju’n, ɔ kwlá yacimɛn i lɛ naan ɔ saci. Zezi kusu kwlá yacimɛn i fie’n lɛ naan ɔ saci. I sɔ’n ti’n, kwlaa naan w’a sɛ i sin ɲanmiɛn su’n, ɔ seli i sɔnnzɔnfuɛ mun kɛ: “An wɔ ko kle nvle-nvle’n kwlaa be like maan be kaci n sɔnnzɔnfuɛ.” (Mat. 28:18-20) I lɛ’n nun’n, Zezi mannin be junman dan kun. Yɛle kɛ maan be bo jasin fɛ’n.​—2 Kor. 4:7.

⁷ Kɛ bian’n wá kɔ́ lika’n, ɔ fɛli i sika’n wlɛli i junman difuɛ’m be sa nun. Zezi kusu, ɔ fɛli i “ninnge’n kwlaa” wlɛli i sɔnnzɔnfuɛ nga ɲanmiɛn kpali be sieli be ngunmin’n be sa nun. Yɛle kɛ, maan be bo jasin fɛ’n naan sran’m be kaci i sɔnnzɔnfuɛ. (Mat. 25:14) Ɔ maan, talan’n ti jasin fɛ’n bolɛ’n, ɔ nin sran’m be like klelɛ naan be kaci Zezi i sɔnnzɔnfuɛ’n i nzɔliɛ.

8. ?Kannzɛ ɔ le junman difuɛ kun i sika liɛ mɔ i min’n mɛnnin i’n, sanngɛ ngue yɛ be min’n kunndɛli kɛ be yo ɔ?

⁸ Ɲanndra nga Zezi buli’n nun’n, bian’n mɛnnin i junman difuɛ kun talan nnun. I sin’n, ɔ mannin kun nɲɔn. Kpɛkun, ɔ mannin kun ekun kun. (Mat. 25:15) Ɔ le sran kun i sika liɛ m’ɔ ɲɛnnin i ɔ. Sanngɛ i kwlaa yoli o, be min’n kunndɛli kɛ sran kun fɛ i sika liɛ’n di aata naan ɔ ɲan su. I wafa kunngba’n, Zezi kunndɛ kɛ i sɔnnzɔnfuɛ nga Ɲanmiɛn kpali be sieli be ngunmin’n, be tinuntinun be tu be klun bo jasin fɛ’n. (Mat. 22:37; Kol. 3:23) Afuɛ 33 nun Pantekɔtu nun’n, Zezi i sɔnnzɔnfuɛ’m be boli sran’m be like klelɛ bo naan be kaci Klistfuɛ. Kɛ e kanngan Sa Nga Be Yoli’n fluwa’n nun’n, e wun kɛ be tuli be klun be dili junman sɔ’n.d​—Yol. 6:7; 12:24; 19:20.

JUNMAN DIFUƐ’M BE FA BE TALAN’M BE DI AATA MƐN’N I AWIELIƐ BLƐ’N NUN

9. (a) ?Ngue yɛ junman difuɛ nga be min’n mannin be talan’n, be nun nɲɔn be yoli ɔ? (b) ?Ngue yɛ i sɔ’n kle e ɔ? (c) ?Ngue yɛ ɔ fata kɛ be nga be lafi su kɛ bé trán asiɛ’n su wa’n, be yo ɔ?

⁹ Junman difuɛ nga be min’n mannin be talan’n, be nun nɲɔn be fali be liɛ’n dili aata. Be nɲɔn sɔ’n, be ti mɛn’n i awieliɛ blɛ’n nun Klistfuɛ nga Ɲanmiɛn kpali be sieli be ngunmin’n be nzɔliɛ. Kɛ ɔ fɛ i afuɛ 1919 nun’n, yɛ be wlali be wun ase be boli jasin fɛ’n niɔn. E wunnin ekun kɛ junman difuɛ nɲɔn sɔ’n, be min’n mannin kun talan nnun. Kpɛkun, ɔ mannin kun talan nɲɔn. Sanngɛ, nán e niɛn i sɔ’n ti naan e se kɛ be nga Ɲanmiɛn kpali be sieli be ngunmin’n be ti sran akpasua nɲɔn. Junman difuɛ nɲɔn’n, be fali be sika’n dili aata. Yɛ be ɲannin su kpɛ nɲɔn. ?Sanngɛ, be nga Ɲanmiɛn kpali be sieli be ngunmin’n, é sé kɛ be ngunmin yɛ ɔ fata kɛ be tu be klun be bo jasin fɛ’n naan be kle sran’m be like ɔ? Cɛcɛ. Ɔ fata kɛ be nga be lafi su kɛ bé trán asiɛ’n su wa’n, be uka be naan be bo jasin fɛ’n tititi. Bua nin boli’m be wun ɲanndra nga Zezi buli’n, yɛ ɔ kle sɔ ɔ. Klist i niaan’m be ukalɛ sɔ’n, be bu i like nanndoliɛ. Mɛn’n i awieliɛ blɛ nga nun’n, be nin Klistfuɛ nga Ɲanmiɛn kpali be sieli be ngunmin’n be kwlaa be kaci ‘akpasua kun.’ Yɛ be tu be klun be kle sran’m be like naan be kaci Zezi i sɔnnzɔnfuɛ.​—Zan 10:16.

10. ?Ngue yɛ ɔ kle wein kɛ Zezi ti famiɛn, naan e o mɛn’n i awieliɛ blɛ’n nun ɔn?

¹⁰ Zezi kunndɛ kɛ i sɔnnzɔnfuɛ’m be kwlakwla be tu be klun be kle sran’m be like naan sran kpanngban be kaci i sɔnnzɔnfuɛ. I sɔ yɛ i sɔnnzɔnfuɛ klikli’m be yoli ɔ. ?Mɛn i awieliɛ blɛ nga nun’n, Zezi i sɔnnzɔnfuɛ’m be yo sɔ wie? Ɛɛn. Andɛ’n, Zezi i sɔnnzɔnfuɛ’m be tu be klun be bo jasin fɛ’n. Ɔ maan, sran kpanngban be tie Ɲanmiɛn ndɛ’n, be kaci Zezi i sɔnnzɔnfuɛ. Kpɛkun, be bo jasin fɛ’n wie. Sran nga be yo be batɛmu afuɛ kwlaa nun’n, be ju sran akpiakpi ya kpanngban. Awlanmannun’n, be nin a wunmɛn i sɔ le. Jasin fɛ’n bolɛ’n sɔ’n kle wein kɛ Zezi ti famiɛn, naan e o mɛn’n i awieliɛ blɛ’n nun. Kɛ Zezi wun kɛ i sɔnnzɔnfuɛ’m be di junman ng’ɔ fa mannin be’n, i klun jɔ dan.

?BLƐ ONIN NUN YƐ BE MIN’N BÁ Ɔ?

11. ?Ngue ti yɛ e kwla se kɛ ɲrɛnnɛn dan blɛ’n nun yɛ Zezi i sɔnnzɔnfuɛ’m bé kán junman nga be dili’n, i nun ndɛ klé i ɔ?

¹¹ Kɛ ɲrɛnnɛn dan blɛ’n mántan i awieliɛ’n, yɛ Zezi bá ɔ. Kpɛkun, i sɔnnzɔnfuɛ’m bé kán junman nga be dili’n i nun ndɛ klé i. Like nga ti yɛ e kwla se sɔ’n yɛle kɛ Matie ndɛ tre 24 nin 25 nun’n, Zezi kannin i balɛ i ndɛ kpɛ sunman. Kɛ ɔ́ kán jɔlɛ ng’ɔ́ wá dí sran mun ɲrɛnnɛn dan blɛ’n nun’n i ndɛ’n, ɔ seli kɛ: “Bé wún m bɔ n kacili Sran’n kɛ n wo nyanmiɛn ble’n su n su ba.” Kpɛkun, kɛ ɔ ko yo naan i sɔnnzɔnfuɛ’m b’a nian be wun su’n ti’n, ɔ seli be kɛ: “An si-man cɛn nga amun Min’n ɔ́ bá nun-ɔn.” Asa ekun’n, ɔ seli kɛ: “M bɔ n kacili Sran’n ḿ bá dɔ nga an bu-man min akunndan’n su.” (Mat. 24:30, 42, 44) Ɲanndra nga Zezi buli’n nun’n, kɛ bian’n bali’n, ɔ seli i junman difuɛ mun kɛ “be bla maan be bu sika b’ɔ mannin be’n i akunndan.” Blɛ mɔ Zezi wá dí sran’m be jɔlɛ m’ɔ́ núnnún Satan i mɛn’n, i ndɛ yɛ ɔ su kan ɔn.e​—Mat. 25:19.

12, 13. (a) ?Ndɛ benin yɛ bian’n kan kleli i junman difuɛ nɲɔn’n, be tinuntinun ɔn? (b) ?Blɛ benin nun yɛ Ɲanmiɛn wíe be ng’ɔ kpali be sieli be ngunmin’n, be nzɔliɛ sie ɔ? (An nian kuku nga be flɛ i “Kɛ be wu dɔ nga su’n Ɲanmiɛn bu be sran kpa” i nun.) (c) ?Be nga be lafi su kɛ bé trán asiɛ’n su wa’n, be liɛ’n yó sɛ?

¹² Kɛ bian ng’ɔ mɛnnin i junman difuɛ’m be talan’n ɔ fin lika bali’n, ɔ wunnin kɛ junman difuɛ ng’ɔ mɛnnin i talan nnun’n, ɔ dili junman kpa. Yɛle kɛ, ɔ ɲannin talan nnun ekun. Ng’ɔ mɛnnin i talan nɲɔn’n, ɔ fɛli i liɛ’n dili junman wie. Yɛ ɔ ɲannin nɲɔn ekun. Be sran nɲɔn sɔ’n, be min’n seli be tinuntinun kɛ: “Ɔ ti kpa. A ti sran kpa, a ti nanwlɛfuɛ, like kaan nga n fa mannin wɔ’n, a yoli i kpa, i sɔ’n ti n kusu ń fá wɔ síe like dan su.” (Mat. 25:21, 23) ?Kɛ Zezi kusu wá bá’n, ngue yɛ ɔ́ yó ɔ?

¹³ Kɛ ɲrɛnnɛn dan blɛ’n wá bó i bo’n, nn Ɲanmiɛn w’a wie Klistfuɛ ng’ɔ kpali be sieli be ngunmin mɔ be te o asiɛ’n su wa’n, be nzɔliɛ sie. (Ngl. 7:1-3) Kpɛkun, kwlaa naan Armagedɔn alɛ’n w’a bo i bo’n, Zezi fá be kɔ́ ɲanmiɛn su. ?Yɛ be nga be lafi su kɛ bé trán asiɛ’n su wa mɔ be boli jasin fɛ’n wie’n, be liɛ’n yó sɛ? Zezi bú be sran kpa, yɛ ‘bé dí famiɛn diwlɛ’n i aja’n’ wie. Yɛle kɛ, Ɲanmiɛn síe be tititi, yɛ bé ɲán anannganman nguan asiɛ’n su wa.​—Mat. 25:34, NW.

JUNMAN DIFUƐ M’Ɔ TI FUƐNFUƐ’N

14, 15. ?Ndɛ nga Zezi kannin’n kle kɛ be nga Ɲanmiɛn kpali be sieli be ngunmin’n, be nun kpanngban bé yó kɛ junman difuɛ ng’ɔ ti fuɛnfuɛ’n sa? An yiyi nun.

¹⁴ Junman difuɛ nga i min’n mɛnnin i talan kun’n, Zezi kannin like ng’ɔ yoli’n i ndɛ wie. Junman difuɛ sɔ’n, i min’n seli i kɛ ɔ ti sran tɛ, ɔ ti fuɛnfuɛ. Afin ɔ ko wlali sika’n i ase, w’a fa diman aata naan i min’n w’a ɲan su. I sɔ’n ti, i min’n deli talan kun ng’ɔ o i sa nun’n, ɔ fa ukali sran ng’ɔ le talan blu’n i liɛ’n su. Kpɛkun, ɔ fɛ i yili “guasu lɔ aosin’n nun kan be sun be di be je lɔ’n.”​—Mat. 25:24-30; Lik 19:22, 23.

¹⁵ Zezi seli kɛ junman difuɛ nsan’n, be nun kun ti tɛ nin fuɛnfuɛ. I sɔ’n kleman kɛ be nga Ɲanmiɛn kpali be sieli be ngunmin’n, be nun wie’m bé wá yó kɛ junman difuɛ sɔ’n sa. ?Ngue ti yɛ e se sɔ ɔ? Ɲanndra nɲɔn ng’ɔ dun mmua buli’n ti ɔ. Sran kpa nanwlɛfuɛ m’ɔ si ngwlɛlɛ’n i wun ɲanndra’n nun’n, Zezi kannin junman difuɛ kun m’ɔ timan nanwlɛfuɛ m’ɔ kle i wiengu’m be yalɛ’n i ndɛ. I sɔ m’ɔ kannin’n, ɔ kleman kɛ sɛ be fa i sɔnnzɔnfuɛ nga Ɲanmiɛn kpali be sieli be ngunmin’n nsan’n, be nun kun yó kɛ junman difuɛ sɔ’n sa. Sanngɛ afɔtuɛ yɛ ɔ mɛn i sɔnnzɔnfuɛ mun ɔn. Ɔ su kle be kɛ nán be yo kɛ junman difuɛ m’ɔ kle i wiengu’m be yalɛ’n sa. I kunngba’n yɛle talua blu be wun ɲanndra’n. Zezi kannin kɛ talua’m be nun nnun ti sinnglinfuɛ. I sɔ m’ɔ kannin’n, ɔ kleman kɛ i sɔnnzɔnfuɛ nga Ɲanmiɛn kpali be sieli be ngunmin’n, be bue yó sinnglinfuɛ. Sanngɛ afɔtuɛ yɛ ɔ man be ɔ. Ɔ su kle be kɛ maan be buabua be wun naan be ɲin tran su.f I wafa kunngba’n, junman difuɛ nsan be wun ɲanndra nga Zezi buli’n, ɔ kleman kɛ i sɔnnzɔnfuɛ nga Ɲanmiɛn kpali be sieli be ngunmin’n, be nun kpanngban bé yó tɛ nin fuɛnfuɛ. Fɔ yɛ ɔ tu be ɔ. Ɔ su kle be kɛ nán be yo kɛ junman difuɛ ng’ɔ ti tɛ nin fuɛnfuɛ’n sa. Sanngɛ, maan be tu be klun be bo jasin fɛ’n.​—Mat. 25:16.

16. (a) ?Ngue yɛ junman difuɛ nsan be wun ɲanndra’n kle e ɔ? (b) ?Junman difuɛ nsan be wun ɲanndra’n i su like uflɛ benin yɛ like suanlɛ nga w’a kle e ɔ? (An nian kuku nga be flɛ i “Wafa nga e wun ɲanndra’n i wlɛ siɛn’n” i nun.)

¹⁶ ?Ngue yɛ junman difuɛ nsan nga be min’n mannin be talan’n, be wun ɲanndra’n kle e ɔ? Ɔ kle e like nɲɔn. I klikli’n yɛle kɛ, Zezi mɛnnin i sɔnnzɔnfuɛ nga Ɲanmiɛn kpali be sieli be ngunmin’n, be junman nanndoliɛ kun. Yɛle kɛ maan be bo jasin fɛ’n, yɛ be kle sran’m be like maan be kaci Zezi i sɔnnzɔnfuɛ. I nɲɔn su’n yɛle kɛ, Zezi kunndɛ kɛ i sɔnnzɔnfuɛ’m be kwlakwla be tu be klun be bo jasin fɛ’n. Sɛ e yo sɔ titi’n, nanwlɛ, e Min’n yó e mo.​—Mat. 25:21, 23, 34.