FLUWA’N NUN KANNGANFUƐ’M BE KOSAN MUN

?Wan yɛle Gɔgu m’ɔ fin Magɔgu mɔ fluwa nga Ezekiɛli klɛli’n kɛn i ndɛ’n?

Fluwa nga anuannzɛ’n yi be’n be kɛnnin i titi kɛ, Gɔgu yɛle Mmusu’m be si Satan. Naan kɛ be kɛnnin i bo ɲanmiɛn su lɔ’n yɛ be flɛli i sɔ ɔ. Like nga ti yɛ be kannin sɔ’n yɛle kɛ, Sa Nglo Yilɛ fluwa’n kle kɛ Mmusu’m be si Satan yɛ ɔ́ láka sran mun naan be nunnun Ɲanmiɛn i sufuɛ mun ɔn. (Ngl. 12:1-17) I sɔ’n ti’n, e buli i kɛ Satan i dunman kun yɛle Gɔgu.

Ndɛ’n i nun yiyilɛ sɔ’n, ɔ kpɛ kosan wie’m be usalɛ ba. ?Ngue ti ɔ? Afin kɛ Zoova kán blɛ mɔ Gɔgu su ɲanman kwlalɛ’n i ndɛ’n, ɔ seli Gɔgu kɛ: “Ń yó maan anunman nga be di nnɛn nin blo nnɛn’m bé dí amun fuɛn mun.” (Eze. 39:4) Zoova seli ekun kɛ: “Cɛn sɔ’n nun’n, ḿ mán Gɔg i lika kun Izraɛl lɔ [...]. Lɛ yɛ bé síe Gɔg nin i minniɛn kpanngban mun ɔn.” (Eze. 39:11) ?Satan m’ɔ ti aolia nun sran’n, “anunman nga be di nnɛn nin blo nnɛn’m bé dí” i fuɛn’n sɛ yɛ ɔ́ yó ye ɔ? ?Yɛ bé “síe” Satan i fuɛn’n asiɛ’n su wa sɛ yɛ ɔ́ yó ye ɔ? Asa ekun’n, Ɲanmiɛn Ndɛ kleman kɛ bé dí Satan i nnɛn’n annzɛ bé síe i. Sanngɛ, ɔ kle weiin kɛ bé fá Satan yí i kunman dan mɔ be simɛn i bo’n nun. Yɛ ɔ́ ká lɔ lele afuɛ 1.000.​—Ngl. 20:1, 2.

Kɛ afuɛ 1.000 ko sin’n, bé yí Satan kunman dan’n nun bé fíte. Kpɛkun, “ɔ́ kó lákaláka nvle-nvlefuɛ’m be kwlaa, ɔ́ yíayía be kwlaa kɛ be wa kun alɛ. Be flɛ be Gɔg nin Magɔg.” (Ngl. 20:8) ?Sɛ Satan bɔbɔ yɛ ɔ ti Gɔgu, nn Ɲanmiɛn Ndɛ’n sé kɛ ɔ́ láka Gɔgu? Cɛcɛ. Ɔ maan, Gɔgu mɔ Ɲanmiɛn nuan ijɔfuɛ Ezekiɛli annzɛ Sa Nglo Yilɛ fluwa’n kɛn i ndɛ’n, nɛ́n i yɛle Satan.

?Sɛ ɔ ti sɔ’n niɔn, wan yɛle Gɔgu? Ɔ fata kɛ e nian Ɲanmiɛn Ndɛ’n nun kpa naan e wun be nga bé wá kúnndɛ kɛ bé núnnún Ɲanmiɛn i sufuɛ mun’n, be wlɛ. Ɲanmiɛn Ndɛ’n kle kɛ ‘Gɔg m’ɔ fin Magɔg’ ɔ́ wá kúnndɛ kɛ ɔ́ núnnún Ɲanmiɛn i sufuɛ mun. Sanngɛ, ɔ kle ekun kɛ famiɛn ng’ɔ o nglo lɔ’n, ɔ nin “asiɛ’n su famiɛn’m” bé yó sɔ wie. (Eze. 38:2, 10-13; Dan. 11:40, 44, 45; Ngl. 17:14; 19:19) ?Be tinuntinun yɛ bé jásó kɛ bé núnnún Ɲanmiɛn i sufuɛ mun ɔn? Cɛcɛ. Sa kunngba’n yɛ Biblu’n kɛn i ndɛ sɔ ɔ. Afin ɔ se kɛ asiɛ’n su famiɛn’m be kwlaa bé yía naan bé kún alɛ nga be flɛ i Armagedɔn’n.—Ngl. 16:14, 16.

Kɛ e kanngan Biblu’n nun ndɛ mma sɔ’m be nun kpa’n, e wun kɛ nvlenvle’m be kwlaa yɛ bé yía naan bé núnnún Ɲanmiɛn i sufuɛ mun ɔn. Be yɛ Ɲanmiɛn Ndɛ’n flɛ be kɛ Gɔgu m’ɔ fin Magɔgu’n niɔn. Nán Satan ɔn. ?Famiɛn ng’ɔ o nglo lɔ’n yɛ ɔ́ dún nvlenvle mɔ bé yía’n be ɲrun mmua ɔ? E kwlá dimɛn i nanwlɛ trele. Sanngɛ Gɔgu i wun ndɛ nga Zoova kannin’n, ɔ kle kɛ ɔ kwla yo sɔ. Zoova seli Gɔgu kɛ: ‘Á tú ɔ bo ɔ mɛn ng’ɔ o nglo lɔ lika nun’n i nun. Kɛ á kɔ́’n, a nin sran kpanngban kpa yɛ bé kɔ́ ɔ. Be kwlaa bé fú nnɛn kpanngɔ’n be su. Amún sɔ́n, yɛ amún yó sró.’​—Eze. 38:6, 15.

Ɲanmiɛn nuan ijɔfuɛ Daniɛli m’ɔ ti Ezekiɛli i blɛ sufuɛ’n, ɔ kannin famiɛn ng’ɔ o nglo lɔ’n i ndɛ wie. Ɔ seli kɛ: “Ndɛ nga bé fín wia afiliɛ lika’n nun lɔ nin nglo lɔ bé bá’n, bé wá wlɛ́ i srɛ kpa. Ɔ́ fá ya kpa, ɔ maan ɔ́ kó kún sran kpanngban kpa. Ɔ́ kplɛ́n i tannin sua mun jenvie’n nin Nyanmiɛn i oka b’ɔ o mɛn bɔ i klanman’n lɛ-man wunsu’n be afiɛn. Lɛ yɛ wie’n ɔ́ wá fɛ́ i-ɔ, sran fi su ukɛ-mɛn i.” (Dan. 11:44, 45) Like sɔ mɔ Gɔgu wá yó’n, i ndɛ wie yɛ Ezekiɛli kannin ɔn.​—Eze. 38:8-12, 16.

?Kɛ Gɔgu wá kúnndɛ kɛ ɔ́ núnnún Ɲanmiɛn i sufuɛ mun’n, ngue sa yɛ ɔ́ jú i su ɔ? Daniɛli waan: “I blɛ sɔ nun’n, Mikaɛl b’ɔ ti anz’m be su kpɛn’n, b’ɔ sasa ɔ nvle nunfuɛ mun’n, ɔ́ bá. Blɛ sɔ’n wá yó awlaboɛ [annzɛ ɲrɛnnɛn dan] blɛ. I sɔ awlaboɛ liɛ’n, kɛ ɔ fin cɛn bɔ mɛn’n wo lɛ lele b’ɔ́ fá jú ndɛ yɛ’n, be nian wun-mɛn i sɔ le. Blɛ sɔ nun’n, ɔ nvle nunfuɛ mɔ be klɛli be dunman nguan fluwa’n nun’n bé fíte nun.” (Dan. 12:1) Kɛ ɔ fɛ i afuɛ 1914 nun’n, Mikaɛli mɔ yɛle Zezi Klist, ɔ sasa Ɲanmiɛn i sufuɛ mun. Armagedɔn alɛ’n nun’n, ɔ́ dé be. Like sɔ mɔ Zezi yo’n, Sa Nglo Yilɛ 19:11-21 kɛn i ndɛ wie.

?Yɛ wan yɛle “Gɔg nin Magɔg” mɔ Sa Nglo Yilɛ 20:8 kɛn i ndɛ’n? Kɛ afuɛ 1.000 ko sin’n, sran kpanngban kpa bé yó ɲin kekle Zoova su. Sran sɔ’m bé wá nánti ‘Gɔg m’ɔ fin Magɔg’ i ajalɛ’n su wie. Yɛle kɛ, bé wá kúnndɛ kɛ bé núnnún Ɲanmiɛn i nvle nunfuɛ mun. Kɛ be yo sɔ cɛ’n, kpɛkun Armagedɔn w’a bo i bo. Yɛ Ɲanmiɛn núnnún be mlɔnmlɔn. Ɔ maan, awieliɛ kunngba’n yɛ ɔ́ wíe be bue nɲɔn’n niɔn. (Ngl. 19:20, 21; 20:9) I sɔ’n ti’n, be kwlaa nga kɛ afuɛ 1.000 ko sin’n bé wá yó ɲin kekle Ɲanmiɛn su’n, be nin dunman “Gɔg nin Magɔg” fata.

E mɔ e suan Ɲanmiɛn Ndɛ’n i kpa’n, e su minndɛ kpa kɛ é sí famiɛn ng’ɔ́ wá klé kɛ i yɛ ɔ ti famiɛn ng’ɔ o nglo lɔ’n. Sɛ famiɛn sɔ’n yɛ kɛ nvlenvle nga bé wá yía naan bé núnnún Ɲanmiɛn i sufuɛ mun’n, ɔ́ dún be ɲrun mmua’n, e siman nun. Sanngɛ kɛ é sé yɛ’n, e si like nɲɔn. (1) Yɛle kɛ, Gɔgu m’ɔ fin Magɔgu nin i sonja’m be su ɲanman jranwlɛ. Bé núnnún be mlɔnmlɔn. (2) Zezi Klist m’ɔ ti famiɛn’n, ɔ́ sásá Ɲanmiɛn i sufuɛ mun lele bé jú mɛn uflɛ’n nun fɔun.​—Ngl. 7:14-17.