?Be nga be wuli’n be liɛ w’a wie mlɔnmlɔn?

?Be kwla ɲan nguan ekun?

BIBLU’N WAAN: “Cɛn wie lele be kwlaa nga be o ndia nun’n, bé tí [Zezi] i nɛn, yɛ bé fín ndia’n nun fíte.”​—Zan 5:28, 29.

Zezi kleli kɛ cɛn wie lele’n, kɛ ɔ́ wá síe sran mun’n, be nga be wuli’n, bé fín ndia’n nun fíte. Fɛrnando mɔ e kɛnnin i ndɛ ndɛ akpasua ng’ɔ sinnin lɛ’n nun’n, ɔ seli kɛ: “Kɛ n kanngannin Zan 5:28, 29 nun’n i klikli nun’n, ndɛ’n boli min nuan. Yɛ ɔ cicili min wla. Kɛ ɔ fin lɛ’n, n lafili su kɛ like kpa wo e ɲrun.”

Ɲanmiɛn i sufuɛ Zɔbu lafili su kɛ sɛ ɔ wu’n, Ɲanmiɛn cɛ́n i. Ɔ seli kɛ: “?Sɛ sran kun wu’n, ɔ kwla ba ekun?” Kpɛkun, i bɔbɔ tɛli su kɛ: “Ń trán ḿ mínndɛ kɛ junman difuɛ b’ɔ minndɛ lelee, kpɔkuun be fa sran kaci i’n sa. Kpɔkuun blɛ nga a kleli kɛ sɛ ɔ ju-ɔ á wún min’n, sɛ ɔ ju naan a flɛ min’n ń sró.”​—Zɔb 14:14, 15, NW.

Kɛ Lazali wuli’n, Zezi seli i niaan bla Marti kɛ: “Ɔ niaan’n ɔ́ wá cɛ́n.” Marti kusu lafi su kɛ be nga be wuli’n bé cɛ́n. Ɔ maan, ɔ seli Zezi kɛ: “N si kɛ mɛn’n i awieliɛ bɔ sran’m bé cɛ́n’n, ɔ́ cɛ́n.” Zezi seli i ekun kɛ: “Min yɛ n cɛn sran mun-ɔn, m bɔbɔ min yɛ be flɛ min nguan nin-ɔn. Sran kwlaa ng’ɔ lafi n su’n, sɛ ɔ wu’n, ɔ́ nyán nguan ekun.” (Zan 11:23-25) Kpɛkun, Zezi ko cɛnnin Lazali. Lazali i cɛnlɛ sɔ’n, ɔ ti cɛn wie lele sa nga Zezi wá yó’n, i nzɔliɛ kan. Yɛle kɛ, Zezi wá cɛ́n sran mun asiɛ wunmuan’n su.

?Sran wie’m bé kɔ́ ɲanmiɛn su?

BIBLU’N WAAN: Ɲanmiɛn Ndɛ’n kle kɛ Zezi i cɛnlɛ’n, ɔ nin sran mɔcuɛ nga Ɲanmiɛn cɛnnin be’n be liɛ’n, ɔ timan kun. Afin sran mɔcuɛ sɔ’m be wa trannin asiɛ’n su wa ekun. Sanngɛ, Ɲanmiɛn Ndɛ’n waan Zezi liɛ’n: “Ɔ ɔli nyanmiɛn su lɔ, ɔ o Nyanmiɛn i sa fama su.” (1 Piɛr 3:21, 22) ?Sran wie mun ekun be ɔli ɲanmiɛn su wie? Zezi seli i akoto mun kɛ: “Sɛ n kɔ naan n wie i siesie’n, ḿ bá ḿ má fá amun naan lika nga n tran lɔ’n, an tran lɔ wie.”​—Zan 14:3.

Klist ɔli ɲanmiɛn su. Ɔ ko siesieli lɔ naan i sɔnnzɔnfuɛ wie’m be ko tran lɔ wie. Be kwlaa nga bé kɔ́ ɲanmiɛn su’n, be ti sran 144.000. (Sa Nglo Yilɛ 14:1, 3) ?Ngue yɛ Zezi i sɔnnzɔnfuɛ sɔ’m bé kó yó i ɲanmiɛn su lɔ ɔ?

Bé kó dí junman kpanngban lɔ. Ɲanmiɛn Ndɛ’n se kɛ: “Be nga be ko cɛn klikli sɔ’n wie’n, be liɛ su ti ye, be ti Nyanmiɛn liɛ sakpa! Wie i nnyɔn su’n su kwla-man be, bé yó Nyanmiɛn nin Krist be nyrun jranfuɛ, be nin Krist yɛ bé dí famiɛn afuɛ akpi nin-ɔn.” (Sa Nglo Yilɛ 20:6) Be nga be kɔ ɲanmiɛn su’n, be nin Klist bé yó Ɲanmiɛn ɲrun jranfuɛ, yɛ bé síe asiɛ’n sufuɛ mun.

?Wan mun yɛ Ɲanmiɛn cɛ́n be wie ɔ?

BIBLU’N WAAN: Ɲanmiɛn maan Pɔlu seli kɛ: “N lafi Nyanmiɛn su kɛ sran kpa mun o, sran tɛ mun o, bé cɛ́n, yɛ be kusu be lafi i sɔ’n su wie.”​—Sa Nga Be Yoli’n 24:15.

?Wan mun yɛle “sran kpa” nga Pɔlu kan be ndɛ’n? Daniɛli m’ɔ ti sran kpa’n, ɔ o sran sɔ’m be nun wie. Kɛ ɔ yoli oke’n, Ɲanmiɛn maan anzi kun seli i kɛ: “Wɔ Daniɛl, ɔ liɛ’n, tra wɔ anwlɛn lele fa ju awieliɛ lɔ. Á wá dé wunmiɛn. I sin á wá jáso kó fá wɔ akatua’n mɛn’n i awieliɛ lɔ.” (Daniɛl 12:13) ?Kɛ Daniɛli wá jáso’n, nin yɛ ɔ́ trán ɔn? Jue Mun 37:29 tɛ su kɛ: “Mɛn’n ɔ́ yó sran kpa’m be liɛ. Bé trán nun tititi.” Zezi seli kɛ: “Be nga be ti wɛtɛɛfuɛ’n, be liɛ su ti ye, afin mɛn’n ɔ́ wá yó be liɛ!” (Matie 5:5) Ɔ maan, Daniɛli nin yasua nin bla wie mɔ Ɲanmiɛn wá cɛ́n be’n, bé trán asiɛ’n su. Yɛ bé ɲán nguan tititi.

?Wan mun yɛle “sran tɛ” nga Pɔlu kan be ndɛ’n? Sran akpingbinngbin nga b’a wu’n, be nun sunman b’a kwlá suanman Ɲanmiɛn Ndɛ’n naan b’a nanti su. Kɛ be ko cɛn nguan’n, bé kwlá súan Zoovaa nin Zezi be su like. Kpɛkun, bé kló be. (Zan 17:3) Be kwlaa nga bé fá ajalɛ kɛ bé sú Zoova’n, bé trán nguan nun titi kɛ Zoova bɔbɔ sa.

?Wafa sɛ yɛ asiɛ’n i su tranlɛ’n yó ɔ?

BIBLU’N WAAN: Ɲanmiɛn “núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.” (Sa Nglo Yilɛ 21:4) Ɔ se ekun kɛ: “Sɛ min sran’m be kplan sua’n, bé trán be nun, sɛ be ta vinyi’n, bé dí i su mma.”​—Ezai 65:21.

Kɛ Ɲanmiɛn wá cɛ́n e sran kpa mun mɔ e nin be é wá trán fɛfɛ kɛ ngalɛ sa’n, bu i akunndan nian! Sanngɛ, kosan nga e kwla fa usa e wun’n, yɛle kɛ: “?Ngue ti yɛ e lafi su kɛ Ɲanmiɛn cɛ́n sran mun sakpasakpa ɔ?”