Siɛn’n, n si kɛ n kwla uka min wiengu mun

MIN LAA NUN’N:

Be wuli min klɔ kaan kun su. Be flɛ i Akili. Ɔ o Guatemala nvle’n i wia atɔliɛ lɔ. E kan aniɛn nga be flɛ i Iksili’n. Lalafuɛ sran nga be flɛ be kɛ Maya’n be osu’n nun yɛ e fin-ɔn. Kɛ ɔ fɛ i min kaan nun lele’n, e klɔ aniɛn’n yɛ e kan-ɔn. Kpɛkun n kan Ɛspaɲɔlu wie. Kɛ be wuli min’n, w’a diman afuɛ kun bɔbɔ, alɛ kun tɔli Guatemala lɔ. Ɔ dili afuɛ ablasan-nin-nsiɛn (36). Be nga be kan Iksili aniɛn’n, be nun sunman be wuli alɛ sɔ’n nun.

I nun nga n le afuɛ nnan’n, cɛn kun’n, min niaan bian m’ɔ le afuɛ nso’n fali bɔnbu kaan kun kannin ngowa. Kpɛkun ɔ tɛli i sa nun. Ɔ ka lɛ wuli, kpɛkun min liɛ’n min ɲinma sili. I sin’n, be wlali min suklu Guatemala lɔ klɔ dan kpafuɛ’n su lɔ, aɲinsifuɛ’m be suklu kun nun. Be nga be nian suklu sɔ’n su’n, be waan nán maan e nin ba kanngan nga be o lɔ’n e ijɔ. Kpɛkun min wiengu suklu ba’m be faman be wun mantanman min. M’an wunman like nga ti yɛ be yoli sɔ’n i wlɛ. Ɔ maan min ngunmin n trannin sa trilili. Ɔ ka min ngunmin’n, anglo nɲɔn nga e fa lo wunmiɛn’n ɔ ju ndɛndɛ naan n ko to min manmin awlo lɔ. Afin min manmin liɛ’n, min ndɛ lo i kpɛkun ɔ si min aunnvuɛ dan. Sanngɛ kɛ n ɲannin afuɛ blu’n, min manmin wa sacili. Kɛ n wunnin kɛ sran kunngba cɛ nga min ndɛ lo i mɛn’n nun’n ɔ nunman lɛ kun’n, min wla boli min wun dan.

Kɛ n ɲannin afuɛ blu-nin-kun’n (11), n sali min sin e klɔ lɔ. N ko trannin min niaan bian kun mɔ e nin i e si ti kun’n ɔ nin i awlofuɛ’m be wun. Be mannin min aliɛ nin tralɛ. Sanngɛ sran fi w’a kwlá ukaman min naan min wla gua ase. Ɔ ju wie’n, n su flɛ Ɲanmiɛn. N se i kɛ: “?Ngue ti yɛ min manmin wuli-ɔ? ?Ngue ti yɛ m’an kaci aɲinsifuɛ-ɔ?” Sran wie’m be seli min kɛ sa yalɛ kwlaa sɔ’m be fin Ɲanmiɛn. Ɔ maan n seli min wun kɛ Ɲanmiɛn siman aunnvuɛ naan ɔ timan kpa. Sɛ ɔ ti kɛ n ɲɛnnin i wun atin sa’n, nn n kunnin min wun bɔbɔ.

Min ɲinma m’ɔ sili’n ti’n, n kwlaman like fi yo yɛ sran’m be buli min lufle dan. Min kaan nun’n, sran wie’m be nin min lali kekle nun. M’an kanman sa sɔ’m be ndɛ m’an kleman sran fi. Afin n seli min wun kɛ ɔ su yoman be like fi. Sran’m be faman ijɔlɛ be manman min yɛ n kusu e nin sran fi e ijɔman. Min ngunmin yɛ n trannin sa trilili-ɔ, min wla boli min wun, yɛ n lafiman sran fi su.

WAFA NGA BIBLU’N UKALI MIN’N:

Kɛ n ɲannin afuɛ blu-nin-nsan’n (13), Zoova i Lalofuɛ nɲɔn (bian kun nin i yi’n) be toli min suklu lɔ, wunmiɛn lolɛ blɛ’n nun. E suklu klefuɛ kun m’ɔ si min aunnvuɛ kan’n yɛ ɔ seli be kɛ be wa nian min osu-ɔ. Be seli min kɛ Biblu’n waan be nga be wuli’n bé cɛ́n, naan cɛn wie lele’n aɲinsifuɛ’m bé wún ase. (Ezai 35:5; Zan 5:28, 29) Nanwlɛ, like nga be kleli min’n, ɔ yoli min fɛ. Sanngɛ kɛ mɔ e nin sran e taman ijɔ’n ti’n, kɛ ɔ yo naan e nin be e koko yalɛ’n, ɔ yoli kekle mannin min. Sanngɛ be trali be awlɛn min wun, yɛ be niannin min osu titi naan bé klé min Biblu’n nun like. Bian sɔ’n nin i yi be nantili kilo blu tra su kpɔlɛ’m be su naan b’a ju e klɔ lɔ.

Min niaan bian seli min kɛ bian sɔ’n nin i yi’n be wlawla be wun kpa naan sanngɛ kɛ ɔ niɛn i sa’n, be timan sikafuɛ. Sanngɛ kɛ be ba min osu nianlɛ titi’n, be blɛ min ninnge kannganngan wie mun. Ɔ maan n seli min klun lɔ kɛ saan be nga be ti Zezi i sɔnnzɔnfuɛ sakpasakpa’n yɛ be kwla klo sran kɛ ngalɛ’n sa-ɔ.

Fluwa nga Zoova i Lalofuɛ’m be yili mɔ aɲinsifuɛ’m be fa suan like’n yɛ n fa suannin Biblu’n nun like-ɔ. N wunnin like nga n suannin’n i wlɛ kpa. Sanngɛ ndɛ wie’m be o lɛ’n, kɛ ɔ yo naan n fa su’n, ɔ yoli kekle mannin min. I wie yɛle kɛ m’an lafiman su kɛ min ndɛ lo Ɲanmiɛn naan min ndɛ lo min wiengu mun wie. Asa ekun’n, n wunnin sa nga ti yɛ Zoova kplin su kɛ klunwifuɛ’m be tran lɛ’n kan. Sanngɛ m’an lafiman su kɛ Ɲanmiɛn klo min kɛ siɛ kpa kun fa klo i mma mun’n sa.a

Biblu’n nun like nga n suannin’n ukali min maan blɛblɛblɛ n ma kacili akunndan nga n bu’n. N ma wunnin i wlɛ kɛ be nga be o afɛ nun’n, be ndɛ lo Ɲanmiɛn kpa liɛ su. I wie yɛle kɛ, kɛ Ɲanmiɛn wunnin yalɛ nga be kle i sufuɛ mun’n, ɔ seli kɛ: ‘N wunnin min sran’m be ɲrɛnnɛn nga be fa kle be’n. N si afɛ ng’ɔ o be su’n.’ (Ezipt Lɔ Tulɛ 3:7) N ma wunnin i wlɛ kɛ min ndɛ lo Zoova naan ɔ klo min. Ɔ maan n fali min wun mɛnnin i kɛ ń sú i. Kpɛkun be yoli min batɛmun afuɛ 1998 nun.

Cɛn kun mɔ sran wie’m bé klé aɲinsifuɛ’m be like klɔ nga be flɛ i Ɛskuɛntila’n i wun koko lɛ’n, n trɛnnin i bo wie. Kɛ ɔ́ yó sɔ’n, nn be yoli min batɛmun ɔ su wa di afuɛ kun. Kpɔlɛ nga aniaan kun nin i yi’n be fuli i laa naan b’a ko kle min like min klɔ lɔ’n, kpɔlɛ kunngba sɔ’n yɛ n fu naan m’an kwla tran aɲia’m be bo-ɔ. Ɔ maan asɔnun kpɛnngbɛn kun wunnin i kɛ i sɔ’n timan pɔpɔ manman min. I sɔ’n ti’n, ɔ seli aniaan wie mɔ be tran Ɛskuɛntila lɛ’n kɛ be sike min naan m’an kwla tran aɲia’m be bo. Andɛ nin andɛ’n, be te nian min lika kɛ be osufuɛ wie sa.

Aniaan’m be yoli ninnge kpanngban mannin min. I kwlaa sɔ’n kle min kɛ Zoova i Lalofuɛ mun yɛ be ti Zezi i sɔnnzɔnfuɛ mun sakpasakpa-ɔ.—Zan 13:34, 35.

I SU MMLUSUƐ NGA N ƝƐNNIN I’N:

Ɔ yoman min kɛ n wo mɛn’n nun ngbɛn sa kun, yɛ n fa min wla gua like kpa kun su. Siɛn’n, n fa ndɛ nanwlɛ nga be o Biblu’n nun’n n kle sran’m be like. I sɔ’n yo maan n faman min ɲin sieman sa ng’ɔ o min su’n su sa trilili. Asa ekun’n, n ti asɔnun kpɛnngbɛn yɛ n jran sran kpanngban be ɲrun n kan Biblu’n nun ndɛ’n kle be Zoova i Lalofuɛ’m be asɔnun’m be nun. Blɛ wie nun’n, n jrannin sran akpiakpi be ɲrun n kannin Biblu’n nun ndɛ’n kleli be Zoova i Lalofuɛ’m be aɲia dandan’m be bo.

Afuɛ 2010 nun’n, n dili suklu nga be flɛ i siɛn’n kɛ Ɲanmiɛn i Famiɛn dilɛ’n i jasin bofuɛ’m be suklu’n, nvle nga be flɛ i Salvadɔɔ’n su lɔ. Suklu sɔ’n i bo’n, be kleli min wafa nga n kwla di junman nga be fa mannin min asɔnun nun’n be kpa tra laa’n. Like nga be kleli min’n ti’n, n wunnin i wlɛ kɛ min ndɛ lo Zoova kpa yɛ n bu min wun sran siɛn’n. Asa ekun’n, n wunnin i kɛ Zoova kwla kle sran kwlaa like naan w’a fɛ i w’a di i junman’n.

Zezi seli kɛ: “Sɛ a cɛ sran like’n, ɔ klun jɔ kpa tra kɛ be cɛ wɔ like’n.” (Sa Nga Be Yoli’n 20:35) Andɛ’n, n kwla se kɛ n di aklunjuɛ kpa. Laa’n, n bumɛn i kɛ n kwla yo sran ye. Sanngɛ siɛn’n, n si kɛ n kwla uka min wiengu mun.