BIBLU’N I SU KOSAN’M BE SU TƐLƐ
?E kwla si Ɲanmiɛn i su ndɛ nanwlɛ’n?
?Ngue ti yɛ Ɲanmiɛn kunndɛ kɛ e si ndɛ nanwlɛ’n niɔn? An kanngan Zan 17:3 nun
Ɲanmiɛn kɛnnin i klun ndɛ kleli sran mun. Ɔ fɛli i wawɛ’n mannin be yɛ be klɛli i ndɛ’n niɔn. I ndɛ’n mɔ be klɛli’n, ɔ o Biblu’n nun. (2 Piɛr 1:20, 21) Sɛ e kanngan Biblu’n nun’n, é sí Ɲanmiɛn i su ndɛ nanwlɛ’n.—An kanngan Zan 17:17, ɔ nin 2 Timote 3:16 be nun.
Ɲanmiɛn kɛn i wun ndɛ kpanngban kle e Biblu’n nun. Ɔ kle e like nga ti yɛ ɔ yili sran mun’n. Yɛ like ng’ɔ́ wá yó mán sran mun’n, ɔ nin wafa ng’ɔ fata kɛ sran’m be tran’n, ɔ kannin be ndɛ wie. (Sa Nga Be Yoli’n 17:24-27) Ɲanmiɛn kunndɛ kɛ e si i su ndɛ nanwlɛ’n.—An kanngan 1 Timote 2:3, 4 nun.
?Ngue ti yɛ sran nanwlɛfuɛ mun yɛ Ɲanmiɛn kunndɛ be ɔ?
Ɲanmiɛn Zoova ti nanwlɛfuɛ. Yɛ ɔ sunmɛnnin i Wa Zezi naan ɔ wa kle sran’m be ndɛ nanwlɛ’n. Be nga be klo nanwlɛ’n, be fali be wun mantannin Zezi. (Zan 18:37) I sɔfuɛ mun yɛ Ɲanmiɛn kunndɛ kɛ be su i ɔ.—An kanngan Zan 4:23, 24 nun.
Mmusu’m be si Satan bua Ɲanmiɛn i su ato naan sran’m b’a suman Ɲanmiɛn. (2 Korɛntfuɛ Mun 4:3, 4) Be nga be kloman nanwlɛ’n, be fa ato ndɛ’m be su. (Rɔmfuɛ Mun 1:25) Sanngɛ, sran kpanngban kpa be suan Biblu’n nun like. Ɔ maan be si Ɲanmiɛn i su ndɛ nanwlɛ’n.—An kanngan Sa Nga Be Yoli’n 17:11 nun.