?Like nga Biblu’n kle’n i su yɛ a lafi ɔ?

ASIƐ wunmuan’n su’n, sran miliar nɲɔn tra su be waan be ti Klist i sɔnnzɔnfuɛ. ?A se sɔ wie? Sɛ ɔ ti sɔ’n, nn a o sran kpanngban sɔ’m be nun wie. Andɛ’n, asɔnun’m b’a sɔn. Yɛ be bo’n timan kun. Ɔ le kun nin i like m’ɔ kle ɔ. Ɔ maan atrɛkpa’n, ndɛ nga a lafi su’n, nɛ́n i kunngba’n yɛ sran uflɛ m’ɔ se kɛ ɔ ti Klistfuɛ wie’n ɔ lafi su ɔ. Like nga sran kun lafi su’n, ɔ ti cinnjin. Afin sɛ ɔ waan á yó Klist i sɔnnzɔnfuɛ sakpa’n, ɔ fata a lafi like nga Biblu’n kle’n i su.

Be flɛli Zezi Klist i sɔnnzɔnfuɛ klikli mun kɛ ‘Klistfuɛ’ mun. (Sa Nga Be Yoli’n 11:26) Be flɛlɛ sɔ’n, ɔ nin be fata. Afin blɛ sɔ’n nun’n, be nga be lafi Klist su’n, be timan akpasuaakpasua. Ndɛ kwlaa nga Zezi Klist kleli be’n, be nantili be su. ?Yɛ asɔnun nga i nun yɛ a kɔ’n nin? ?Like nga Zezi kleli’n, i wie yɛ be kle ɔ? ?Ndɛ nga Klistfuɛ klikli’m be lafili su’n, yɛ be lafi su wie ɔ? ?Ngue yɛ á yó naan w’a wun i wlɛ ɔ? Ɔ ti like kunngba cɛ. Yɛle kɛ, nian sɛ like nga Biblu’n kle’n, ɔ nin ndɛ nga a lafi su’n be ti kun o.

Zezi Klist buli Ɲanmiɛn ndɛ nga be klɛli’n i like cinnjin kpa. Be nga be nantiman su mɔ be kle like uflɛ’n, ɔ buli be fɔ. (Mark 7:9-13) Ɔ maan, like nga Biblu’n kle’n i su yɛ ɔ fata kɛ Zezi i sɔnnzɔnfuɛ’m be lafi ɔ. I sɔ’n ti’n, ɔ fata kɛ Klistfuɛ’m be tinuntinun be usa be wun kɛ: ‘?Ndɛ ng’ɔ o Biblu’n nun’n yɛ asɔnun nga n wo nun’n, ɔ kle ɔ?’ Sɛ ɔ waan á wún i wlɛ’n, fa ndɛ ng’ɔ o Biblu’n nun sunnzun like nga asɔnun nga a o nun’n kle’n nian, sɛ be ti kun o.

Zezi seli kɛ sɛ e waan é sú Ɲanmiɛn’n, ɔ fata kɛ e su i nanwlɛ’n nun. Yɛ Biblu’n nun yɛ ndɛ nanwlɛ’n wo ɔ. (Zan 4:24; 17:17) Akoto Pɔlu kusu seli kɛ sɛ e waan é fíte nun’n, ɔ fata kɛ e wun ndɛ “nanwlɛ’n i wlɛ kpa.” (1 Timote 2:4) Nanwlɛ, ɔ ti cinnjin kpa kɛ ndɛ nga e lafi su’n, ɔ fin Biblu’n mɔ i nun ndɛ’n ti nanwlɛ’n nun. Afin, i yɛ maan é kwlá fíte nun ɔn.

FA LIKE NGA BE KLELI WƆ’N SUNNZUN NDƐ NG’Ɔ O BIBLU’N NUN’N NIAN

Kanngan kosan nsiɛn nga bé bá lɛ’n mun. Kpɛkun, nian wafa nga Biblu’n tɛ be su’n. Yɛ bu be su akunndan. I sin’n, usa ɔ wun kosan yɛ’n: ‘?Like nga Biblu’n kle’n, ɔ nin like nga be kle i min asɔnun’n nun lɔ’n, be ti kun?’

Sɛ a yo sɔ’n, ɔ ti kpa dan. Atrɛkpa’n, ɔ wla kpɛn like uflɛ m’ɔ asɔnun nga a kɔ nun’n, ɔ kle’n su. Yɛ á kúnndɛ kɛ á nían sɛ ɔ o Biblu’n nun o. Sɛ a klo’n, Zoova i Lalofuɛ’m be kwla uka wɔ naan w’a si Biblu’n nun ndɛ m’ɔ ti nanwlɛ’n. Be su deman wɔ sika. Sɛ a klo kusu’n, a kwla kɔ be ɛntɛnɛti adrɛsi jw.org/fr su.

1 KOSAN’N: ?Wan yɛle Ɲanmiɛn Kpli?

I SU TƐLƐ’N: Ɲanmiɛn Kpli yɛle Zezi i Si’n. Be flɛ i kɛ Zoova. Ɔ ti anannganman. I yɛ ɔ yili ninnge’n kwlaa ɔ.

LIKE NGA BIBLU’N KLE’N:

“E la e Min Jésus-Krist i Si Nyanmiɛn’n i ase, yɛ e srɛ i titi kɛ ɔ nian amun su.”—Kolɔsfuɛ Mun 1:3.

“E Min Nyanmiɛn, kɛ bé yí wɔ ayɛ bé mánmán wɔ bɔ be se kɛ a kwla sa’n kwlaa yo’n i su-ɔ, afin wɔ yɛ a yili like’n kwlaa-a.” —Sa Nglo Yilɛ 4:11.

Nian Rɔmfuɛ Mun 10:13, ɔ nin 1 Timote 1:17 be nun wie.

2 KOSAN’N: ?Wan yɛle Zezi Klist?

I SU TƐLƐ’N: Zezi ti Ɲanmiɛn i Wa Kpɛn. Ɲanmiɛn dun mmua yili i naan w’a yi ninnge’n kwlaa. Zezi w’a fɛmɛn i wun w’a sunnzunman Ɲanmiɛn. Yɛ ɔ yoli Ɲanmiɛn klun sa’n.

LIKE NGA BIBLU’N KLE’N:

“E Si’n lɛ nyrun tra min.”—Zan 14:28.

“[Zezi] fa Nyanmiɛn bɔ be wun-mɛn i’n, ɔ ti i Wa Kpɛn bɔ i kpa’n tra like ng’ɔ yili be’n be kwlaa.”—Kolɔsfuɛ Mun 1:15.

Nian Matie 26:39, ɔ nin 1 Korɛntfuɛ Mun 15:28 be nun wie.

3 KOSAN’N: ?Ngue yɛle Ɲanmiɛn wawɛ’n?

I SU TƐLƐ’N: Yɛle wunmiɛn mɔ Ɲanmiɛn fa di junman’n. Ɔ timan sran. Ɲanmiɛn kwla fɛ i wawɛ’n man sran mun, annzɛ ɔ kwla fa tin be.

LIKE NGA BIBLU’N KLE’N:

“Kɛ Elizabɛt tili like bɔ Mari yoli i’n, i ku’n jaojaoli, Nyanmiɛn Wawɛ’n wluli i nun.”—Lik 1:41.

“Kɛ Nyanmiɛn Wawɛ’n ko ba amun wun’n, ɔ́ tín amun.”—Sa Nga Be Yoli’n 1:8.

Nian Bo Bolɛ 1:2, ɔ nin Sa Nga Be Yoli’n 2:1-4; 10:38 be nun wie.

4 KOSAN’N: ?Ngue yɛle Ɲanmiɛn Sielɛ’n?

I SU TƐLƐ’N: Ɲanmiɛn Sielɛ’n ti famiɛn diwlɛ kun. Yɛ ɔ o ɲanmiɛn su lɔ. Zezi Klist yɛ Ɲanmiɛn sieli i famiɛn ɔn. Ɔ ka kan’n, Zezi wá yó maan sran kwlaa nga bé trán asiɛ’n su’n bé yó Ɲanmiɛn klun sa’n.

LIKE NGA BIBLU’N KLE’N:

“Kɛ anz i nso su’n boli i awɛ liɛ’n, sran wie’m be kpannin kekle kpa nyanmiɛn su lɔ, be seli kɛ: ‘E Min Nyanmiɛn’n nin i Krist’n be yɛ be sie mɛn’n siɛn nin-ɔn. Ɔ́ ká be sa nun tititi!’”—Sa Nglo Yilɛ 11:15.

Nian Daniɛl 2:44, ɔ nin Matie 6:9, 10 be nun wie.

5 KOSAN’N: ?Sran kpa’m be kwlakwla bé kɔ́ ɲanmiɛn su?

I SU TƐLƐ’N: Cɛcɛ. Sran nga Ɲanmiɛn fali be naan be ɔ ɲanmiɛn su’n, b’a sɔnman. Be flɛ be kɛ “bua akpasua kaan.” Be nin Zezi bé dí famiɛn. Yɛ bé síe sran mun.

LIKE NGA BIBLU’N KLE’N:

“Amun bɔ an ti kɛ bua akpasua kaan kun sa’n, nán srɛ kun amun, yɛlɛ kɛ amun Si klo kɛ amun tran be ng’ɔ sie be’n be nun.”—Lik 12:32.

‘Bé yó Nyanmiɛn nin Krist be nyrun jranfuɛ, be nin Krist yɛ bé dí famiɛn’n niɔn.’—Sa Nglo Yilɛ 20:6.

Nian Sa Nglo Yilɛ 14:1, 3 nun wie.

6 KOSAN’N: ?Ngue yɛ Ɲanmiɛn wá yó i asiɛ’n su mán sran mun ɔn?

I SU TƐLƐ’N: Kɛ Zezi wá síe sran mun’n, asiɛ wunmuan’n káci lika klanman. Asiɛ’n yó sran kpa’m be liɛ. Bé trán su tititi. Be su tɔman tukpacɛ kun, yɛ be wun jɔ be kpa fɔuun.

LIKE NGA BIBLU’N KLE’N:

“[Wun ase kanfuɛ] mun yɛ mɛn’n ɔ́ wá yó be liɛ ɔ. Be wun jɔ́ be kpa fɔuun.”—Jue Mun 37:10, 11.

“Ɔ́ núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”—Sa Nglo Yilɛ 21:3, 4.

Nian Jue Mun 37:29, ɔ nin 2 Piɛr 3:13 be nun wie.