?Ndɛ benin yɛ Biblu’n kan-ɔn?

?Sran’m bé ɲán fɔundi asiɛ’n su le?

?Á tɛ́ su sɛ?

• Ɛɛn

• Cɛcɛ

• Ɔ kwla yo sɔ

Ndɛ nga Biblu’n kan’n

Kɛ Zezi wá síe sran mun’n, ‘bé ɲán fɔundi lele saan anglo’n w’a jaso lɛ.’—Jue Mun 72:7.

?Ngue ekun yɛ Biblu’n kle e-ɔ?

• Ɲanmiɛn wá núnnún klunwifuɛ mun sekeseke. Kpɛkun, sran kpa’m be “wun jɔ́ be kpa fɔuun.”—Jue Mun 37:10, 11.

• Ɲanmiɛn wá yó maan be su kunman alɛ kun.—Jue Mun 46:9, 10.

?Dɔ nga su’n, e wun kwla jɔ e fɔuun?

Sran wie’m be bu i kɛ... sɛ afɛ’n nin sran lufle bulɛ’n nin a wieman’n, sran’m be wun kwlá jɔman be fɔuun. ?A bu i sɛ?

Ndɛ nga Biblu’n kan’n

Dɔ nga su bɔbɔ’n, be nga be nin Ɲanmiɛn be afiɛn mantan kpa’n, be wun ‘jɔ be fɔuun, be wunman sa ti mɔ be wun jɔ be fɔuun sɔ’n i bo mlɔnmlɔn.’—Filipfuɛ Mun 4:6, 7.

?Ngue ekun yɛ Biblu’n kle e-ɔ?

• Ɲanmiɛn kannin kɛ ɔ́ káci “like’n kwlaa uflɛ.” Ɔ maan sran’m be su fɛman kun. Yɛ be su buman sran fi lufle kun.—Sa Nglo Yilɛ 21:4, 5.

• Sɛ e suan Biblu’n nun like’n, e wun kwla jɔ e fɔuun.—Matie 5:3.