?Ngue Like Yɛ Ɲanmiɛn Wá Yó-ɔ?

Sɛ e le e janvuɛ kpa kun naan sa ɲan e’n, e lafi su kɛ ɔ́ súan e bo. I sɔ’n ti’n, sran wie’m be waan Ɲanmiɛn timan e janvuɛ. Afin ɔ yo be kɛ, kɛ sa kekle tɔ be su’n, Ɲanmiɛn yoman like fi manman be sa. Nga be wunmɛn i wlɛ’n, yɛle kɛ Ɲanmiɛn yoli ninnge kpanngban mannin e. Kpɛkun ɔ́ wá yó ninnge wie mun naan sa kwlaa nga be o e su’n, be wie. ?Ngue yɛ Ɲanmiɛn wá yó-ɔ?

Ɔ́ NÚNNÚN KLUNWIFUƐ’M BE KLWAA

Kɛ ɔ ko yo naan sa tɛtɛ kwlaa b’a wie’n, Ɲanmiɛn wá núnnún sran ng’ɔ kpɛli be ba’n. Biblu’n kan sran sɔ’n i ndɛ. Ɔ se kɛ: “Mɛn wunmuan’n wo klunwifuɛ’n i sa nun.” (1 Zan 5:19) Klunwifuɛ sɔ’n yɛle mmusu’m be si Satan. Zezi seli kɛ Satan yɛ ɔ ‘sie mɛn nga-ɔ.’ (Zan 12:31) I ti yɛ sran’m be wun be ɲrun dan-ɔn. ?Ngue yɛ Ɲanmiɛn wá yó-ɔ?

Ɔ ka kan’n, Ɲanmiɛn Zoova maan i Wa Zezi Klisi wá “núnnún Suɛn tɔnfuɛ mɔ i ti yɛ sran wu’n, i mlɔnmlɔn.” (Ebre Mun 2:14; 1 Zan 3:8) Biblu’n se kɛ mmusu’m be si Satan bɔbɔ “si kɛ i blɛ’n w’a sɔnman kun.” (Sa Nglo Yilɛ 12:12) Ɲanmiɛn wá núnnún be kwlaa nga be klun yo wi’n.—Jue Mun 37:9; Ɲanndra Mun 2:22.

Ɔ́ YÓ MAAN ASIƐ’N KÁCI LIKA KLANMAN

Ɲanmiɛn seli kɛ asiɛ’n káci lika klanman yɛ sran mɔ fɔ nunman be nun’n bé trán su tititi. Kɛ ɔ ko nunnun klunwifuɛ mun’n, yɛ i klun sa sɔ’n kpɛ́n su-ɔ. ?Blɛ sɔ’n nun’n mɛn’n yó sɛ?

Fɔundi nin alaje. “Asiɛ’n yó wɛtɛɛfuɛ’m be liɛ, yɛ fɔundi dan mɔ bé dí’n ti’n, be klun jɔ́ kpa fɔuun.”—Jue Mun 37:11.

Aliɛ’n bú. “Ble nin i wunsu ninnge’m bé bú asiɛ’n su, bé bú oka’m be ti’n su.”—Jue Mun 72:16.

Junman nin sua kpakpa mun. “Bé kplán sua mun yɛ bé trán be nun, bé tá viɲin mun yɛ bé dí be su mma mun. […] Min sran mɔ n kpali be’n, bé ɲán be sa nuan ninnge’m be su ye dan.”—Ezai 65:21, 22.

?A kunndɛ kɛ sa kwlaa nga Biblu’n kan be ndɛ lɛ’n, be ju? Ɔ ka kan’n, be kwlaa nga bé wá trán mɛn klanman’n nun’n, bé ɲán ninnge sɔ mun tititi.

Ɔ́ NÚNNÚN TUKPACƐ NIN WIE’N

Andɛ’n, e ngba e tɔ tukpacɛ kpɛkun e wu. Sanngɛ ɔ su yoman sɔ kun. Ɲanmiɛn wá yó maan sran’m bé ɲán tɛ nga Zezi fɛli i wun yili’n, i su ye. Ɔ́ yó sɔ naan “sran kwlaa ng’ɔ kle kɛ ɔ lafi [Zezi] i su’n w’a mlinman, sanngɛ ɔ ɲan nguan m’ɔ leman awieliɛ’n.” (Zan 3:16) ?Kɛ ɔ ko yo sɔ’n, sran’m be liɛ yó sɛ?

Sran’m be su tɔman tukpacɛ kun. “Sran fi su seman kɛ: ‘N kpinndinman.’ Bé wá yáci be nga be tran mɛn’n nun’n be sa tɛ’n cɛ́ be.”—Ezai 33:24.

Sran’m be su wuman kun. “Ɔ́ núnnún wie’n mlɔnmlɔnmlɔn, e Min Zoova m’ɔ Sie Like Kwlakwla’n, ɔ́ wá núnnún sran’m be kwlaa be ɲinmuɛn’n.”—Ezai 25:8.

Sran’m bé trán nguan nun titi. “Like nga Ɲanmiɛn fa cɛ e’n, yɛle nguan m’ɔ leman awieliɛ’n Klisi Zezi m’ɔ ti e Min’n i ti.”—Rɔmunfuɛ Mun 6:23.

Be nga be wuli’n, bé sá be sin nguan nun ekun. “N lafi su kɛ be nga be yoli sa kpa-o, be nga b’a yoman sa kpa-o, Ɲanmiɛn wá cɛ́n be.” (Sa Nga Be Yoli’n 24:15) E ti tɛ mɔ Ɲanmiɛn yili’n ti’n, be nga be wuli’n, bé cɛ́n nguan.

?Ngue yɛ Ɲanmiɛn wá yó naan i kwlaa sɔ’n w’a kpɛn su-ɔ?

Ɔ́ MÁN SRAN’M BE FAMIƐN KPA KUN

Kɛ ɔ ko yo naan Ɲanmiɛn w’a yo like ng’ɔ seli kɛ ɔ́ yó mán sran mun asiɛ’n su’n, ɔ takali awa kun ɲanmiɛn su lɔ. Kpɛkun ɔ kpali Klisi Zezi kɛ ɔ yo i su Famiɛn. (Jue Mun 110:1, 2) Zezi seli i sɔnnzɔnfuɛ’m be kɛ be srɛ naan Ɲanmiɛn Sielɛ’n i blɛ’n ju. I waan kɛ bé srɛ́ Ɲanmiɛn’n, maan be se kɛ: “E Si m’ɔ o ɲanmiɛn su lɔ’n, [...] maan ɔ Sielɛ’n i blɛ’n ju.”—Matie 6:9, 10.

Ɲanmiɛn wá síe asiɛ’n sufuɛ mun, kpɛkun ɔ́ yó maan be su afɛ’n nin ɲrɛnnɛn kwlaa bé wíe. Ɲanmiɛn i Famiɛn dilɛ’n i kunngba cɛ yɛ ɔ kwla yo sran’m be ye sakpa-ɔ. I sɔ’n ti’n, i nun mɔ Zezi o asiɛ’n su wa’n, ɔ boli “Ɲanmiɛn Sielɛ’n i jasin fɛ’n” kleli sran mun. Kpɛkun ɔ wlɛli i sɔnnzɔnfuɛ’m be fanngan kɛ be yo sɔ wie.—Matie 4:23; 24:14.

Klolɛ dan mɔ Ɲanmiɛn Zoova klo sran mun ti’n, i waan ɔ́ yó ninnge ɲɛnmɛnɲɛnmɛn sɔ mun mán be. ?A kloman kɛ á sí i naan á fá ɔ wun mɛ́ntɛn i? ?Sɛ a fɛ i sɔ ajalɛ’n, i su ye benin yɛ á ɲɛ́n i-ɔ? Ndɛ akpasua nga i sin liɛ’n wá yíyí nun.