Aɲia’m be yo gbanflɛn nin talua’m be ye
1 Talua kaan kun seli kɛ: “Cɛn wie’n, n bu i kɛ sran kun i nguan cɛn’n nun’n, i gbanflɛ annzɛ i talua blɛ’n, yɛ ɔ ti kekle dan ɔn. Afin e wiengu’m be kunndɛ bian nin bla sukusuku, be nɔn drɔgi, be ti nzanboɛfuɛ.” ?Kɛ amun bu i sɔ wie ɔ? ?Sɛ ɔ ti sɔ’n, kɛ amun niɛn i sa’n, ngue yɛ ɔ kwla uka amun naan amun a kpalo ayeliɛ tɛtɛ sɔ mun ɔn? Maan amun lafi Zoova su tankaan kpa. Amun lafi su kɛ atin ng’ɔ kle’n, yɛ ɔ ti kpa ɔ. Biblu’n se kɛ sɛ e lafi-mɛn i su’n ‘i klun jɔ-man e wun mlɔnmlɔn.’ (Ebr. 11:6) Asɔnun aɲia’m be bo kɔlɛ kwla uka amun kpa. Afin bé wlá amun fanngan. Ɔ maan amún fúa kpa kɛ amun su yoman sa tɛ.
2 Wafa nga aɲia’m be yo aniaan’m be ye’n: ?Kɛ amun nin amun janvuɛ kpa wie’m be yia be di aliɛ fɛfɛ wie’n, ngue yɛ ɔ man amun aklunjuɛ ɔ? Aliɛ mɔ amun su di’n, ɔ nin nzɛmunlɛ mɔ amun su bo’n, i kwlaa yɛ ɔ man amun aklunjuɛ’n niɔn. I kunngba’n, e Ɲanmiɛn sulɛ nun’n, e aɲia’m be yo maan e di aklunjuɛ kɛ ngalɛ sa’n wie.
3 Like nga be kle e asɔnun aɲia’m be bo lɔ’n, be wla e fanngan dan. Afin sa nga be ju e su cɛn kwlaa’n, ɔ nin wafa nga Biblu nun ndɛ’m be kpɛn su’n, be su yalɛ yɛ e koko ɔ. Asa ekun’n, afɔtuɛ kpakpa nga e wun be lɔ’n be yo maan e mɛn dilɛ’n yo kpa, yɛ e wun sa nga be ju e su’n be trawlɛ. Aniaan nga e wun be aɲia’m be bo’n, be yɛ be ti janvuɛ i kpafuɛ’n niɔn. Nanwlɛ, e aɲia’m be yo maan e di alaje Ɲanmiɛn sulɛ’n nun. (Jue. 133:1) I sɔ’n ti yɛ talua kun seli kɛ: “Kɛ lika’n cɛn mɔ n kɔ suklu’n, saan lele nnɔsua yɛ n sa min sin ɔn. Ɔ maan afɛ’n kun min kpo. Sanngɛ aɲia’m be ti min liɛ kɛ nzue flɔlɔ mɔ be fa man sran mɔ nzuewe w’a kun i lele’n sa. Yɛle kɛ be man min wunmiɛn, ɔ maan kɛ lika cɛn’n, n kwla kɔ suklu ekun.” Talua kun ekun seli kɛ: “N wunnin i wlɛ kɛ, kɛ e nin be nga be klo Zoova e san nun’n, ɔ yo maan n fa min wun mantan Zoova kpa ekun.”
4 Sɛ amun di Ɲanmiɛn junman dilɛ suklu’n wie’n, ɔ ti kpa. Afin suklu sɔ’n úka amun naan amun a kunndɛ Biblu’n nun ndɛ wie mun a sie. Ɔ kwla uka amun ekun naan amun a wun wafa nga amun kwla yiyi ndɛ sɔ’m be nun’n. Kpɛkun amun kwla ijɔ weinwein aniaan’m be kwlaa be ɲrun Ɲanmiɛn Sielɛ Sua nun lɔ. Suklu sɔ’n ti’n, amun kwla kle sran mun Ɲanmiɛn Ndɛ m’ɔ man nguan’n. ?Nán amun cenjele nun ɔn? Nanwlɛ, gbanflɛn nin talua’m be kwlá ɲanman suklu uflɛ kun mɔ i nun lɔ’n, be kle ninnge kpakpa kɛ ngalɛ’n sa mun ɔn.
5 Like nga amún yó naan aɲia’m b’a yo amun ye’n: Sɛ amun kunndɛ kɛ aɲia’m be yo amun ye sakpa’n, ɔ fata kɛ amun yo like cinnjin nsan. Yɛle kɛ amun dun mmua siesie amun wun, amun tɛ kosan’m be su, kpɛkun amun nanti like nga amun suan’n su.
6 Amun dun mmua siesie amun wun: Amun fa blɛ be siesie amun wun titi naan amun a wɔ aɲia’m be bo. Kpɛkun Nán amun fɛ i sɔ blɛ liɛ’n fa yo suklu lɔ ninnge mun, annzɛ junman su lɔ ninnge mun. Nán amun fɛ i sɔ blɛ liɛ’n fa yiyi amun ɲin su. Like nga amún wá kókó su yalɛ aɲia’n i bo lɔ’n, amun dun mmua suan. Sɛ amun yo i sɔ titi’n, i sɔ’n káci amun nzuɛn. Ng’ɔ ti cinnjin’n, yɛle kɛ Biblu’n nun ndɛ tre ng’ɔ fata kɛ e kanngan nun le mɔcuɛ kun nun’n, amun kanngan nun. Cɛn kwlaa amun fa blɛ be kanngan nun kan naan amun bu su akunndan. Aniaan wie’m be wie be wun siesie cɛn kun annzɛ cɛn nɲɔn ka naan asɔnun’n i Biblu’n nun like suanlɛ’n annzɛ Sasafuɛ Tranwlɛ’n i nun like suanlɛ’n w’a ju. Amun kwla yo sɔ wie. Sɛ amun ɲɛn i wun blɛ’n, le mɔcuɛ kwlaa nun’n, amun dun mmua siesie amun wun naan amun a yo Ɲanmiɛn junman dilɛ aɲia’n.
7 Amun tɛ kosan’m be su: Biblu’n kan kɛ, kɛ Zezi ɲannin afuɛ 12, ɔ ɔli Ɲanmiɛn sua’n nun lɔ. Ɔ tieli ndɛ nga like klefuɛ’m be kan’n, yɛ ɔ usali be kosan. Kpɛkun ɔ tɛli be kosan’m be su. (Lik 2:46, 47) E kwla se kɛ ɔ fali aɲia nga be su yo’n i nun ta’n wie. Amun kusu, sɛ amun mian amun ɲin be tɛ kosan be su aɲia’m be bo’n, amún ɲán su ye dan.—Nya. 15:23.
8 Maan amun fa amun ɲin sie i aɲia’m be su kpa. Wie liɛ’n, sɛ be se e kɛ e sie e su kpa aɲia’m be bo’n, ɔ kwla yo kekle man e tra kɛ e bɔbɔ e ijɔ naan sran’m be tie’n. ?Ngue ti ɔ? Afin kɛ mɔ nán e bɔbɔ yɛ e su ijɔ’n, ɔ cɛman naan e akunndan’n w’a tran like uflɛ su. ?Gbanflɛn nin talua mun, ngue yɛ ɔ kwla uka amun ɔn? Amun klɛ ndɛ nga aniaan’n su kan’n fluwa su. Ndɛ cinnjin ng’ɔ fata kɛ amun wla kpɛn su cɛn wie lele’n, amun klɛ be sie. Kɛ ijɔfuɛ’n kánngan Biblu’n nun’n, amun tike amun Biblu liɛ’n su naan amun nian nun wie. Sɛ amun yo sɔ’n, amun ɲin trán aɲia’n su.
9 Asa ekun’n, amun fua kpa kɛ, aɲia kwlaa bo’n, sɛ be usa kosan’n, amún tɛ́ su wie. Sɛ amun bu kosan’m be sin kwlaa naan amun a tɛ su kɛ nga amun fa ijɔ titi sa’n, amún ɲán su ye. Nyanndra Mun 15:28 se kɛ: “Sran ng’ɔ ti sran kpa’n, ɔ bu sa sin naan ɔ’a tɛ ndɛ su.”
10 Amun nanti like nga amun suan’n su: Kasiɛn su’n, amun nian sɛ like nga amun suan’n, ɔ ‘yo amun wun sa ye’ o. (1 Tɛs. 2:13) Sɛ amun nanti like kwlaa nga amun suɛn i aɲia’m be bo’n be su’n, amun nin Ɲanmiɛn Zoova amun afiɛn’n mantan kpa. Kpɛkun amún wún i wlɛ kɛ ɔ o lɛ sakpa. Sɛ amun nanti “ndɛ nanwlɛ” su’n, aklunjuɛ nga amún wá dí’n, nán sran yɛ ɔ́ kán ɔn.—3 Zan 3, 4.
11 Aniaan gbanflɛn nin talua mun’n, sɛ amun dun mmua siesie amun wun, naan amun tɛ kosan’m be su’n, naan amun nanti like nga amun suan’n su’n, aɲia’m be bo kɔlɛ yó amun fɛ dan. Asa ekun’n, amún ɲán su ye dan. Amún láfi Ɲanmiɛn su tankaan kpa. Ɔ maan amún fúa kɛ amun su kpɔciman amun Si Zoova m’ɔ o nglo lɔ’n le.—Jue. 145:18.