Ɲanmiɛn Kpli nin Klisi be su ndɛ nanwlɛ’n

?Wan yɛle Ɲanmiɛn Kpli?

?Ɲanmiɛn i dunman’n yɛle benin? Ɲanmiɛn bɔbɔ seli kɛ: “N ti Zoova. Min dunman’n yɛ ɔ o lɛ-ɔ.” (Ezai 42:8) Ɲanmiɛn i dunman’n wo Biblu’n nun kpɛ kɔe 7.000. Sanngɛ be nga be kacili Biblu’n aniɛnaniɛn’m be nun’n, be yili dunman sɔ’n, kpɛkun be fali manmanlɛ dunman kɛ “Min” sa’n be sieli i osu. Ɲanmiɛn kunndɛ kɛ e yo i janvuɛ. I sɔ’n ti’n, ɔ se e kɛ e “bo i dunman.”—Jue Mun 105:1.

Zoova i manmanlɛ dunman mun. Ɔ ju wie’n Biblu’n nun’n, kɛ be waan bé kán Zoova i ndɛ’n, be se kɛ “Ɲanmiɛn” annzɛ “Ɲanmiɛn m’ɔ Kwla Like Kwlaa Yo’n” annzɛ “Like Kwlaa Yifuɛ” annzɛ “Siɛ” annzɛ “Min” annzɛ kusu “Ɲanmiɛn m’ɔ Like Fi Nunmɛn i Sin’n.” Kɛ be nga Biblu’n kan be ndɛ’n be nun wie’m bé srɛ́ Zoova’n, be fali manmanlɛ dunman nga e boboli be su lɛ’n, be nun wie’m be flɛli i annzɛ be boli i dunman trele.—Daniɛli 9:4.

Sran wafa nga Ɲanmiɛn ti’n. Ɲanmiɛn ti wawɛ. (Zan 4:24) Biblu’n se kɛ: “Sran fi nin-a wunman Ɲanmiɛn le.” (Zan 1:18) Sanngɛ Biblu’n kan wafa nga Ɲanmiɛn i wun yo i’n i ndɛ. I wie yɛle kɛ sɛ sran’m be yo sa tɛ’n, ɔ bo i wla. Sanngɛ sɛ be yo sa kpa’n, ‘i klun jɔ be wun.’—Ɲanndra Mun 11:20; Jue Mun 78:40, 41.

Ɲanmiɛn i nzuɛn’n yo ɲɛnmɛn dan. Ɲanmiɛn kpaman sran nun. Ɔ sɔ sran ngba nun. (Sa Nga Be Yoli’n 10:34, 35) Asa ekun’n, ɔ ‘yaci sa cɛ, ɔ si aunnvɔɛ, ɔ faman ya ndɛndɛ, ɔ klo sran dan, ɔ ti nanwlɛfuɛ.’ (Ezipti Lɔ Tulɛ 34:6, 7) Sanngɛ i nzuɛn’m be nun nnan be ti cinnjin kpa. Maan e fa e ɲin e sie be su.

Ɔ le tinmin. Kɛ m’ɔ ti “Ɲanmiɛn m’ɔ Kwla Like Kwlaa Yo’n” ti’n, nda kwlaa ng’ɔ ta be’n, ɔ yia be nuan.—Bo Bolɛ 17:1.

Ɔ si ngwlɛlɛ. Ngwlɛlɛ nga Ɲanmiɛn si i’n, ɔ leman wunsu. I sɔ’n ti’n, Biblu’n se kɛ Ɲanmiɛn “ngunmin cɛ yɛ ɔ ti ngwlɛlɛfuɛ” ɔ.—Rɔmunfuɛ Mun 16:27.

Ɔ yo sa i nuan su sɛsɛsɛ. Like kwlaa nga Ɲanmiɛn yo be’n be ti su. Biblu’n se kɛ: “Sa ng’ɔ yo’n, fiɛn kaan sa nunmɛn i wun.” Kpɛkun “ɔ yoman sa ng’ɔ timan su’n le.”—Mmla’n 32:4.

Ɔ ti klolɛ. Biblu’n se kɛ: “Ɲanmiɛn ti klolɛ.” (1 Zan 4:8) Ɲanmiɛn yi i nglo kɛ ɔ klo sran. Sanngɛ sɛ klolɛ’n ti sran’n, nn é sé kɛ yɛle Ɲanmiɛn bɔbɔ. Ɲanmiɛn yo ninnge kwlaa klolɛ su. Kpɛkun e ɲan ninnge kwlaa ng’ɔ yo be’n, be su ye.

Ɲanmiɛn nin sran’m be tra janvuɛ. E Si m’ɔ o ɲanmiɛn su lɔ’n yɛle Ɲanmiɛn. (Matie 6:9) Sɛ e lafi i su’n, e nin i e kwla tra janvuɛ. (Jue Mun 25:14) Asa ekun’n, Ɲanmiɛn bɔbɔ se e kɛ e fa e wun e mɛntɛn i, kpɛkun ‘e fa e su sa’n kwlaa e wlɛ i sa nun, afin e ndɛ lo i.’—1 Piɛli 5:7; Zaki 4:8.

?Ngue yɛ ɔ kle kɛ Ɲanmiɛn Kpli nin Zezi Klisi be timan kun-ɔn?

Nán Zezi yɛ ɔ ti Ɲanmiɛn Kpli’n niɔn. Zezi ti i liɛ ngunmin. Afin i kunngba cɛ yɛ Ɲanmiɛn boli i trele sa-ɔ. I sɔ’n ti’n, Biblu’n flɛ i kɛ Ɲanmiɛn i Wa. (Zan 1:14) Kɛ Zoova yili Zezi’n, ɔ fɛli i dili junman. Yɛle kɛ ɔ sinnin i lika yili like kwlakwla kpan.—Ɲanndra Mun 8:30, 31; Kolɔsufuɛ Mun 1:15, 16.

Zezi w’a seman le kɛ i yɛ ɔ ti Ɲanmiɛn Kpli’n niɔn. Zezi bɔbɔ seli kɛ: “N ti [Ɲanmiɛn] i janunfuɛ. Yɛ i bɔbɔ yɛ ɔ sunmannin min-ɔn.” (Zan 7:29) Cɛn kun’n, kɛ ɔ́ kán ndɛ klé i sɔnnzɔnfuɛ’m be nun kun’n, ɔ flɛli Zoova kɛ “min Si m’ɔ ti amun Si wie’n, ɔ nin min Ɲanmiɛn m’ɔ ti amun Ɲanmiɛn wie’n.” (Zan 20:17) Kɛ Zezi wuli mɔ Ɲanmiɛn cɛnnin i’n, ɔ ɔli ɲanmiɛn su ko trannin Ɲanmiɛn i sa fama su, yɛ Ɲanmiɛn maan ɔ ɲannin ɲrun.—Matie 28:18; Sa Nga Be Yoli’n 2:32, 33.

Zezi Klisi kwla uka e naan y’a fa e wun y’a mantan Ɲanmiɛn

Zezi bali asiɛ’n su wa kɛ ɔ́ kɛ́n i Si i ndɛ klé e. Zoova kannin Zezi i ndɛ seli kɛ: “Min Wa’n yɛ, min awlɛn su ba’n niɔn. Amun tie ndɛ ng’ɔ kan’n.” (Marki 9:7) Zezi si Ɲanmiɛn tra sran kwlakwla. Zezi bɔbɔ seli kɛ: “Sran fi siman Siɛ’n, saan Ba’n ɔ nin sran nga Ba’n kunndɛ kɛ ɔ́ kɛ́n i ndɛ klé i’n.”—Liki 10:22.

Zezi yili Ɲanmiɛn i nzuɛn’m be nglo kpa. Zezi yili Ɲanmiɛn i nzuɛn’m be nglo dan ti’n, ɔ seli kɛ: “Sran ng’ɔ wun min’n, nn w’a wun Siɛ’n wie.” (Zan 14:9) Yɛle kɛ like kwlaa nga Zezi yoli nun’n, ɔ nin ndɛ kwlaa ng’ɔ kannin’n, be yili wafa nga Ɲanmiɛn klo sran’n, i nglo. I sɔ’n ti’n, sran’m be fali be wun be mantannin Ɲanmiɛn. Zezi seli kɛ: “Min yɛ n ti atin’n nin nanwlɛ’n nin nguan’n niɔn. Sran nga w’a sinman min nun’n, ɔ kwlá kɔman Siɛ’n i wun lɔ.” (Zan 14:6) Asa ekun’n, ɔ seli kɛ: “Blɛ wie wá jú’n, blɛ sɔ’n w’a ju bɔbɔ, Siɛ’n i sufuɛ kpa mun bé wá sú i kɛ nga Ɲanmiɛn wawɛ’n kle be’n sa, yɛ bé sú i nanwlɛ nun. Afin Siɛ’n su kunndɛ sran kɛ ngalɛ sa mun naan be su i.” (Zan 4:23) Ndɛ sɔ’n kle kɛ Zoova su kunndɛ be nga be klo kɛ bé sí i su ndɛ nanwlɛ’n. Nanwlɛ, i sɔ’n ti abonuan.