Like ng’ɔ ti e cinnjin tra like kwlaa’n
1. ?Wafa sɛ yɛ Zezi kleli kɛ jasin fɛ’n ti i cinnjin ɔn?
1 Like ng’ɔ yoli Zezi i cinnjin trali like kwlaa’n yɛle jasin fɛ’n i bolɛ. Kɛ ɔ fɛ i Palɛstini mɛn’n i bue kun lele fa ju bue uflɛ su’n, ɔ miɛnnin i ɲin nantili kilo ya kpanngban naan sran kwlaa ng’ɔ kwla bo jasin fɛ’n kle be’n, w’a bo w’a kle be. Like kan nga ɔ ko ɲɛn i naan w’a fɛ i akunndan nin i blɛ i dan lika w’a fa bo jasin fɛ’n yɛ ɔ kunndɛli ɔ. (Mat. 8:20) Lika wie’m be nun sran’m be waan bé trɛ́ i ase naan nán ɔ tu i bo. Afin be waan ɔ yo be tukpacifuɛ’m be juejue. Sanngɛ, ɔ seli be kɛ: “Nyanmiɛn sielɛ’n i ndɛ kanlɛ klɔ uflɛ wie’m be su’n ɔ ti [n] cinnjin, i sɔ’n ti yɛ Nyanmiɛn sunmannin min-ɔn.”—Lik 4:43.
2. ?Ngue ti yɛ jasin fɛ’n bolɛ yoli Zezi i cinnjin kpa sɔ ɔ?
2 ?Ngue ti yɛ jasin fɛ’n yoli Zezi i nanndoliɛ sɔ ɔ? Yɛle kɛ, Zoova i dunman fɛ m’ɔ fata kɛ be bo’n, Zezi ɲrun’n, like uflɛ i cinnjin trɛmɛn i. (Mat. 6:9) Ɔ klo i Si kpa ti’n, ɔ kunndɛli kɛ ɔ́ yó i klun sa naan like kwlaa ng’ɔ seli i kɛ ɔ yo’n yɛ ɔ́ yó ɔ. (Zan 14:31) Asa ekun’n, sran’m be ukalɛ loli i kpa yɛ ɔ tuli i klun niannin be lika.—Mat. 9:36, 37.
3. ?Wafa sɛ yɛ e kwla kle kɛ jasin fɛ’n i bolɛ’n yɛ e fa cici e ti ɔ?
3 Maan e nian Zezi i liɛ’n su: Kɛ ɔ ko yo naan jasin fɛ’n w’a yo e cinnjin w’a tra like kwlaa kɛ Zezi liɛ’n sa’n, nanwlɛ, ɔ timan pɔpɔ e sa nun. Yɛle kɛ, mɛn’n nga e o nun yɛ’n, e ti ɲanlɛ ti kekle kpa, yɛ ninnge nga be timan cinnjin’m be su yɛ mɛn’n fa e ɲin sie ɔ. (Mat. 24:37-39; Lik 21:34) I sɔ’n ti’n, maan e wun ninnge nga be ti kpa’m be wlɛ kpa. Yɛle kɛ maan e fa blɛ e siesie e wun naan y’a bo jasin fɛ’n titi. (Fil. 1:10) Asa, maan e mian e ɲin naan like kan nga e ɲɛn i’n ɔ ju e, yɛ nán maan e ɲin blo mɛn’n nun ninnge’m be kunndɛlɛ su ngboko.—1 Kor. 7:31.
4. ?Ngue ti yɛ bikisa ɔ cinnjin kɛ e fa e ɲin sie like ng’ɔ ti nanndoliɛ kpafuɛ’n i su ɔ?
4 Be bu ɲanndra kun kɛ: Klɔ’n su ra ɔ, ɔ waan plɔ waka. Yɛle kɛ, sɛ akunndanfuɛ’n wun kɛ ɲanmiɛn’n w’a dun tuun naan nzue’n su wa tɔ kekle kpa’n, i awlofuɛ’m be sasalɛ yɛ i mantanfuɛ’m be jɔ bolɛ yɛ ɔ ti i cinnjin ɔn. Nán ninnge ngbɛnngbɛn’m be su yɛ ɔ fɛ i ɲin sie ɔ. I kunngba’n yɛle blɛ nga e o nun yɛ’n. Ɔ ka kaan, Armagedɔn alɛ’n kpúke. (Sof. 1:14-16; 1 Kor. 7:29) Ɔ maan, asɔnun’n nun o, jasin fɛ’n bowlɛ lika’n nun o, ɔ fata kɛ e nian e wun su nin ninnge mɔ e kle’n su kpa kɛ ɔ ko yo naan y’a de e bɔbɔ nin be nga be ti e ndɛ’n. (1 Tim. 4:16) I yo, sɛ e kunndɛ kɛ é fíte nun’n, ɔ fata kɛ jasin fɛ’n bolɛ’n yo e cinnjin tra like kwlaa!