Awie’n w’a blo, w’a ju i kpɛlɛ
1. ?Junman cinnjin kpa benin yɛ be o i dilɛ su ɔ?
1 Cɛn kun kɛ Zezi boli jasin kleli Samari bla kun wieli’n, ɔ seli i sɔnnzɔnfuɛ’m be kɛ: “An nian kɛ awie’n w’a blo bɔ w’a ju i kpɛlɛ-ɔ.” (Zan 4:35, 36) Be nga be fa Ɲanmiɛn ndɛ’n su’n, sɛ be ti awie’n nn é sé kɛ i nun nga Zezi wo asiɛ’n su wa’n, awie sɔ’n bloli yɛ be o i kpɛlɛ’n su. Yɛ Zezi wunnin kɛ junman sɔ’n trɛ́ lele jú asiɛ’n i lika kwlakwla. Zezi wo ɲanmiɛn su lɔ siɛn’n. Sanngɛ i sa te o junman sɔ’n nun kpa liɛ su. (Mat. 28:19, 20) ?Ngue yɛ ɔ kle kɛ, kɛ junman’n mántan i awieliɛ’n, ɔ́ kpí ɔ?
2. ?Ngue yɛ ɔ kle kɛ mɛn wunmuan’n nun’n, jasin fɛ’n bolɛ junman’n su kpi kpa ɔ?
2 Mɛn wunmuan’n nun: Lele nin kɛ junman dilɛ afuɛ 2009 wíe’n, sran 216.964 be wa ukali jasin bofuɛ’m be su. Nvlenvle nga lɔ awa’n tanndan jasin bolɛ’n i ɲrun’n, sran 2.355 be wa ukali lɔ jasin bofuɛ’m be su. Mɛn wunmuan’n nun’n, be nga be suan Biblu’n nun like anglo kwlaa nun’n, be ti sran kɔe 7.619.000. Sran sɔ’m be sɔnnin tra jasin bofuɛ mun. Kɛ e fa Biblu’n nun like suanfuɛ sɔ’m be nuan e fa sunnzun afuɛ 2008 nun liɛ’n, be nga be ukali su’n be ti sran akpiakpi ya nnun. Kɛ junman’n trɛ́ ndɛndɛ m’ɔ́ sá nvlenvle kaka’n, nn be kusu bé klɛ́ anuannzɛ’n i fluwa kɛ ɔ blɛ be ngaliɛ difuɛ. Nvlenvle kpanngban nun’n, jasin mɔ be bo be kle aofuɛ’m be klɔ aniɛn’n nun kusu’n, ɔ ba nvlɛ kpa. Kɛ nga e fa wun i lɛ’n, junman’n i dilɛ blɛ kasiɛn nga nun’n, Zoova su yo naan ɔ wɔ i ɲrun ndɛndɛ kpa. (Eza. 60:22) ?Yɛ amun “fie” liɛ’n nin? ?Amun bu i kɛ i su ninnge’m b’a blo naan b’a ju kpɛlɛ?
3. ?Wafa sɛ yɛ aniaan wie’m be kwla bu be jasin bowlɛ nun junman liɛ’n niɔn?
3 E jasin bowlɛ nun: Sran wie’m be kwla se kɛ be jasin bowlɛ nun junman’n baman nvlɛ kpa. Ɔ ti su kɛ lika wie’m be nun’n, sran’m be ndɛ kanlɛ yo ya. Annzɛ kusu be tieman ndɛ’n i kɛ laa’n sa. I ti yɛ aniaan wie’m be kwla kpɛ i kpo be se kɛ lika sɔ’m be nun’n, b’a bo jasin fɛ’n wie pɛ, naan be nga be ko sɔ nun’n, b’a sɔ nun w’a wie. Ɔ maan siɛn’n, junman ng’ɔ nin be ka’n yɛle sran kunngunngun nga be ko fa ndɛ’n su be sin atin kpɛlɛ. ?I su ɔ?
4. ?Wafa sɛ yɛ ɔ fata kɛ e wun kɛ junman’n ti ɔ? ?Yɛ, ngue ti ɔ?
4 Kɛ fie’n su ninnge’m be yo ye’n, junman’n kpi kpa lele be wie i di. Zezi seli kɛ: “Fie’n w’a yo ye, sanngɛ i su junman difuɛ’m b’a sɔn-man. I sɔ’n ti, an se fie i fuɛ’n maan ɔ fa sran wie mun ekun maan be ko di i junman’n.” (Mat. 9:37, 38) Ndɛ sɔ’n kle kɛ junman’n w’a jran kpa. Zoova yɛ ɔ ti fie’n i fuɛ’n niɔn. I yɛ ɔ si blɛ nin lika nga mɔ fie’n i su ninnge’m b’a yo ye’n niɔn. (Zan 6:44; 1 Kor. 3:6-8) ?E junman liɛ’n yɛle benin? Biblu’n tɛ su kɛ: “I sɔ’n ti’n, lua ɔ ninnge mun nglɛmun nun lele fa ju nnɔsua nun, nán de wunmiɛn.” (Aku. 11:4-6) I yo, kɛ fie’n yo ye mɔ junman’n kpi kpa’n, nán blɛ sɔ nun yɛ ɔ fata kɛ be kunndɛ wunmiɛn lolɛ ɔ!
5. ?Lika nga m’ɔ yo e kɛ i nunfuɛ’m be faman e ndɛ’n su’n, ngue ti yɛ ɔ fata kɛ e bo lɔ jasin fɛ’n i juejue su titi ɔ?
5 Nán e sa kan ase: Wienun ɔn, e jasin bowlɛ liɛ’n, y’a bo nun jasin y’a wɔ y’a ba, kpɛ ko yo wie. Sanngɛ ɔ yo e kɛ i nunfuɛ’m be su ti kekle. Ɔ nin i sɔ’n ngba’n, sɛ e yaciman jasin fɛ’n i bolɛ juejue su’n, naan e wla fiman su kɛ e ɲin w’a ka koko’n, like kun ti ɔ. (2 Tim. 4:2) Yɛle kɛ, sa kekleekle’m be tɔ mɛn’n su. Kɛ ɔ yo sɔ’n, sran’m be lo, yɛ be tran be bu wafa nga be ko yo naan cɛn wie b’a ɲan be ti’n, i akunndan kpa siɛn’n. Ba’m be kusu, kɛ bé yó kpɛnngbɛn bé kɔ́’n, like nga bé yó naan b’a ɲan be ti siewlɛ’n, ɔ kwla yo be cinnjin. Wie’m be kusu, kɛ be wun kɛ e yaciman jasin i bolɛ mɔ e bo e kle be cɛn kwlaa’n, be kwla kaci. I yo, ndɛ yɛ ɔ o lɛ. Be nga i klikli nun b’a tieman e ndɛ’n, kɛ ɔ́ kɔ́ i ɲrun’n, be kwla sɔ ndɛ’n nun klanman. Be nga bɔbɔ mɔ be ɲinfu be kpalo e ndɛ’n, ɔ fata kɛ e bo ndɛ’n i jɔ e kle be wie.—Eze. 2:4, 5; 3:19.
6. ?Sɛ e jasin bowlɛ’n i nunfuɛ’m be ndɛ kanlɛ yo ya’n, ngue yɛ é yó naan y’a kpɔnzɔman ɔn?
6 ?Sɛ e jasin bowlɛ’n i nunfuɛ’m be ndɛ kanlɛ yo ya’n, ngue yɛ é yó naan y’a kpɔnzɔman ɔn? Wienun ɔn, e kwla bo jasin fɛ’n wafa uflɛ e uka awloawlo’m be nun jasin bolɛ’n i su. I wie yɛle kɛ aata diwlɛ mun nin telefɔnu nun jasin bolɛ’n sa. Annzɛ e kwla fa wafa nga e bo jasin’n e kle sran mun’n, i wun ajalɛ uflɛ naan e ndɛ’n i tielɛ w’a yo fɛ kpa ekun. Asa kusu’n, e kwla kaci e jasin bolɛ blɛ’n, e sie i nnɔsua nun. Annzɛ e kwla sie i blɛ nga é nían mɔ e kwla to sran’m be awlo’n. Wie liɛ kusu’n, e kwla suan aniɛn uflɛ naan y’a kwla bo jasin’n y’a kle sran kaka y’a tra laa’n. E kwla kaci atin bofuɛ e uka e Ɲanmiɛn junman dilɛ’n su. Annzɛ e kwla ko tran lika nga fie’n i nun junman difuɛ’m b’a sɔman lɔ’n, i nun. Sɛ e junman cinnjin sɔ m’ɔ ti kɛ awie kpɛlɛ sa’n, i wun akunndan kpa o e klun’n, é yó like kwlaa nga e kwla yo naan y’a fa e wun y’a wla nun kpa’n.
7. ?É dí sran’m be nuan yiayialɛ junman’n lele é jú nin?
7 Kɛ fie’n i su ninnge’m be blo’n, be tilɛ annzɛ be kpɛlɛ blɛ’n w’a sɔnman. I sɔ’n ti’n, kɛ fie difuɛ’m bé dí junman blɛ sɔ nun’n, be cuɛncuɛnman be ja ase. Be nga be fa Ɲanmiɛn ndɛ’n su’n, mɔ e fali be e sunnzunnin awie’n, be kpɛlɛ nun’n, kɛ ɔ ti sɔ wie ɔ. ?É dí junman sɔ’n lele é jú blɛ benin nun? É dí junman sɔ’n mɛn’n “i bue nuan’n” blɛ nga nun lele é fá jú mɛn’n i ‘awieliɛ.’ (Mat. 24:14; 2 Tim. 3:1) E klo kɛ é gúagúa junman nga be mannin e’n i bo kɛ sran ng’ɔ ti Zoova i Junman Difuɛ’m be ti’n, ɔ fa yoli’n sa. (Zan 4:34; 17:4) I sɔ ti’n, maan e junman’n i wun akunndan kpa tran e klun naan e di i juejue su aklunjuɛ nun lele e ju i awieliɛ. (Mat. 24:13) Awie’n w’a blo. I kpɛlɛ junman’n nin a wieman!
[Ndɛ kwle, bue 2]
Kɛ fie’n su ninnge’m be yo ye’n, junman’n kpi kpa lele be wie i di