?A yoli titi atin bofuɛ laa?
1. ?Cenjele junman benin yɛ aniaan kpanngban be dili ɔ? ?Sanngɛ sa wie’m be ti’n, ngue yɛ be nun wie’m be yoli ɔ?
1 Laa’n, aniaan sunman be yoli atin bofuɛ. Be fa be wun wlali “jasin fɛ’n i bolɛ nin i klelɛ” nun kpa. (Sa Nga be Yoli’n 5:42) Sanngɛ, ndɛ wie’m be ti’n, be nun wie’m be wa yacili atin bolɛ junman’n i dilɛ. ?Sɛ amun dili wie laa’n, amun a bu i akunndan nian naan sɛ amun kwla di i ekun’n?
2. ?Ngue ti yɛ ɔ fata kɛ be nga be dili atin bolɛ junman laa’n, be nian sɛ be kwla di i ekun ɔn?
2 E su sa’m be kacikaci: Atrɛkpa’n, ndɛ nga ti yɛ amun yacili junman’n i dilɛ’n, ɔ nunman lɛ kun. I wie yɛle kɛ laa’n, ɔ fata kɛ anglo kwlaa’n, atin bofuɛ’m be bo jasin fɛ’n dɔ 90. ?Yɛ siɛn’n mɔ b’a ti dɔ’n su’n, mɔ w’a yo dɔ 70 niɔn, amun di junman sɔ’n ekun, ɔ yoman ye? Annzɛ ɔ kwla yo junman annzɛ awlobo ndɛ ti yɛ amun jrannin atin bolɛ junman’n niɔn. Wienun ɔn, junman’n w’a sɔnman amun su kun, annzɛ siɛn’n sran uka amun. Annzɛ kusu’n, amun awlobo ndɛ’n timan kekle kɛ laa’n sa. Aunkpinndiɛ ndɛ ti’n, aniaan bla kun yacili atin bolɛ junman’n i dilɛ. Sanngɛ kɛ ɔ ɲannin afuɛ 89, ɔ fɛli i wun wlali nun ekun. Afin lele mɔ afuɛ nuan kun fá yía’n, b’a lɛmɛn i dɔɔtrɔ. Ɔ maan, ɔ wunnin i kɛ wunmiɛn kan te o lɛ naan ɔ kwla di atin bolɛ junman’n ekun!
3. ?Wafa sɛ yɛ awlobo nunfuɛ’m be kwla ukauka be wun naan be nun kun w’a kaci atin bofuɛ ɔ?
3 Wienun kusu ɔ, amun a diman junman sɔ’n wie laa, sanngɛ amun awlobofuɛ kun yɛ ɔ dili ɔ. Ɔ yacili i dilɛ naan w’a nian awlobofuɛ kun i lika. Ɔ kwla yo kɛ amun si annzɛ amun nin mɔ w’a yo oke’n sa. (1 Tim. 5:4, 8) Sɛ ɔ ti sɔ’n, sɛ amun bɔbɔ o, sɛ amun awlobo nun sran uflɛ o, amun kwla bu i bo suanlɛ akunndan. Awlobo nunfuɛ’m be kwla yia be koko su yalɛ bɔbɔ. (Nya. 15:22) Kɛ awlobo kun nunfuɛ’m be ukauka be wun ɔ maan be nun kun kaci atin bofuɛ’n, ɔ ti kɛ nn be ngba yɛ be sa o junman sɔ’n nun ɔn.
4. ?Yɛ sɛ dɔ ng’ɔ o yɛ’n su’n, amun kwlá kaciman atin bofuɛ kɛ laa’n sa nin?
4 Sɛ ndɛ wie ti’n, amun kwlá diman atin bolɛ junman’n ekun’n, nán amun sa sin bubu amun. I dilɛ bɔbɔ mɔ amun kunndɛ’n, ɔ yo Zoova fɛ dan. (2 Kor. 8:12) I nun nga amun ti atin bofuɛ’n, junman’n i wun ngwlɛlɛ nga amun sili i’n, maan amun fa uka amun wun jasin fɛ’n bolɛ nun. Asa’n, junman sɔ mɔ amun klo kɛ amún dí i ekun’n, an kɛn i ndɛ kle Zoova. Kpɛkun nán amun sisi amun bo. Wafa nga amun kwla siesie ninnge nga amun yo’n, be uflɛ naan amun a ɲan blɛ’n, maan amun ɲin tran su. (1 Zan 5:14) Atrɛkpa’n, sɛ ɔ yo’n, Zoova wá mán amun atin dan kpa, ‘ɔ maan amún kwlá dí junman kpa.’ Ɔ maan, i nun nga amun dili titi atin bolɛ junman’n, fɛ nga amun dili’n, amún dí i ekun!—1 Kor. 16:9.