Maan e tra e awlɛn jasin fɛ’n bolɛ’n nun

1. ?Wafa sɛ yɛ Zoova kle kɛ ɔ trɛ i awlɛn klɔ sran’m be wun ɔn?

¹ Ɲanmiɛn trɛ i awlɛn klɔ sran’m be wun. (Tul. 34:6; Jue. 106:41-45; 2 Piɛ. 3:9) I awlɛn tralɛ’n i dan kpafuɛ’n i ɲin fite asiɛ wunmuan’n su Sielɛ blɛ jasin fɛ’n bolɛ’n nun. Zoova nin klɔ sran’m be dili junman i afuɛ ko ju 2.000 yɛ. Kpɛkun andɛ nin andɛ sran kwlaa nga ɔ klo kɛ ɔ́ bɛ́ i sin’n, ɔ te sɔ i nun. (Zan 6:44) ?Wafa sɛ yɛ e jasin fɛ’n bolɛ’n kwla kle kɛ Zoova trɛ i awlɛn ɔn?

2. ?Kɛ é bó jasin fɛ’n, wafa sɛ yɛ e kwla kle kɛ e tra e awlɛn ɔn?

² Awloawlo’m be nun jasin fɛ’n bolɛ: Kɛ e “yaci-man” jasin fɛ’n i bolɛ lika nga sran’m be nin a sɔman nanwlɛ ndɛ’n nun’n, e kle kɛ e sɔnnzɔn Zoova i awlɛn tralɛ’n. (Yol. 5:42) Sɛ sran’m be sɔman jasin fɛ’n nga e bo’n nun’n, annzɛ be yo e finfin annzɛ be tanndan e ɲrun’n, e tra e awlɛn. (Mar. 13:12, 13) Asa ekun, kannzɛ bɔbɔ sran nga be klo nanwlɛ ndɛ’n, be ɲanlɛ timan pɔpɔ’n, sanngɛ kɛ e mian e ɲin e gua nanwlɛ ndɛ nga e luali’n i bo nzue’n, e kle kɛ e tra e awlɛn.

3. ?Kɛ é sá e sin é kó nían sran’m be osu ekun’n, mɔ é klé be Biblu’n nun like’n, ngue ti yɛ ɔ nin i fata kɛ e tra e awlɛn ɔn?

³ Biblu’n nun like suanfuɛ mun: Awlɛn tralɛ yɛ be fa ta waka ɔ. E kwla niɛn i lika e guɛ i bo nzue, sanngɛ e kwlá miɛnmɛn i kɛ ɔ ɲin kekle nun. (Zak 5:7) I kunngba’n niɔn, Ɲanmiɛn ninnge’m be nun’n, be ɲin blɛblɛblɛ. (Mar. 4:28) Be nga e nin be e suan Biblu’n nun like’n, ninnge nga be lafi su laa mɔ be nin Ɲanmiɛn Ndɛ’n be kɔman likawlɛ’n, be ase wlalɛ’n kwla yo kekle man be. Ɔ nin i fataman kɛ e mian be fii kɛ be wɔ be ɲrun ndɛndɛ naan be kaci be nzuɛn’n. Ɔ nin i fata kɛ e tra e awlɛn naan y’a man Ɲanmiɛn wawɛ’n i blɛ naan w’a di e like suanfuɛ’m be awlɛn’n nun junman.—1 Kor. 3:6, 7.

4. ?Wafa sɛ yɛ awlɛn tralɛ’n kwla uka e naan y’a bo jasin y’a kle e osufuɛ nga be suman Ɲanmiɛn’n niɔn?

⁴ E osufuɛ nga be suman Ɲanmiɛn’n: Kannzɛ bɔbɔ e klo kpa kɛ e osufuɛ sɔ’m be suan nanwlɛ ndɛ’n, sanngɛ ɔ nin i fata kɛ e minndɛ blɛ nga ɔ ti su’n naan y’a bo jasin fɛ’n y’a kle be. Maan e nian e wun naan y’a kanman Ɲanmiɛn Ndɛ’n i ngboko y’a kleman be. (Aku. 3:1, 7) Like nga e kwla yo’n, yɛle kɛ maan e aeliɛ’n kle kɛ nanwlɛ’n w’a kaci e nzuɛn’n, yɛ maan e bu sa ti yɛ e wla o Krist su’n i akunndan sie naan sɛ be usa e i su sa’n y’a kwla tɛ su amanniɛn su nin aɲinyiɛ su. (1 Piɛ. 3:1, 15) Nanwlɛ, jasin nga bé bó mɔ be tra be awlɛn’n, ɔ yo e Si Ɲanmiɛn m’ɔ o nglo lɔ’n i fɛ.