Zoova su kle e junman sɔ’n i dilɛ’n i su like
1. ?Kɛ Zoova man klɔ sran’m be junman’n, ngue like yɛ ɔ yo uka su ɔ?
1 Kɛ Zoova man klɔ sran’m be junman’n, like nga ɔ ko uka be naan b’a di junman sɔ’n, ɔ fa nannan su wie. I wie yɛle kɛ, i nun mɔ Zoova seli Nowe kɛ ɔ bobo mmeli’n m’ɔ nin a yoman wie le’n, ɔ kleli i wafa nga ɔ́ dí junman sɔ’n, ɔ fa ukali su. (Bob. 6:14-16) Kɛ Zoova seli bua tafuɛ Moizi kɛ ɔ ko wun Izraɛli kpɛnngbɛn mun nin Faraɔn be wun’n, ɔ wlɛli i fanngan kɛ: “Kɛ á íjɔ’n, ń úka wɔ, ń klé wɔ ndɛ nga ɔ fata kɛ a kan’n.” (Tul. 4:12) Kɛ e kusu é bó jasin fɛ’n, Zoova yaciman e ngbɛn. Ɔ sin Ɲanmiɛn junman dilɛ suklu’n ɔ nin Junman dilɛ aɲia’n be lika ɔ kle e junman sɔ’n i dilɛ’n i su like. ?Wafa sɛ yɛ like klelɛ sɔ’n kwla uka e ɔ?
2. ?Wafa sɛ yɛ Ɲanmiɛn junman dilɛ suklu’n kwla yo e ye kpa ɔ?
2 Ɲanmiɛn junman dilɛ suklu: Maan e nian ninnge nga be siesieli’n nun kwlaa naan y’a ɔ aɲia’m be bo. I liɛ’n kɛ é fá e ɲin é síe wafa nga suklu mma’m bé dí be junman’n su, é wún wafa nga é kwlá klé like kpa trá laa’n. (Nya. 27:17) Maan e fa e fluwa École du ministère e wɔ aɲia’n bo naan e fa di junman. Kɛ suklu ba kun ko wie i junman’n di’n, wafa nga suklu sunianfuɛ’n fá e ɲin síe i junman nga suklu ba’n dili’n su, ajalɛ nga e kunndɛ kɛ é nían su’n, maan e klɛ i fluwa’n nun. Sɛ e waan suklu sɔ’n yo e ye kpa’n, ɔ fata kɛ e di wie. ?Y’a klɛ e dunman? Sɛ be man e junman’n, maan e wla e wun ase kpa e siesie e wun yɛ e nanti afɔtuɛ nga be man e’n su. Kɛ é bó jasin fɛ’n, like nga e suannin’n, maan e fa di junman.
3. ?Ngue yɛ ɔ́ úka e naan Junman dilɛ aɲia’n w’a yo e ye kpa ɔ?
3 Junman dilɛ aɲia: Sɛ e dun mmua e siesie e wun naan y’a wɔ aɲia sɔ’n bo’n, yɛ sɛ i bo lɔ e tɛ kosan’m be su’n, e wla su fiman ndɛ nga be kɛn i lɔ’n be su. Sɛ e tɛ kosan’m be su kpe kan’n, sran uflɛ kwlá íjɔ wie. Ninnge’m be nglo yilɛ kwlaa nin afɔtuɛ kwlaa nga be man mɔ be kwla uka e naan e jasin fɛ’n bolɛ’n w’a ba nvlɛ’n, maan e fa e ɲin e sie be su kpa. Ɲanmiɛn Sielɛ Blɛ junman fluwa nga be kwla uka e jasin fɛ’n bolɛ nun’n, maan e fa be e sie naan y’a nian be nun.
4. ?Ngue ti yɛ ɔ fata kɛ e nian junman dilɛ’n i su like nga Zoova kle e’n su ɔ?
4 Kɛ junman nga be fa mannin Nowe nin Moizi sa’n, e mɛn wunmuan’n nun jasin fɛ’n bolɛ junman’n timan pɔpɔ. (Mat. 24:14) Sɛ e lafi e Like klefuɛ dan Zoova i su’n, yɛ sɛ e nian junman dilɛ’n i su like nga ɔ kle e’n su’n, e junman kwlá bá nvlɛ.—Eza. 30:20.