Kosan’m be su tɛlɛ

◼ ?Sɛ e jran sran kun i anuan’n nun lɛ e nin i e suan Biblu’n nun like’n, e nin i e kwla srɛ Ɲanmiɛn lɛ?

Kɛ e srɛ Ɲanmiɛn e fa fiti Biblu’n nun like suanlɛ su’n, kpɔkun e fa guɛ i bo’n, i su mmlusuɛ’n sɔnnin. E Ɲanmiɛn srɛlɛ nun’n, e se Zoova kɛ ɔ fɛ i wawɛ’n yra e nin sran’n e like suanlɛ’n su. (Lik 11:13) Asa ekun’n, Ɲanmiɛn srɛlɛ’n yo maan e like suanfuɛ’n wun i wlɛ kɛ i Biblu’n nun like suanlɛ’n ti like cinnjin kpa, kpɛkun ɔ kle i wafa nga i bɔbɔ’n ɔ kwla srɛ Ɲanmiɛn’n wie’n. (Lik 6:40) Ɔ maan, sɛ e nin sran kun e suan like’n, ɔ ti kpa kɛ e nin i e srɛ Ɲanmiɛn likawlɛ. I sɔ yolɛ nun’n, nán maan e sisi e bo. Sanngɛ nán lika kwlaa yɛ ɔ nin Ɲanmiɛn srɛlɛ’n fata ɔ. I lɛ nun’n, ɔ fata kɛ like klefuɛ’n fa ngwlɛlɛ nian naan sɛ anuan’n nun lɛ Ɲanmiɛn srɛlɛ’n nin i fata annzɛ ɔ nin i fataman o.

Like cinnjin kun nga ɔ fata kɛ e fa e ɲin sie su’n, yɛle lika nga e suan like lɛ’n. Sɛ like klefuɛ’n nían naan be o aamiɛn’n, naan like suanlɛ’n w’a taka’n, ɔ nin i fata kɛ, ɔ srɛ Ɲanmiɛn ɔ fa fiti Biblu’n nun like suanlɛ’n su, kpɛkun ɔ fa guɛ i bo. Sanngɛ wie liɛ’n, i sɔ yolɛ’n kwla yo naan sran’m b’a nian e annzɛ ɔ kwla yo like suanfuɛ’n i kɛnsrɛn. Sɛ ɔ ti sɔ’n maan e minndɛ ka naan sɛ e ɲan lika nga e kwla tran aamiɛn e suan Biblu’n nun like’n, nn y’a srɛ Ɲanmiɛn. I kwlaa yoli o, ɔ fata kɛ e bu akunndan e nian naan sɛ lika nga e tran nun lɛ e suan Biblu’n nun like’n, ɔ nin Ɲanmiɛn srɛlɛ’n fata annzɛ ɔ fataman o.—An nian afuɛ 2005, Marsi nun Ɲanmiɛn Sielɛ Blɛ junman fluwa’n, i bue 4 nun.