Maan e suan like kwlaa nga e kwla suɛn i Zoova sa nun’n

1. ?Wafa sɛ yɛ Zoova bu like silɛ’n niɔn?

¹ Zoova yɛ ɔ ti ‘Sran ng’ɔ kle e like’n’ niɔn. Ɔ kunndɛ kɛ e si ninnge kpanngban. (Eza. 30:20) Kɛ ɔ yili Zezi m’ɔ ti i Wa kpɛn’n, yɛ ɔ boli like klelɛ bo ɔ. (Zan 8:28) Kɛ Adam yoli ɲin kekle’n bɔbɔ’n, Zoova w’a yaciman like klelɛ. Klɔ sran mɔ fɔ o be nun’n, ɔ te kle be like klolɛ su.—Eza. 48:17, 18; 2 Tim. 3:14, 15.

2. ?Ngue yɛ Zoova su yo i andɛ ɔ?

² Wafa nga andɛ Zoova su yo naan be kle sran’m be like mɛn wunmuan’n nun’n, anwlanmannun’n be nin a yomɛn i sɔ le. Kɛ nga Ɲanmiɛn nuan ijɔfuɛ Ezai fa kannin’n sa’n, sɛ é kwlá sé’n, asiɛ’n su sran kpanngban kpa be su tu sa kpuu bé kɔ́ ‘oka nga Zoova i sua’n kplan su’n i su lɔ.’ (Eza. 2:2) ?Ngue ti yɛ ɔ fata kɛ e wɔ Zoova i oka’n su lɔ ɔ? Kɛ ɔ ko yo naan Zoova w’a kle e i atin mun’n ti ɔ! (Eza. 2:3) Afuɛ nga be flɛ i 2010 nun’n, Zoova i Lalofuɛ’m be fali dɔ akpi ngbinngbin 1 nin sin tra su be fa boli jasin fɛ’n, yɛ be fa kleli sran’m be Biblu’n nun like. Asa ekun le mɔcuɛ kwlaa nun’n, asiɛ wunmuan’n su’n, e kɔ e asɔnun 105.000 tra su’n be nun, e ko tie Ɲanmiɛn ndɛ’n. Kpɛkun sran kpa nanwlɛfuɛ’n m’ɔ si ngwlɛlɛ’n yi Biblu’n i akua mun aniɛn wafawafa lele 500 tra su be nun ɔ fa kle e like.

3. ?Wafa sɛ yɛ amun bɔbɔ, amun ɲannin like nga Zoova kle e’n, i su ye ɔ?

³ E ɲan su ye kpa: Nanwlɛ, e ɲannin like nga Zoova kle e’n, i su ye kpa! Yɛle kɛ be kleli e kɛ Ɲanmiɛn le dunman kun naan ɔ nian e lika. (Jue. 83:18, NW; 1 Piɛ. 5:6, 7) Asa kusu kosan cinnjin wie mɔ sran’m be fa usa be wun’n, e si be su tɛlɛ’n. Be nun wie mun yɛ: ?Ngue ti yɛ e wun ɲrɛnnɛn mɔ e wu’n niɔn? ?Wafa sɛ yɛ ń kwlá dí aklunjuɛ kpafuɛ’n niɔn? ?Ngue ti yɛ e o asiɛ’n su ɔ? Asa ekun, Zoova kle e wafa ng’ɔ fata kɛ e nanti’n naan ‘like nga e yo’n w’a yo ye’n.’—Zoz. 1:8.

4. ?Suklu benin mun yɛ be fa kle Ɲanmiɛn i sufuɛ’m be like wie ɔ? ?Yɛ like kwlaa nga e kwla suɛn i Zoova sa nun’n, ngue ti yɛ ɔ fata kɛ e suan ɔn?

⁴ Sanngɛ nɛ́n i ngba ɔ. Zoova kpɛli suklu wie’m be ba naan ɔ́ fá úka i sufuɛ kpanngban naan b’a kwla di i junman’n kpa b’a tra laa’n. Fluwa nga i bue 4 lele 6 nun’n, be boli suklu sɔ’m be su. ?Kannzɛ sa wie ti’n, e kwla diman suklu sɔ’m be wie’n, sanngɛ ninnge nga e kwla yo e kle kɛ e si like nga Zoova kle e’n i su ye’n, yɛ e yo be ɔ? Kpɛ sunman, gbanflɛn nin talua’m be suklu klefuɛ’m be jran be su kɛ be di suklu be ɔ mmua. ?Sanngɛ, e liɛ’n, Ɲanmiɛn junman’n i dilɛ’n ɔ nin like nga Ɲanmiɛn kle’n m’ɔ fata kɛ ɔ yo be cinnjin tra like kwlaa’n, yɛ e wla be fanngan kɛ be fa sie be ɲrun ɔn? Sɛ e suan like kwlaa nga e kwla suɛn i Zoova sa nun’n ikisa’n, é dí aklunjuɛ kpɛkun é kwlá ɲán anannganman nguan.—Jue. 119:105; Zan 17:3.

Kannganlɛ nin like klɛlɛ suklu

• Like nga ti yɛ be kpɛli i ba’n: Be fa kle sran’m be kannganlɛ nin like klɛlɛ naan be bɔbɔ b’a kwla suan Biblu’n nun like naan b’a kwla kle sran uflɛ like.

• Blɛ nga ɔ di’n: Sɛ asɔnun’n nun sran wie’m be te le kannganlɛ’n ɔ nin like klɛlɛ’n be suanlɛ’n i awuliɛ’n, nn be te yo suklu sɔ’n.

• Lika nga be yo i’n: Ɲanmiɛn Sielɛ sua’n nun lɔ.

• Be nga be kwla di suklu’n wie’n: Jasin bofuɛ nin Biblu’n nun like suanfuɛ kwlaa.

• Wafa nga be klɛ be dunman’n: Asɔnun kpɛnngbɛn’m be nian, sɛ ɔ nin i fata kɛ be taka suklu sɔ’n be asɔnun’n nun’n, be wla be kwlaa nga be kunndɛ kɛ bé dí suklu’n wie’n be fanngan kɛ be trɛn i bo.

Ɲanmiɛn junman dilɛ suklu

• Like nga ti yɛ be kpɛli i ba’n: Suklu sɔ’n uka jasin bofuɛ mun naan b’a si jasin fɛ’n bo naan b’a kwla si sran’m be like kle.

• ?Be di suklu sɔ’n afuɛ nɲɛ?: Ɔ leman kpɛ bo.

• Lika nga be yo i’n: Ɲanmiɛn Sielɛ sua’n nun lɔ.

• Be nga be kwla di suklu’n wie’n: Jasin bofuɛ nin Biblu’n nun like suanfuɛ kwlaa nga be kɔ aɲia’m be bo titi’n mɔ be mɛn dilɛ’n nun’n, be nanti Ɲanmiɛn mmla’m be su’n.

• Wafa nga be klɛ be dunman’n: Be nga be kunndɛ kɛ bé dí suklu’n wie’n, be bo su kle Ɲanmiɛn junman dilɛ suklu’n sunianfuɛ’n.

Aniɛn uflɛ suanlɛ suklu

• Like nga ti yɛ be kpɛli i ba’n: Ɔ uka jasin bofuɛ mun naan b’a suan aniɛn uflɛ’n naan b’a kwla bo jasin fɛ’n aniɛn sɔ’n nun.

• Blɛ nga ɔ di’n: Anglo nnan annzɛ nnun. Fue cɛn nglɛmun yɛ be tɛ i yo ɔ, kpɛkun ɔ di dɔ kun annzɛ nɲɔn.

• Lika nga be yo i’n: Ɲanmiɛn Sielɛ sua’n nun lɔ.

• Be nga be kwla di suklu’n wie’n: Jasin bofuɛ nga be nzuɛn’n ti kpa’n, mɔ be kunndɛ kɛ bé bó jasin fɛ’n aniɛn uflɛ nun’n.

• Wafa nga be klɛ be dunman’n: Betɛli’n yɛ ɔ nian naan sɛ ɔ nin i fata kɛ be siesie i sɔ suklu’n nin o.

Ɲanmiɛn Sielɛ sua’m be kplanlɛ

• Like nga ti yɛ be kpɛli i ba’n: Ɔ ti aɲia sua’m be kplanlɛ nin be ye siesielɛ junman. Nán suklu jrɛiin sa ɔ. Sanngɛ ɔ ti be kwlaa nga be kunndɛ kɛ bé fá be wun wlá junman sɔ’n i dilɛ nun’n, be junman klelɛ naan b’a kwla suan sua kplanlɛ junman’n i bo.

• Blɛ nga ɔ di’n: Ɔ fin aniaan nga be su kle be like’n.

• Lika nga be yo i’n: Lika nga be siesie kɛ bé kplán aɲia sua mun lɔ’n. Sɛ sanvuɛsa wie ti’n, aniaan wie’m be sua’n bubuli’n annzɛ Ɲanmiɛn sielɛ sua wie’m be sacili’n, be kwla se aniaan sɔ’m be kɛ be ko uka be.

• Be nga be kwla di wie’n: Aniaan bian nin aniaan bla nga b’a yo be batɛmu’n mɔ be nzuɛn’n ti kpa’n. Ɔ timan cinnjin kɛ be si sua kplanlɛ’n i wun ninnge wie’m be yo ka.

• Wafa nga be klɛ be dunman’n: Asɔnun kpɛnngbɛn’m be fluwa Construction des Salles du Royaume — Questionnaire pour les volontaires (S-82) man be naan be klɛ su.

Atin bofuɛ’m be suklu

• Like nga ti yɛ be kpɛli i ba’n: Suklu sɔ’n uka titi atin bofuɛ mun naan ‘junman nga be fa wlali be sa nun’n, b’a kwla guɛguɛ i bo.’—2 Tim. 4:5.

• Blɛ nga ɔ di’n: Le mɔcuɛ nɲɔn.

• Lika nga be yo i’n: Betɛli’n yɛ ɔ kle lika’n niɔn. Ɲanmiɛn Sielɛ sua kun nun yɛ be yo i ɔ.

• Be nga be kwla di wie’n: Be nga be ti titi atin bofuɛ w’a di afuɛ kun annzɛ afuɛ kun tra su’n.

• Wafa nga be klɛ be dunman’n: Be nga be kwla di suklu sɔ’n, akpasua sunianfuɛ’n klɛ be fluwa bo su kle be.

Betɛli lɔ junman difuɛ uflɛuflɛ’m be suklu

• Like nga ti yɛ be kpɛli i ba’n: Suklu sɔ mɔ be yo i Betɛli lɔ’n, ɔ uka be nga b’a ba uflɛuflɛ naan be sa w’a tɔ Betɛli lɔ junman dilɛ’n nun.

• Blɛ nga ɔ di’n: Le mɔcuɛ kwlakwla ɔ di dɔ kun, i sɔ lele anglo nnan.

• Lika nga be yo i’n: Betɛli lɔ.

• Be nga be kwla di wie’n: Be nga be di junman Betɛli lɔ titi’n, annzɛ be nga be kɔ Betɛli lɔ be ko di junman afuɛ kun annzɛ afuɛ kun tra su’n.

• Wafa nga be klɛ be dunman’n: Betɛli lɔfuɛ nga be kwla di suklu’n, be bo su kle be trele.

Asɔnun kpɛnngbɛn nin asɔnunfuɛ’m be lika nianfuɛ’m be suklu

• Like nga ti yɛ be kpɛli i ba’n: Suklu sɔ nun’n, be kle asɔnun kpɛnngbɛn mun ɔ nin asɔnunfuɛ’m be lika nianfuɛ mun wafa nga be kwla nian asɔnun’n i lika kpa’n. (Yol. 20:28) E Ɲrun dinfuɛ’m be anuannzɛ’n yɛ ɔ kle blɛ ng’ɔ fata kɛ be di suklu sɔ’n niɔn.

• Blɛ nga ɔ di’n: Afuɛ nga be sinnin lɛ’n be nun’n, asɔnun kpɛnngbɛn’n be dili suklu sɔ’n cɛn kun nin sin. Yɛ asɔnunfuɛ’m be lika nianfuɛ’m be liɛ’n ɔ dili cɛn kun.

• Lika nga be yo i’n: E aɲia sua kun nun yɛ be yo i ɔ.

• Be nga be kwla di wie’n: Asɔnun kpɛnngbɛn nin asɔnunfuɛ’m be lika nianfuɛ mun.

• Wafa nga be klɛ be dunman’n: Be nga be kwla di suklu sɔ’n wie’n, akpasua sunianfuɛ’n klɛ be fluwa.

Asɔnun kpɛnngbɛn’m be suklu (École des anciens des congrégations)a

• Like nga ti yɛ be kpɛli i ba’n: Ɔ ti asɔnun kpɛnngbɛn’m be ukalɛ naan b’a kwla di junman nga be fa wlali be sa nun’n.

• Blɛ nga ɔ di’n: Cɛn nnun.

• Lika nga be yo i’n: Betɛli’n yɛ ɔ kle lika’n niɔn. E aɲia sua kun nun yɛ be yo i ɔ.

• Be nga be kwla di wie’n: Asɔnun kpɛnngbɛn mun.

• Wafa nga be klɛ be dunman’n: Be nga be kwla di wie’n, Betɛli’n klɛ be fluwa se be.

Nvle sunianfuɛ nin akpasua sunianfuɛ mun nin be yi’m be suklu (École des surveillants itinérants et de leurs femmes)b

• Like nga ti yɛ be kpɛli i ba’n: Suklu sɔ’n uka akpasua sunianfuɛ nin nvle sunianfuɛ mun naan b’a kwla ‘kle like,’ naan b’a kwla nian Ɲanmiɛn i bua fa’n m’ɔ fa mannin be’n i su kpa.—1 Tim. 5:17; 1 Piɛ. 5:2, 3.

• Blɛ nga ɔ di’n: Anglo nɲɔn.

• Lika nga be yo i’n: Betɛli’n yɛ ɔ kle lika’n niɔn.

• Be nga be kwla di wie’n: Nvle sunianfuɛ nin akpasua sunianfuɛ mun.

• Wafa nga be klɛ be dunman’n: Be nga be kwla di suklu sɔ’n wie’n Betɛli’n klɛ be nin be yi’m be fluwa yia be.

Aniaan nga be nin a jaman bla’n be suklu

• Like nga ti yɛ be kpɛli i ba’n: Ɔ uka asɔnun kpɛnngbɛn nin asɔnunfuɛ’m be lika nianfuɛ nga be nin a jaman bla’n, naan b’a kwla sɔ junman uflɛ nun ekun. Be kwla fa be nga be di suklu’n sɔ’n be nun wie mun kɔ be nvle’n nun lika nga be sa mian jasin bofuɛ wun’n be nun lɔ. Be nun sran nga be kunndɛ kɛ bé kɔ́ nvle uflɛ kun nun bé kó dí Ɲanmiɛn junman’n lɔ’n, be kwla fa be kɔ lɔ.

• Blɛ nga ɔ di’n: Anglo nɲɔn.

• Lika nga be yo i’n: Betɛli’n yɛ ɔ kle lika’n niɔn. E aɲia sua kun nun yɛ be yo i ɔ.

• Be nga be kwla di wie’n: Aniaan nga be nin a jaman bla mɔ be le afuɛ 23 lele 62. Ɔ fata kɛ be yo sran mɔ be wun kpinndin be kpa ɔ. Maan be klo kɛ bé úka be niaan mun naan be di junman kpa naan jasin fɛ’n bolɛ junman’n wɔ i ɲrun. (Mar. 10:29, 30) Maan be yo asɔnun kpɛnngbɛn annzɛ asɔnunfuɛ’m be lika nianfuɛ nga b’a di afuɛ nɲɔn annzɛ afuɛ nɲɔn tra su’n junman sɔ’n nun’n.

• Wafa nga be klɛ be dunman’n: Akpasua kun aɲia’n be bo’n, be yo be nga be kunndɛ kɛ bé dí suklu sɔ’n be aɲia kun. Be nga be kunndɛ kɛ bé dí suklu sɔ’n wie’n, be tran aɲia sɔ’n i bo yɛ be klɛ be dunman. Ninnge ng’ɔ fata kɛ be yo’n, bé yíyí nun kpa klé be.

Aniaan nga be o aja nun’n be suklu (École biblique pour couples chrétiens)c

• Like nga ti yɛ be kpɛli i ba’n: Suklu sɔ’n nun’n, be kle be nga be o aja’n nun’n be like naan Zoova nin i anuannzɛ’n b’a man be junman ekun naan b’a kwla di i kpa. Be kwla fa be nga be di suklu’n sɔ’n be nun wie mun kɔ be nvle’n nun lika nga be sa mian jasin bofuɛ wun’n be nun lɔ. Be nun sran nga be kunndɛ kɛ bé kɔ́ nvle uflɛ kun nun bé kó dí Ɲanmiɛn junman’n lɔ’n, be kwla fa be kɔ lɔ.

• Blɛ nga ɔ di’n: Anglo nɲɔn.

• Lika nga be yo i’n: Dɔ nga su’n be su yo suklu sɔ’n i nun klikli mun Centre d’enseignement des Témoins de Jéhovah, Patɛrsɔnu lɔ. I sin’n, bé yó suklu sɔ’n lika nga Betɛli’n klé’n be nun lɔ. Bé yó i e aɲia sua’m be nun kun nun.

• Be nga be kwla di wie’n: Aniaan nga be le afuɛ 25 lele 50, mɔ be o aja nun’n, mɔ kusu be wun kpinndin be kpa’n. Maan be yo sran mɔ be kwla fa be kɔ lika kwlaa nga be le jasin bofuɛ’n be awuliɛ lɔ’n. Ezai m’ɔ seli Zoova kɛ: “Min ɔn, sunman min,” maan be aeliɛ’n fɛ i liɛ’n. (Eza. 6:8) Asa kusu, ɔ fata kɛ be yo sran mɔ be o aja nun’n w’a di afuɛ nɲɔn annzɛ afuɛ nɲɔn tra su’n. Kpɛkun maan be yo sran m’ɔ di blɛ kwlaa nun Ɲanmiɛn junman’n w’a di afuɛ nɲɔn annzɛ afuɛ nɲɔn tra su’n.

• Wafa nga be klɛ be dunman’n: Cɛn ngunmin kun aɲia’m be bo’n, be yo be nga be kunndɛ kɛ bé dí suklu sɔ’n be aɲia kun. Be nga be kunndɛ kɛ bé dí suklu sɔ’n wie’n, be tran aɲia sɔ’n i bo yɛ be klɛ be dunman. Ninnge ng’ɔ fata kɛ be yo’n, bé yíyí nun kpa klé be.

Gileadi suklu

• Like nga ti yɛ be kpɛli i ba’n: Ɔ uka titi atin bofuɛ mun, ɔ nin be nga be di blɛ kwlaa nun Ɲanmiɛn junman’n naan b’a kwla di ngaliɛ difuɛ junman’n.

• Blɛ nga ɔ di’n: Anglo nnun.

• Lika nga be yo i’n: Be yo i Centre d’enseignement des Témoins de Jéhovah, Patɛrsɔnu lɔ.

• Be nga be kwla di wie’n: Aniaan nga be o aja nun’n mɔ be yoli be batɛmu w’a di afuɛ nsan’n. kpɛ klikli nga bé kó klɛ́ be dunman’n, ɔ fata kɛ be ɲan afuɛ 21 lele 38. Yɛ maan be kan angle aniɛn’n, naan be yo sran mɔ be o aja nun’n w’a di afuɛ nɲɔn annzɛ afuɛ nɲɔn tra su’n, ɔ nin sran mɔ be ti titi atin bofuɛ w’a di afuɛ nɲɔn annzɛ afuɛ nɲɔn tra su’n. Ɔ fata kɛ be yo sran mɔ be wun kpinndin be kpa ɔ. Titi atin bofuɛ nga be bo jasin fɛ’n nvle uflɛ kun nun’n, ɔ nin nvle sunianfuɛ nin akpasua sunianfuɛ mun, ɔ nin Betɛli lɔ junman difuɛ mun, ɔ nin be nga be dili suklu nga be flɛ i École de formation ministérielle wie laa’n, ɔ nin aniaan nga be dili be nga be nin a jaman bla’n be suklu’n, ɔ nin be nga be dili be nga be o aja’n nun’n be suklu’n, sɛ be yia ngaliɛ dilɛ junman’n i wun ninnge be nuan’n, be kusu be kwla klɛ be dunman wie.

• Wafa nga be klɛ be dunman’n: Nvle wie’m be nun’n, nvle kun aɲia’m be bo’n, be yo be nga be kunndɛ kɛ bé dí suklu sɔ’n be aɲia kun. Be nga be kunndɛ kɛ bé trán aɲia sɔ’n i bo wie’n, ninnge ng’ɔ fata kɛ be yo’n, bé yíyí nun kpa klé be. Sɛ amun nvle nun lɔ’n, be yomɛn i sɔ aɲia’n nvle kun aɲia’m be bo’n, amun kwla klɛ Betɛli’n, naan ɔ kle amun ajalɛ.

Betɛli i komite’n nunfuɛ mun nin be yi’m be suklu

• Like nga ti yɛ be kpɛli i ba’n: Ɔ uka be nga be di junman Betɛli i komite’m be nun’n naan be nian Betɛli’n su kpa. Asa ekun’n, jasin fɛ’n junman’n nga asɔnun’m be di’n, ɔ nin nvle sunianfuɛ nin akpasua sunianfuɛ’m be junman’n, yɛ fluwa kacilɛ’n nin fluwa yilɛ junman’n ɔ nin fluwa’m be likalika’n be nun fa kɔlɛ’n, suklu sɔ’n uka be naan b’a nian be su kpa wie. Kpɛkun be nian Betɛli lɔ junman uflɛ wie mun ekun be su.—Lik 12:48b.

• Blɛ nga ɔ di’n: Anglo nɲɔn.

• Lika nga be yo i’n: Centre d’enseignement des Témoins de Jéhovah, Patɛrsɔnu lɔ.

• Be nga be kwla di wie’n: Betɛli i komite’n nunfuɛ mun annzɛ Betɛli’n i janunfuɛ nga be o nvle nga nvle uflɛ su Betɛli’n ɔ nian be junman’n su’n, be nun’n. Annzɛ aniaan bian nga mɔ b’a fɛ i kɛ sɛ ɔ ko di suklu’n ko wie’n, ɔ́ yó Betɛli komite nunfuɛ’n annzɛ Betɛli janunfuɛ’n.

• Wafa nga be klɛ be dunman’n: Be nga be kwla di suklu sɔ’n wie’n e ɲrun dinfuɛ’m be anuannzɛ’n klɛ be nin be yi’m be fluwa yia be.

[Ja ngua lɛ ndɛ mun]