Maan e sasa e klun lɔ akunndan’n
1. ?E cɛn ngunmin kun aɲia nga é yó i afuɛ 2013 nun’n, i flɛlɛ’n yɛle benin? ?Yɛ ngue ti yɛ be siesieli aɲia sɔ’n niɔn?
1 Cɛn kwlakwla’n, sa nga be ju e su’n, be nun wie’m be kwla saci e klun akunndan’n. I sɔ’n ti’n, afuɛ 2013 nun’n e cɛn ngunmin kun aɲia’n, i flɛlɛ’n yɛ: “Maan e sasa e klun lɔ akunndan’n.” Ɔ́ bó i bo Sɛptamblu i le 1 su. (1 Tim. 1:19) E klun akunndan’n m’ɔ ti nanndoliɛ like mɔ e Yifuɛ’n fa mannin e’n, aɲia sɔ’n wá klé e kwlakwla wafa nga e kwla fa yo like kpa’n.
2. ?Kosan cinnjin benin mun yɛ bé wá tɛ be su aɲia’n i bo lɔ ɔ?
2 Maan e fa e ɲin e sie kosan nga’m be su tɛlɛ’n su: Aɲia sɔ’n i bo lɔ’n, bé wá tɛ́ kosan cinnjin nso mɔ be wɔ e klun akunndan’n be su:
• ?Ninnge benin mun yɛ be kwla saci e klun akunndan’n niɔn?
• ?É yó sɛ naan e klun lɔ akunndan’n w’a yo kpa?
• ?É yó sɛ naan e dunman nun ti sran wie w’a mlinman?
• ?Kɛ e wun Biblu’n nun mmla’m be bo mɔ e bu su akunndan mɔ e fa su’n, i sɔ’n kle kɛ e ti sran wafa sɛ?
• ?Ngue yɛ ɔ fata kɛ e yo naan e niaan’m be akunndan’n w’a sannganman ɔn?
• ?Gbanflɛn nin talua mun, kannzɛ be tanndan amun ja nun’n, wafa sɛ yɛ amun kwla jran kekle ɔ?
• ?Be nga be fa atin nga Ɲanmiɛn wawɛ’n kle be’n su’n, mmlusuɛ benin yɛ be ɲɛn i ɔ?
3. ?Ngue yɛ e kwla yo naan y’a ɲan e cɛn ngunmin kun aɲia’n i su mmlusuɛ ɔ?
3 Like kwlaa nga Satan miɛn i ɲin yo naan e klun akunndan’n w’a saci’n, Zoova fanngan nun’n, e kwla jran be ɲrun kekle. E Si m’ɔ klo e kpa’n sin i nuan Ndɛ’n nin i anuannzɛ’n be lika naan w’a kle e atin’n. Ɔ se e kɛ: “Atin’n yɛ ɔ yo yɛ, amun fa su.” (Eza. 30:21) Aɲia nga é wá yó’n, ɔ ti ninnge nga Zoova fa kle e atin’n be nun kun. Ɔ maan, an siesie amun wun naan amun a kpɛman i bo tranlɛ’n i nun cɛn kun sa bɔbɔ. Asa’n, maan an sie amun su kpa naan an nian wafa nga an bɔbɔ an kwla nanti afɔtuɛ nga bé mán amun’n su. Maan awlo lɔ’n, amun koko like nga amún súan’n i su yalɛ. Sɛ e nanti afɔtuɛ nga bé mán e’n su’n, i sɔ’n wlá e fanngan naan y’a yoman sa nga i ti ‘e klun títí e’n’ naan kusu y’a manman Satan i mɛn’n nun ninnge’m be atin naan b’a saci e nin Zoova e afiɛn’n.—1 Piɛ. 3:16.