?Wan mun yɛ ndɛ nga kwla yo be fɛ ɔ?
1. ?Kɛ é kánngan e bɔbɔ e periodiki’m be nun’n, ngue yɛ ɔ fata kɛ e bu i akunndan ɔn? ?Yɛ ngue ti ɔ?
1 Mɛn wunmuan’n i nunfuɛ’m be ti yɛ be yi Sasafuɛ Tranwlɛ’n nin Réveillez-vous ! mun ɔn. I sɔ’n ti’n, fluwa sɔ’m be nun ndɛ’m be ti fanunfanun. Ɔ maan, kɛ é kánngan ndɛ wie nun e bɔbɔ e fluwa liɛ’n nun’n, maan e bu sran trele nga ndɛ sɔ’n kwla yo be fɛ’n be akunndan. I sin’n, wafa nga e kwla fa fluwa sɔ mun e man be’n maan e bu i akunndan wie.
2. ?E periodiki’m be nun’n ndɛ benin mun yɛ be kwla yo sran’m be fɛ kpa ɔ?
2 ?Ndɛ wie o Sasafuɛ Tranwlɛ’n kasiɛn’n i nun mɔ amun nin amun wiengu junman difuɛ wie be kokoli su yalɛ laa ɔ? ?Annzɛ kusu’n ndɛ wie o periodiki’m be nun mɔ amun kwla fa uka amun osufuɛ kun naan i awlobo tranlɛ’n w’a yo fɛ ɔ? ?Amun si sran kun m’ɔ su wa tu ajalɛ kɔ lika wie mɔ be kɛnnin i su ndɛ Réveillez-vous ! i nun ɔn? ?Amun jasin bowlɛ nun lɔ’n, amun si awa junman difuɛ wie annzɛ aata difuɛ wie mɔ e periodiki’m be nun ndɛ’n kwla yo be fɛ ɔ? Sɛ periodiki kun kan tukpacɛ wie ndɛ’n, e kwla fa man be nga tukpacɛ sɔ’n o be su’n ɔ nin be osufuɛ mun. Asa’n sɛ nzaje sa yolɛ’n i ndɛ’n yɛ periodiki sɔ’n kan’n e kwla fa man polisie mun.
3. Sa ti m’ɔ ti cinnjin kɛ e fa periodiki mun e man be nga e wun kɛ i nun ndɛ’n kwla yo be fɛ’n, amun fa sa kun yiyi nun.
3 Ajalɛ sɔ’n i su mmlusuɛ’n: Afrique du Sud lɔ’n, aniaan kun nin i yi be ɲannin Réveillez-vous ! m’ɔ fiteli afuɛ 2011, Ɔktɔblu anglo’n nun’n. Periodiki sɔ’n kan ba’m be talɛ’n i ndɛ. Ɔ maan be flɛli suklu sunianfuɛ lele 25 telefɔnu nun. Be nun ablaɔn nin nɲɔn be sɔli fluwa’m be nun naan b’a fa cɛcɛ suklu mma mun. Nvle kunngba sɔ’n nun’n, aniaan kun nin i yi be fali ajalɛ kunngba’n wie. Ɔ maan be jasin bowlɛ’n nun lɔ’n, be fali periodiki mun cɛcɛli sran mun suklu’m be nun. Suklu sɔ’m be nun kun nun’n, like klefuɛ’m be fali periodiki sɔ’n i nun ndɛ’n kleli like. Be boli ndɛ sɔ’n su kleli Akpasua sunianfuɛ kun. Yɛ i kusu wlali asɔnun nga be o i akpasua liɛ’n su’n be fanngan kɛ be bo jasin fɛ’n kɛ ngalɛ’n sa wie suklu’m be nun. Kɛ mɔ be diman be nga be kunndɛ periodiki sɔ’n be yalɛ’n ti’n, aniaan’m be nuan toli Betɛli’n. Ɔ maan ɔ nin i fatali kɛ be yi fluwa sɔ’n ekun.
4. ?Ngue ti yɛ e kunndɛ kpa kɛ é fá periodiki mun é mán sran kpanngban kpa ɔ?
4 E periodiki’m be uka sran mun naan b’a wun sa nga be ju mɛn’n nun andɛ’n be bo. Asa’n, be fa sran’m be ɲin sie i Biblu’n nin Ɲanmiɛn i Sielɛ’n su. Mɛn wunmuan’n nun’n, periodiki sɔ’m be ngunmin yɛ be kan “sran’m be delɛ’n i ndɛ” ɔ. (Eza. 52:7) I sɔ’n ti’n, maan e kunndɛ kɛ é fá be é mán sran kpanngban kpa. I sɔ yolɛ nun’n, maan e usa e wun kɛ: ‘?Wan mun yɛ ndɛ nga kwla yo be fɛ ɔ?’