An nian Ɲanmiɛn nuan ijɔfuɛ’m be liɛ’n su: Oze
1. ?Kosan benin yɛ atrɛkpa’n a fa usali ɔ wun ɔn?
1 Atrɛkpa’n, kɛ a buli ninnge kpakpa nga Zoova yo mannin wɔ’n be akunndan’n, a usali ɔ wun kɛ: ‘?Ngue cɛ yɛ ń ɲɛ́n i ń fá lá Zoova i ase ɔ?’ (Jue. 103:2-4; 116:12) Oze i liɛ’n, ɔ yoli like nga Zoova seli i kɛ ɔ yo’n. Kannzɛ w’a yoman pɔpɔ’n, sanngɛ ɔ klɛnnin i wun yoli. ?Wafa sɛ yɛ e kwla niɛn i ajalɛ’n su ɔ?
2. ?Wafa sɛ yɛ e kwla nian Oze i ajalɛ kpa’n su jasin fɛ’n bolɛ’n nun ɔn?
2 Maan e bo jasin fɛ’n blɛ kekle nun: Oze kɛnnin i ndɛ’n fa wɔli Izraɛli nvle’n i nglo lɔ famiɛn diwlɛ’n m’ɔ ti akpasua blu’n i nunfuɛ mun. Izraɛlifuɛ nga be o lɔ’n be dan lika be kacili be sin sili Ɲanmiɛn i sulɛ kpafuɛ’n. Famiɛn Zeroboamu II su’n m’ɔ ti akpasua blu sɔ’n be su famiɛn’n, ɔ yoli sa tɛ Zoova i ɲrun. Kpɛkun nannin ba sɔlɛ nga Zeroboamu I su’n kpɛli i ba’n, ɔ fɛli i wun wlali nun wie. (2 Fam. 14:23, 24) I sin’n, famiɛn nga be sinnin be osu’n be kusu’n, sa tɛtɛ mun yɛ be yoli i sa trilili ɔ. Ɔ maan afuɛ 740 nun ka naan b’a wu Klist’n, be nunnunnin Izraɛli nvle’n i akpasua blu sɔ’n. Kannzɛ Ɲanmiɛn i sulɛ ng’ɔ timan su’n yɛ ɔ truli’n, sanngɛ Oze yoli Ɲanmiɛn i nuan ijɔfuɛ afuɛ lele 59. ?Yɛ e li? ?Sɛ bɔbɔ sran’m be bu be su nun waka’n, annzɛ be tanndan e ɲrun’n, y’a fua kpa kɛ é bó jasin fɛ’n titi?—2 Tim. 4:2.
3. ?Ngue ti yɛ e kwla se kɛ ajalɛ nga Oze fali’n, ɔ ti Zoova i aunnvuɛ silɛ’n i nzɔliɛ ɔ?
3 Maan e kan Zoova i aunnvuɛ silɛ’n i ndɛ: Zoova seli Oze kɛ ɔ ja “tekle bla.” (Oze 1:2) Be flɛ bla ng’ɔ jɛli i’n kɛ Gomɛr. Ɔ nin i be wuli ba kun. Sanngɛ bla sɔ’n kunndɛli bian Oze i bo, yɛ ɔ nin bian sɔ’n be wuli ba nɲɔn. Ɔ nin i sɔ’n ngba’n, Oze yaci cɛli i. Like ng’ɔ yoli i lɛ’n, ɔ ti wafa nga Zoova nin Izraɛlifuɛ mun trannin’n i nzɔliɛ. Yɛle kɛ kannzɛ bɔbɔ be yo sa tɛ’n, sanngɛ kɛ be kaci be sa’n, Zoova yaci cɛ be, yɛ ɔ si be aunnvuɛ. (Oze 3:1; Rɔm. 9:22-26) E kusu’n, maan e yi Zoova i aunnvuɛ silɛ’n i nglo.—1 Kor. 9:19-23.
4. ?Ajalɛ benin yɛ e kwla fa naan y’a wla e wun ase y’a su Zoova i kpa ekun ɔn?
4 Kɛ ɔ ko yo naan Zoova i sufuɛ wie’m b’a ɲan blɛ b’a bo jasin fɛ’n i kpa’n, be yacili be sa ti junman’n i dilɛ. Wie’m be kusu be fali ajalɛ kɛ be jaman bian annzɛ bla, annzɛ kusu be wuman ba. Kɛ e bu ajalɛ nga Oze fali’n su akunndan’n, atrɛkpa e kwla se e wun kɛ: ‘Nga liɛ’n, n su kwlá yoman kɛ i sa le.’ Sanngɛ kɛ Oze sa’n, sɛ e bu Zoova i aklunye dan’n su akunndan naan e lafi su kɛ i wawɛ’n kwla man e wunmiɛn’n, Zoova kwla fa e di junman nga e sunnzunman’n.—Mat. 19:26; Fil. 2:13.