Maan e uka be naan be Ɲanmiɛn sulafilɛ’n ‘i bo’n wla ase kpa’

Kɛ e wun wafa nga Zoova yra jasin fɛ’n bolɛ junman’n su’n, ɔ yo e fɛ lele kpe nun. Afin sran 250.000 tra su yɛ be yo be batɛmu afuɛ kwlaa ɔ. (Mml. 28:2) Blɛ sunman’n, kɛ jasin bofuɛ kun uka sran kun lele mɔ be yo i batɛmu’n, kpɛkun w’a yaci i Biblu’n nun like klelɛ. Sran uflɛ’m be ukalɛ yɛ ɔ kunndɛ i siɛn’n niɔn. Biblu’n nun like suanfuɛ’n kusu’n, jasin fɛ’n mɔ i waan ɔ́ wlɛ́ i wun ase bó ti’n, ɔ jran like m’ɔ su suan’n. Sanngɛ ɔ ti cinnjin kɛ Biblu’n nun like suanfuɛ’m be bo wla ase kpa ndɛ nanwlɛ’n i silɛ’n nun. Amun uka be naan be si Klist kpa naan b’a kwla jran kekle “kɛ sua bɔ be wlɛ i bo ase kpa’n sa.” (Kol. 2:6, 7; 2 Tim. 3:12) Ɔ maan kannzɛ be yoli sran kun i batɛmu’n, sanngɛ ɔ fata kɛ ɔ suan fluwa Biblu’n kle nin fluwa Ɲanmiɛn klo e’n be nun like lele guɛ i ti nin i bo.​—⁠An nian Avrili 2011, Ɲanmiɛn Sielɛ Blɛ junman fluwa’n i bue 2 nun.