Amun di aklunjuɛ E wla kpɛnlɛ cɛn aɲia’n i blɛ’n nun
1. ?Ngue yɛ ɔ kwla uka e naan y’a di aklunjuɛ E wla kpɛnlɛ cɛn aɲia’n i blɛ’n nun ɔn?
1 ?Amun kunndɛ kɛ amún dí aklunjuɛ kpa Marsi nin Avrili, ɔ nin Mɛ anglo’n nun? Sɛ amun uka amun jasin fɛ’n bolɛ junman’n su’n, amun kwla di i sɔ aklunjuɛ’n. Sɛ amun ɲɛn i wun atin bɔbɔ’n, amun kwla yo cɛn kunngun atin bofuɛ. ?Wafa sɛ yɛ i sɔ yolɛ’n mán amun aklunjuɛ ɔ?
2. ?Kɛ é wlá e wun ase é bó jasin fɛ’n, wafa sɛ yɛ i sɔ’n kwla man e aklunjuɛ ɔ?
2 Maan amun aklunjuɛ’n yo dan: Zoova yili e kɛ e su i naan e di aklunjuɛ. I sɔ’n kle kɛ Ɲanmiɛn ndɛ’n ti cinnjin man e. (Mat. 5:3) Asa ekun sɛ e cɛ e wiengu like’n e di aklunjuɛ, afin kɛ Zoova yili e sɔ ɔ. (Yol. 20:35) Jasin fɛ’n bolɛ junman’n uka e naan y’a su Ɲanmiɛn naan y’a uka sran mun. Ɔ maan sɛ e fa e wun e wlɛ i junman sɔ’n nun’n, saan aklunjuɛ cɛ yɛ é dí ɔ. Asa ekun’n, kɛ é wlá e wun ase é bó jasin fɛ’n, nn e sa tɔ́ nun kpa kɔ́ i ɲrun. Kɛ ɔ́ yó sɔ’n kusu’n, nn e Ɲanmiɛn sulafilɛ’n i bo’n wlá ase kpa, kpɛkun kɛ é bó jasin fɛ’n, e klun titiman e. E kwla bo jasin fɛ’n kle sran kpanngban. Yɛ e nin wie mun e kwla bo Biblu’n nun like suanlɛ bo. I kwlaa sɔ’n ti yɛ maan jasin fɛ’n bolɛ’n man aklunjuɛ’n niɔn.
3. ?Ngue ti yɛ Marsi nin Avrili anglo’n be nin cɛn kunngun atin bolɛ junman’n i dilɛ’n fata kpa ɔ?
3 Marsi nin Avrili anglo’n be nin cɛn kunngun atin bolɛ junman’n i dilɛ’n fata kpa. Afin e kwla fa dɔ 30 annzɛ 50 e di i sɔ junman’n. Asa ekun’n, kɛ ɔ fɛ i Marsi i le 22 m’ɔ ti Fue cɛn’n lele Avrili i le 14 m’ɔ ti E wla kpɛnlɛ cɛn’n, é yía sran mun naan be wa tran aɲia’n i bo. Aklunjuɛ nga aniaan’m bé wá dí’n, ɔ su yoman aɔwi. Afin be kwlaa be “bo yó kun” bé dí junman likawlɛ bé jú lika nga be sa ju lɛ’n. Blɛ sɔ’n nun’n, be wun blíblí be sran yialɛ fluwa’m be cɛcɛlɛ nun.—Sof. 3:9.
4. ?Sɛ e waan é yó cɛn kunngun atin bofuɛ’n, ngue yɛ ɔ fata kɛ e yo ɔ?
4 Maan ikisa’n e siesie e wun: Ajalɛ ng’ɔ fata kɛ e fa naan y’a kwla yo cɛn kunngun atin bofuɛ’n anglo kun annzɛ nɲɔn’n, dɔ nga su yɛ ɔ fata kɛ e bu i akunndan ɔn. Maan e fa wlɛ i srɛlɛ’n nun. (Zak 1:5) Maan e bo su e kle e awlobofuɛ mun nin aniaan mun. (Nya. 15:22) Kannzɛ bɔbɔ tukpaciɛ wie kle e yalɛ annzɛ e leman blɛ’n, sanngɛ e kwla yo cɛn kunngun atin bofuɛ naan y’a di i su aklunjuɛ’n wie.
5. ?Sɛ e tu e klun e bo jasin fɛ’n E wla kpɛnlɛ cɛn aɲia’n i blɛ’n nun’n, i bo’n gúa sɛ?
5 Zoova kunndɛ kɛ i sufuɛ’m be klun jɔ. (Jue. 32:11) Sɛ e tu e klun e bo jasin fɛ’n E wla kpɛnlɛ cɛn aɲia’n i blɛ’n nun’n, aklunjuɛ nga é dí’n, ɔ́ yó dan. Kpɛkun e Si m’ɔ o nglo lɔ’n i klun jɔ́ wie.—Nya. 23:24; 27:11.