Junman nga é wá dí i Utu nun’n, e wla su fiman su le!

1. ?Kɛ mɔ Zezi boli i Famiɛn dilɛ’n i bo ɔ su wa di afuɛ 100 ti’n, junman ngunmin kun benin yɛ é wá dí ɔ?

¹ Kɛ Zezi boli Famiɛn dilɛ’n i bo ɲanmiɛn su lɔ’n, i afuɛ 100 i nuan su wa yia sɛsɛsɛ. I sɔ’n ti’n, ɔ fata kɛ e fa blɛ ngunmin kun e manman Zoova. Utu anglo nun’n, é wá fá fluwa nɲa uflɛuflɛ kun é bó jasin fɛ’n asiɛ wunmuan’n su. Be flɛ fluwa nɲa sɔ’n kɛ “?Nin yɛ é wún kosan cinnjin’m be su tɛlɛ’n niɔn?” Fluwa nɲa uflɛuflɛ sɔ’n wla sran’m be fanngan kɛ be kunndɛ kosan’m be su tɛlɛ’n Biblu’n nun. Kpɛkun wafa nga jw.org kwla uka be’n, ɔ yiyi nun.

2. ?Wafa sɛ yɛ e kwla ‘kpan kekle kpa e manman’ Zoova Utu anglo’n nun wie ɔ?

² E kpan kekle kpa e manman Ɲanmiɛn: Kɛ ɔ ko yo naan jasin bofuɛ nga be kunndɛ kɛ bé yó cɛn kunngun atin bofuɛ’n, b’a kwla di i sɔ junman’n ti’n, anuannzɛ’n fali ajalɛ kun. Yɛle kɛ Utu anglo’n nun’n, be kwlaa nga be yoli be batɛmu’n, be kwla di dɔ 30 cɛn kunngun atin bolɛ junman’n nun. Asa ekun’n, Utu nun’n, Ya cɛn nin Fue cɛn ɔ nin Mɔnnɛn cɛn’m be ti nnun nnun. Ɔ maan suklu ba mun nin blɔfuɛ junman difuɛ’m be kwla yo cɛn kunngun atin bofuɛ wie. Sɛ amun le ba kun annzɛ Biblu’n nun like suanfuɛ kun m’ɔ kwla bo jasin fɛ’n, amun bo su kle asɔnun kpɛnngbɛn mun ndɛndɛ. Sɛ be kaci jasin bofuɛ anglo sɔ’n nun’n, nanwlɛ, i sɔ’n wlá be fanngan dan! Titi atin bofuɛ nga b’a di dɔ nga be seli be kɛ be fa bo jasin fɛ’n, be nun kpanngban be lo wunmiɛn Utu anglo’n nun. Sanngɛ be kwla siesie be wun naan b’a wla be wun ase b’a bo jasin fɛ’n blɛ ngunmin kun sɔ’n nun wie. Wafa nga awlobofuɛ’m be kwla ‘kpan kekle kpa be manman’ Zoova Utu anglo’n nun’n, dɔ nga su yɛ ɔ fata kɛ be koko su yalɛ ɔ.​—Ɛsd. 3:11; Nya. 15:22.

3. ?Ngue yɛ e lafi su ɔ?

³ Ɔ ti su kɛ laa’n, e fali e fluwa wie mun e mannin sran mun dan kɛ nga e su wa yo i ekun yɛ’n sa. Sanngɛ, e lafi su kɛ junman nga e su wa di i afuɛ nga’n, e wla su fiman su le. Atrɛkpa’n, Utu nun’n, jasin bofuɛ mun nin cɛn kunngun atin bofuɛ’m bé sɔ́n trá titi liɛ’n. Afuɛ nuan Ɲanmiɛn junman nga e boli i dilɛ’n bo 2013 Sɛptamblu nun’n, ɔ́ wíe 2014 Utu anglo’n nun. É srɛ́ Zoova kɛ ɔ yra junman nga i sufuɛ’m be su wa di i Utu nun’n su. Maan jasin nga é wá bó i asiɛ wunmuan’n su’n, ɔ yo dan tra titi liɛ’n leleele.—Mat. 24:14.