An nian Ɲanmiɛn nuan ijɔfuɛ’m be liɛ’n su: Sofoni
1. ?Blɛ benin nun yɛ Sofoni yoli Ɲanmiɛn nuan ijɔfuɛ ɔ? ?Ajalɛ kpa benin yɛ ɔ kle e andɛ ɔ?
1 Afuɛ ya nso ka naan b’a ju Klistfuɛ klikli’m be blɛ su’n, Baali i sɔlɛ’n truli Zida mɛn’n nun. Kɛ ɔ́ yó sɔ’n, nn b’a kun Amɔn m’ɔ ti famiɛn klunwifuɛ’n ɔ nin a cɛman. Zoziasi m’ɔ ti gbanflɛn kan’n yɛ w’a sin i ja nun ɔn. (2 Nyo. 33:21—34:1) Blɛ sɔ’n nun’n, Zoova kpali Sofoni kɛ ɔ ijɔ i nuan. Kannzɛ bɔbɔ Sofoni ti Zida famiɛn’n i awlofuɛ’n, sanngɛ w’a seman kɛ ɔ́ fía jɔlɛ nga Zoova waan ɔ́ wá dí Zida kpɛnngbɛn mun’n, i wie su. (Sof. 1:1; 3:1-4) Maan e kusu e mian e ɲin e yo yakpafuɛ kɛ Sofoni sa. I liɛ’n, e su yaciman e osufuɛ’m be nun naan be tanndan e ɲrun Zoova sulɛ’n nun. (Mat. 10:34-37) ?Jasin benin yɛ Sofoni boli ɔ? ?Yɛ i bo’n guali sɛ?
2. ?Sɛ sran kun kunndɛ kɛ ɔ́ ɲɛ́n i ti Zoova i ya cɛn nun’n, ngue yɛ ɔ fata kɛ ɔ yo ɔ?
2 Maan e mantan Zoova: Kɛ Zoova i ya cɛn’n wá jú’n, i kunngba cɛ yɛ ɔ́ kwlá dé sran mun ɔn. I sɔ’n ti’n, Sofoni wlali i nvlefuɛ’m be su nun kpa kɛ be fa be wun mantan Zoova naan be yo nanwlɛfuɛ, yɛ be kan be wun ase, ka naan cɛn sɔ’n w’a ju. (Sof. 2:2, 3) Ndɛ sɔ’n ti e liɛ wie andɛ. Kɛ Sofoni sa’n, e wla sran’m be fanngan kɛ be fa be wun mantan Zoova. Sanngɛ maan e bɔbɔ e kplin e ɲin naan y’a ‘kaciman e sin y’a siman’ Zoova. (Sof. 1:6) Sɛ e waan é klé kɛ e mantan Zoova’n, maan e bo e ɲin ase e suɛn i Ndɛ’n kpa, kpɛkun like nga e suan’n maan e nanti su. Sɛ e waan é klé kɛ e ti nanwlɛfuɛ’n, nán maan e fa e wun wlɛ i sa sukusuku yolɛ’n nun. Yɛ sɛ e waan é klé kɛ e ti wun ase kanfuɛ’n, nán maan e sisi e bo naan y’a nanti ajalɛ nga Zoova i anuannzɛ’n fa’n su.
3. ?Ngue ti yɛ ɔ fataman kɛ e sa sin bubu e jasin fɛ’n i bolɛ’n nun ɔn?
3 I bo’n guali kpa: Ndolo nga Sofoni boli’n, ɔ wluwluli Zidafuɛ wie’m be wun. Sanngɛ Zoziasi yɛ ndolo sɔ’n wluwluli i wun dan ɔn. Ɔ maan ɔ wa kunndɛli kɛ ɔ́ fɛ́ i wun mántan Zoova. Kusu nn ɔ te yo gbanflɛn kan. I sin’n, ɔ wa fali ajalɛ kɛ be bubu amuɛn sɔwlɛ kwlaa nga be wo i nvle’n nun’n. (2 Nyo. 34:2-5) Sɛ Ɲanmiɛn Sielɛ’n i jasin nga e bo i andɛ’n, ɔ ti awie’n, nn é sé kɛ i wie tɔ atin mma’n nun. I wie kusu tɔ akpuɛ’m be su. I wie tɔ nduin’n nun, yɛ i wie kusu tɔ asiɛ kpa’n su kpɛkun ɔ su mma. (Mat. 13:18-23) E lafi su kɛ Zoova yrá e ɲin mɔ e mian e di Ɲanmiɛn Sielɛ’n i junman’n su tititi.—Jue. 126:6.
4. ?Ngue ti yɛ ɔ fata kɛ e ‘tran minndɛ’ Zoova ɔ?
4 Zidafuɛ wie mun be buli i kɛ Zoova su yoman like fi. Sanngɛ nn Zoova seli be kɛ i cɛn dan’n w’a mantan koko. (Sof. 1:12, 14) Be nga be fa Zoova yo be fiawlɛ’n, be ngunmin cɛ yɛ bé fíte nun ɔn. (Sof. 3:12, 17) Kɛ é ‘trán mínndɛ Zoova’ i cɛn’n, maan e bo yo kun e su e Ɲanmiɛn m’ɔ ti kpli’n.—Sof. 3:8, 9.