Ajalɛ nga e kwla fa’n

?Nin yɛ é wún kosan cinnjin’m be su tɛlɛ’n niɔn?

Maan e tra fluwa nɲa’n nun naan sran’n wun fluwa’n i flɛlɛ’n. Kpɛkun maan e se kɛ: “E su fa fluwa nga é cɛ́cɛ́ sran mun mɛn wunmuan’n nun. Ɔ liɛ yɛ.”

Sɛ e fa fluwa nɲa’n e wla be nga be nunman lɛ’n be anuan’n i bo’n, maan e sie i kpa naan be nga bé sín’n b’a wunmɛn i. Ɔ nunman nun kɛ e bu fluwa nɲa’n nun.

Sɛ e ndɛ tiefuɛ’n kunndɛ kɛ ɔ́ sí ndɛ’n nun kpa ekun’n, maan e fa kosan nsan nga be o fluwa nɲa’n i ja ngua lɛ’n e usɛ i. I sin’n, maan e tike fluwa’n su naan e kle i ndɛ nga Zan 17:17 kan’n. Maan e yiyi nun e kle i kɛ fluwa’n kan ɛntɛnɛti adrɛsi kun i ndɛ. Naan adrɛsi sɔ’n kwla ukɛ i naan w’a wun kosan’m be su tɛlɛ’n Biblu’n nun. E kwla bo video nga be flɛ i “?Ngue ti yɛ Biblu’n nun like suanlɛ’n ti cinnjin ɔn?” e kle i. Ka naan y’a wɔ’n, maan e fa kosan nsan nga be o fluwa nɲa’n i sin’n su’n e kle i. Kpɛkun maan e se i kɛ ɔ kle kosan’m be nun kun ng’ɔ ti i cinnjin’n. Kɛ ɔ kle’n, maan e nuan sɛ su kɛ é sá e sin é kó klé i wafa ng’ɔ kwla kunndɛ kosan sɔ’n i su tɛlɛ jw.org su’n. Kɛ e kɔ i osu nianlɛ’n, maan e wɔ jw.org su. Kpɛkun e tin FLUWA MUN su, i sin’n e tin FLUWA NIN FLUWA PƐPLƐƐPLƐ MUN su naan e kanngan fluwa nɲa kun nun fa tɛ i kosan’n su.

Sɛ i blɛ kunngba sɔ’n nun yɛ e su yia sran mun kɛ be ko tran e akpasua liɛ’n su lɔ aɲia dan’n i bo’n, maan e fa sran’m be yialɛ fluwa’n e nannan fluwa nɲa’n su naan e fa mɛn i. Kpɛkun, maan e se i kɛ: “Asa ekun’n, e waan é yía ɔ e aɲia dan kun bo. A su tuaman dein.”

Sasafuɛ Tranwlɛ’n Utu 1

Fue nin Mɔnnɛn cɛn’n, sɛ ɔ nin i fata’n, Sasafuɛ Tranwlɛ’n i fa manlɛ’n nun’n, e kwla se kɛ: “E waan é mán ɔ fluwa kun ekun. Be yili ɔ nin a cɛman. Fluwa sɔ’n tɛ kosan yɛ’n su: ?A bu i kɛ Ɲanmiɛn bu wɔ akunndan?”

Réveillez-vous ! Août

Fue nin Mɔnnɛn cɛn’n, Réveillez-vous ! i fa manlɛ’n nun’n, e kwla se kɛ: “E waan é mán ɔ fluwa kun ekun. Blɛ li yɛ b’a yi i uflɛuflɛ ɔ. Fluwa sɔ’n tɛ kosan yɛ’n su: ?Wafa sɛ yɛ sran’m be kwla siesie be afiɛn ɔn?”