An nian Ɲanmiɛn nuan ijɔfuɛ’m be liɛ’n su: Naɔm
1. ?Ngue yɛ Naɔm fluwa’n i nun ndɛ’n kle e ɔ?
1 Ɲanmiɛn nuan ijɔfuɛ Naɔm kannin kɛ Zoova tú i klunngbɔ’n i kpɔfuɛ’m be su naan, kannzɛ be ti sɛ ti sɛ’n, be su kwlá jrɛnmɛn i ɲrun. Ninivu i klɔ nvuɛn’n kle weiin kɛ ndɛ sɔ’n kpɛnnin su. (Naɔ. 1:2, 6) Sɛ e bo e ɲin ase e nian Naɔm fluwa’n nun kpa’n, é ɲán su mmlusuɛ e jasin fɛ’n bolɛ’n nun.
2. ?É yó sɛ naan jasin nga e bo’n w’a wla sran’m be fanngan?
2 I ndɛ’n fɔnvɔ e, yɛ ɔ gua e awlɛn su nzue: Kɛ e kanngan Naɔm fluwa’n nun’n, e kwla bu i kɛ Ninivu m’ɔ ti Asirifuɛ’m be klɔ dan’n i nunnunlɛ ngunmin ndɛ yɛ ɔ kan ɔn. (Naɔ. 1:1; 3:7) Sanngɛ, i nun ndɛ’m be ti Zoova i sufuɛ’m be ndɛ fɛ. Naɔm mɔ i dunman’n i bo’n yɛle kɛ “sran fɔnvɔfuɛ’n,” ɔ guali Zuifu’m be awlɛn su nzue. Afin ɔ seli be kɛ, ɔ cɛ kan’n, be kpɔfuɛ’m be su tranman lɛ kun! Asa ekun’n, Naɔm kleli kɛ ‘awlaboɛ blɛ nun’n, Zoova sin yɛ be fia ɔ.’ (Naɔ. 1:7) E kusu, kɛ é bó jasin fɛ’n, e wla sran’m be fanngan kɛ be fia Zoova sin.—Naɔ. 2:1.
3. ?Wafa sɛ yɛ e kwla fa sa wie mun ɔ nin sunnzun ase yiyi e ndɛ’n nun kɛ Naɔm sa ɔ?
3 Maan e fa sa wie mun ɔ nin sunnzun ase e yiyi e ndɛ’n nun: Zoova maan Naɔm fali Ninivu i nunnunlɛ’n sunnzunnin Eziptifuɛ’m be klɔ nga be flɛ i No-Amɔn i liɛ’n. Asirifuɛ mun yɛ be nunnunin klɔ sɔ’n niɔn. (Naɔ. 3:8-10) Kɛ é kán mɛn nga i nunnunlɛ’n ndɛ é klé sran mun’n, e kwla yiyi wafa nga Biblu’n kle kɛ ndɛ kwlaa nga Zoova kan’n, be kpɛn su sɛsɛsɛ’n nun. I wie yɛle sa ng’ɔ juli afuɛ nga be flɛ i 632 nun ka naan Klistfuɛ’m be blɛ’n w’a ju’n. Afuɛ sɔ’n nun’n, Babilɔnifuɛ mun nin Mɛdifuɛ’m be bali Ninivu klɔ’n i utulɛ. Kusu nn klɔ sɔ’n i wun talɛ’n timan blɛblɛ. Sanngɛ nzue m’ɔ tɔli dan’n ti’n, Tigri nzue ba’n yili lele ɔ buli klɔ’n i wun talɛ’n i bue kun. Ɔ maan be kwla utuli Ninivu klɔ’n, kɛ Zoova fa kannin’n sa cɛ.—Naɔ. 1:8; 2:7.
4. ?Ngue yɛ e kwla yo naan e jasin nga e bo’n w’a yo weiin naan sran’m b’a wun i wlɛ ɔ?
4 Maan e kan ndɛ’n weinwein naan be wun i wlɛ: Kɛ Naɔm klɛ́ ndɛ’n, ɔ yiyili nun kpa. I ndɛ’n ti weiin. Ɔ maan ɔ wluwluli sran’m be wun. (Naɔ. 1:14; 3:1) I wafa kunngba’n, e kunndɛ kɛ e ndɛ’n yo pɔpɔ naan sran’m be wun i wlɛ weiin. (1 Kor. 14:9) I sɔ’n ti’n, kɛ e ko to sran kun’n, maan e yiyi e ndɛ’n nun weiin naan ɔ wun i wlɛ. Kɛ é klé sran’m be Biblu’n nun like’n, maan e uka be naan be lafi Zoova nin i Ndɛ’n su. Maan be wun i wlɛ kɛ ndɛ nga e su kan’n, ɔ ti be liɛ wie.—Rɔm. 10:14.
5. ?Wafa sɛ yɛ Ɲanmiɛn nuan ijɔfuɛ Naɔm i ndɛ’n gua e awlɛn su nzue ɔ?
5 Naɔm fluwa’n nun’n, e wun kɛ i bɔbɔ lafi su kpa kɛ ndɛ kwlaa nga Zoova kan’n, be kpɛn su kpan. Ɲanmiɛn seli kɛ “be su mianmian-man amun kun.” Satan i mɛn’n i awieliɛ mɔ w’a mantan koko yɛ’n nun’n, ndɛ sɔ’n gua e awlɛn su nzue.—Naɔ. 1:9.