Maan e yia sran mun trele

1. ?Blɛ benin nun yɛ é bó sran’m be yialɛ bo ɔ?

¹ Maan e se kɛ amun su tɔn aliɛ fɛfɛ kpa kun fá síe amun janvuɛ mun annzɛ amun awlofuɛ mun. Aliɛ sɔ’n, nán cɛn ngba yɛ be ɲɛn i be di ɔ. Asa ekun’n, i tɔnlɛ’n leman ba. Kpɛkun amun boli i wun kalɛ dan. ?Sɛ amun wie aliɛ sɔ’n i tɔn naan amún yía sran mun kɛ be wa di’n, amun su yiaman be juejue su? I kunngba’n, sɛ é kwlá sé’n, aliɛ nga é wá dí i e nvle kun aɲia’n i bo’n, i wun junman’n timan blɛblɛ. I sɔ’n ti, le mɔcuɛ nsan ka naan y’a bo aɲia sɔ’n i bo’n, é wá yía sran mun naan be trɛn i bo wie. ?Ngue yɛ ɔ́ úka e naan y’a yia sran mun juejue su ɔ?

2. ?Ngue yɛ ɔ kwla uka e naan y’a tu e klun y’a yia sran mun ɔn?

² Sɛ e waan é tú e klun é yía sran mun’n, maan e bu like nga Zoova kle e aɲia’m be bo’n i su ye nga e bɔbɔ e ɲɛn i’n i akunndan. (Eza. 65:13, 14) Maan ɔ tran e klun titi kɛ, kɛ e yia sran mun e aɲia dandan’m be bo’n i bo gua kpa. (An nian kuku nga be flɛ i “I bo gua kpa” nun.) Ɔ ti su kɛ be nga e yia be’n be nun wie mun be ba, wie’m be kusu be baman. I kwlaa yoli o, kɛ e tu e klun e yia sran mun’n, i sɔ’n manman Zoova, kpɛkun ɔ yi i klun ufue’n i nglo.—Jue. 145:3, 7; Ngl. 22:17.

3. ?Ajalɛ benin yɛ e kwla fa naan y’a yia sran mun ɔn?

³ Maan asɔnun kpɛnngbɛn’m be fa ajalɛ wie mun naan asɔnun’n nunfuɛ’m b’a kwla yia sran kpanngban. I wie yɛle kɛ, sɛ be klo’n, be kwla fa ajalɛ kɛ, aniaan mun bé fá sran’m be yialɛ fluwa’n bé wlɛ́ i be nga be toman be awlo’n, be anuan’n i bo. Annzɛ bé kɔ́ akpɔ’m be nuan bé kó yia sran mun. Fue cɛn nin Mɔnnɛn cɛn’n, kɛ aniaan’m bé yía sran mun’n, be kwla fa periodiki’m be nannan su wie. Kɛ sran’m be yialɛ blɛ’n ko sin’n mɔ e wun kɛ e tuli e klun e yiali sran kpanngban’n, e di aklunjuɛ. Afin, sɛ é kwlá sé’n, e yiali be kɛ be wa di aliɛ fɛfɛ nga Zoova mannin e’n wie.

I bo gua kpa

I afuɛ kpanngban yɛ, kɛ aniaan bla kun yía sran mun e nvle kun aɲia kun bo’n, w’a bumɛn i kɛ junman sɔ’n i bo’n gúa kpa. Ɔ seli i klun lɔ kɛ: ‘?Sran nga e su yia be yɛ’n, bé trán aɲia’n i bo sakpa?’ Sanngɛ Fue cɛn nglɛmun’n, aɲia’n i bo lɔ’n, ɔ wunnin kɛ bian kun ti i wun lɛ. Bian sɔ’n o Ɲanmiɛn sulɛ wafa uflɛ kun nun. Aniaan bla’n fali ijɔlɛ wlali bian sɔ’n i nuan. Be yalɛ kokolɛ’n nun’n, aniaan bla’n wunnin i wlɛ kɛ, aniaan mun yɛ be yiɛli i ɔ. Ɔ usali aniaan bla’n i kosan kpanngban. Yɛ aniaan bla’n tɛli i su. Bian’n seli kɛ aɲia’n yoli i fɛ dan. Naan wafa nga aniaan’m be wlawla be wun’n, ɔ nin be ayeliɛ’n ɔ yo i ɲɛnnɛn. Cɛn kunngba sɔ’n nun’n, aniaan bla’n ɔ nin bian kun nin i yi be kokoli yalɛ wie. Be miannin be ɲin kpa naan b’a kwla tran aɲia’n i bo. Be kusu aniaan mun yɛ be yiali be wie ɔ. Aɲia’n i bo tranlɛ’n yoli be fɛ. Ɔ maan be fali ajalɛ kɛ bé trán aɲia’n i bo ekun Mɔnnɛn cɛn. I lɛ’n nun’n, aniaan bla’n wunnin i wlɛ kɛ, kɛ e yia sran mun’n i bo gua kpa.
Koko nun wa’n, aɲia dan kun bo’n, aniaan bian kun nin i yi mɔ be ti titi atin bofuɛ’n, be fali be ɲin sieli bian oke kun nin i yi be su. Bian sɔ’n nin i yi’n be waan kpalɛ klikli nga bé trán e aɲia kun bo’n yɛ ɔ o lɛ ɔ. Aniaan’m be usali be kɛ: “?Wan yɛ ɔ yiali amun ɔn?” Be tɛli su kɛ: “Cɛn kun’n, kɛ e fiteli mɔ é bá’n, e wunnin sran’m be yialɛ fluwa kun e anuan’n i bo.” Kɛ be wunnin fluwa’n, be kanngannin nun. Kpɛkun be klɛli be dunman’n, ɔ nin be adrɛsi’n fluwa’n su naan Zoova i Lalofuɛ’m be wa nian be osu. Aɲia’n i bo lɔ’n, be nin aniaan wie mun be dili like likawlɛ. Aɲia’n yoli be fɛ dan. I sɔ’n ti’n, be seli kɛ, sɛ aliɛ cɛn’n, bé trán aɲia’n i bo ekun. Ɔ maan, aniaan’m be fali ajalɛ kɛ bé kó nían be osu naan bé klé be Biblu’n nun like.