Maan e bo jasin fɛ’n i kpa tra laa: E bo jasin fɛ’n aata dilɛ lika’m be nun

?Ngue ti yɛ ɔ ti cinnjin ɔn? Sran sunman be kɔ junman be baman ndɛ. I sɔ’n ti’n, sɛ e waan é bó jasin fɛ’n é klé be’n, ɔ fata kɛ e wɔ be junman’n su lɔ. Aata dilɛ lika’m be nun jasin fɛ’n bolɛ’n yo fɛ, yɛ i bo kwla gua kpa. Afin, e to aata difuɛ mun titi. Be bu i kɛ y’a ba like tolɛ. I ti’n, be sɔ e nun klanman. Sɛ e waan e junman’n i bo gua kpa’n, ɔ fata kɛ e yo ninnge mun ngwlɛlɛ su, yɛ e wlawla e wun kpa. (2 Kor. 6:3) I sɔ’n ti’n, ɔ fata kɛ aniaan ng’ɔ nian jasin fɛ’n bolɛ junman’n su’n, ɔ bu sa sin kpa naan w’a siesie blɛ’n ɔ nin aniaan nga bé kó bó jasin fɛ’n lɔ’n.

?Wafa sɛ yɛ é yó i sɔ ɔ?

Maan e kan ndɛ’n i kpe kan. Afin sɛ e fa sran’n i blɛ’n, atrɛkpa’n cɛn uflɛ’n, ɔ su manman e blɛ kun.
Blɛ mɔ junman w’a sɔnman aata difuɛ’m be su’n, yɛ ɔ fata kɛ e ko wun be wun ɔn. Ɔ kwla yo blɛ mɔ be tikeli be anuan mun ɔ nin a cɛman’n.
Maan e dun mmua e kan ndɛ’n i aklunjuɛ su, e kle sran nga i liɛ yɛle aata dilɛ lika’n. E kwla se i kɛ: “E bali amun osu nianlɛ kan afin be toman aata difuɛ’m be awlo sa. E su cɛman.” Kan ndɛ’n i kpe kan. Kpɛkun, fa fluwa nɲa kun, annzɛ periodiki mun, annzɛ fluwa uflɛ mɛn i. Kɛ ɔ ko yo naan w’a bumɛn i kɛ e su yo like atɛ’n, sɛ i bɔbɔ w’a kɛnmɛn i klunklo like manlɛ ndɛ’n, nán e se i kɛ ɔ mɛn i klunklo like.
Sɛ sran ng’ɔ le lika’n sɔ e nun klanman’n, e kwla srɛ i atin kɛ é bó jasin fɛ’n i kpe kan é klé be ng’ɔ nin be di junman’n. Lika wie’m be nun’n, aata difuɛ’m be le be like diwlɛ. E kwla usa sɛ e kwla yaci e fluwa wie’m be lɔ o.
Maan e yo ninnge mun ngwlɛlɛ su. I wie yɛle kɛ, sɛ aata difuɛ’n nin sran wie su koko yalɛ’n, annzɛ junman sɔn i su’n, maan e minndɛ kɛ ɔ ɲɛn i ti ka naan y’a wunnge i wun lɔ.

Anglo nga nun’n, maan e yo nga e nian:

Kɛ amún wá sú Ɲanmiɛn awlo lɔ’n, wafa nga amun kwla bo jasin fɛ’n i kpe kan aata dilɛ lika’m be nun’n, amun yi i nglo.