Maan e bo jasin fɛ’n i kpa tra laa: E uka like suanfuɛ mun naan be si like suanlɛ’n i wun ngwlɛlɛ

?Ngue ti yɛ ɔ ti cinnjin ɔn? Kɛ ɔ ko yo naan Biblu’n nun like suanfuɛ’m be ɲin w’a ti Ɲanmiɛn i sulɛ nun’n, nán ninnge nga e fa bo Ɲanmiɛn i silɛ bo’n be ngunmin yɛ ɔ fata kɛ be suan ɔn. (Ebr. 5:12–6:1) Like suanlɛ’n, ɔ timan pɔpɔ. I wie yɛle kɛ, kɛ é súan like’n, e fa like uflɛuflɛ nga e suan’n, e sunnzun nga e si i laa’n, kpɛkun e bu wafa nga e kwla nanti su’n i akunndan. (Nya. 2:1-6) Sɛ like suanfuɛ’m be bɔbɔ be si like kunndɛ’n, i sɔ’n úka be naan b’a wun Ɲanmiɛn Ndɛ’n i su kosan’m be su tɛlɛ nga be o e fluwa’m be nun’n. Be ɲin nga be mian be nanti like nga be suan’n su’n, kɛ bé wá káci Klistfuɛ’n, ɔ́ úka be naan b’a kwla jran be su sa’m be ɲrun kekle.—Lik 6:47, 48.

?Wafa sɛ yɛ é yó i sɔ ɔ?

Kan tin su kpa kɛ ɔ ti cinnjin kɛ, kwlaa naan w’a suan like’n, ɔ fata kɛ ɔ srɛ Zoova.—Zan 14:26; 1 Kor. 2:10.
Kɛ amun bo Biblu’n nun like suanlɛ’n i bo cɛ’n, wla like suanfuɛ’n i fanngan kɛ, ka naan w’a ba’n, maan ɔ dun mmua siesie i wun. Tike ɔ fluwa liɛ’n i su kle i. Kpɛkun kle i wafa ng’ɔ kwla jaja ndɛ cinnjin’m be ngunmin be bo’n.
Se like suanfuɛ’n naan wafa ng’ɔ fa wun ndɛ’n i wlɛ’n i su yɛ ɔ nian tɛ kosan’m be su ɔ. Nán ɔ kanngan kosan’m be su tɛlɛ mun sa tɛɛn guɛ i lɔ.
Wla like suanfuɛ’n i fanngan naan ɔ kanngan Ɲanmiɛn Ndɛ’n nun cɛn kwlakwla. Fa Biblu’n nun kannganlɛ’n i siesielɛ ng’ɔ o jw.org/fr su’n kle i, naan ɔ wun wafa ng’ɔ kwla nian su kanngan Biblu’n nun’n. Sɛ e waan é kánngan Biblu’n nun cɛn kwlakwla’n, ɔ fata kɛ e fua kpa kɛ é yó i sɔ. Sɛ e mian e ɲin e yo sɔ’n kusu’n, saan i bo’n gúa kpa mán e.—Jue. 1:2, 3.
Kle like suanfuɛ’n wafa ng’ɔ kwla fa Zoova i Lalofuɛ’m be like kunndɛlɛ fluwa kunndɛ Ɲanmiɛn Ndɛ’n i su kosan’m be su tɛlɛ’n. Kpɛkun wafa ng’ɔ kwla fa Watchtower Library nin e ƐNTƐNƐTI SU FLUWA’M BE SIESIEWLƐ kunndɛ kosan’m be su tɛlɛ’n, kle i wie. Fluwa nga e fa be e di junman e aɲia’m be bo’n, kle i fluwa mma kpekpe nga e fa sie be nzɔliɛ’n. I wie yɛle kɛ, fluwa mma nga e fa sie e fluwa Jasin fɛ kpa kun fin Ɲanmiɛn! i nzɔliɛ’n yɛle fg.

Anglo nga nun’n, maan e yo nga e nian:

Kɛ amun ko wie ndɛ ce kun annzɛ ndɛ tre kun i nun like suan’n, amun se like suanfuɛ’n naan ɔ bo like nga amun suannin’n, i kpɔlɛ kan. Sɛ amun leman Biblu’n nun like suanfuɛ’n, Biblu’n i bue annzɛ Sasafuɛ Tranwlɛ’n i ndɛ kpɔlɛ nga amun kanngan nun’n,amun bo i kpɔlɛ kan. I sɔ’n úka amun naan amun a wun ndɛ’m be wlɛ kpa.