“Fie’m be su ninnge’m be yoli kpa, Nyanmiɛn b’ɔ ti e Nyanmiɛn’n, ɔ yo e wun sa ye.”—Jue Mun 67:7.

A kwla ɲan ninnge nga Ɲanmiɛn waan ɔ́ yó be’n be su ye wie

Ɲanmiɛn tɛli i nuan ijɔfuɛ Abraamun i nda kɛ ɔ́ sín i anunman’m be nun kun i lika yó “asiɛ’n su nvlenvle’m be kwlaa” be ye. (Bo Bolɛ 22:18) ?Abraamun i anunman sɔ’n yɛle wan?

Kɛ afuɛ kɔe 2.000 sinnin’n, Ɲanmiɛn mannin Zezi m’ɔ ti Abraamun i anunman’n i tinmin naan ɔ yo abonuan sa mun. Abonuan sa sɔ’m be kle kɛ Klisi Zezi dunman nun yɛ nvlenvle’m be nunfuɛ’m bé ɲán ye nga Ɲanmiɛn seli kɛ ɔ́ yó Abraamun’n niɔn.—Galasifuɛ Mun 3:14.

Abonuan sa nga Zezi yoli be’n ti’n, e wun i wlɛ kɛ ɔ ti be nga Ɲanmiɛn sín be lika yrá sran’m be su’n, be nun kun. Kpɛkun e wun wafa nga Ɲanmiɛn sín i lika yrá sran’m be su titi’n, i wlɛ. Abonuan sa nga Zezi yoli be’n, be nun wie’m be yi i nzuɛn wie’m be nglo. Maan e fa e ɲin e sie i abonuan sa sɔ’m be su.

Zezi yoli tukpacifuɛ’m be juejue. I sɔ’n kle kɛ sran’m be ndɛ lo i.

Cɛn kun’n, kokowefuɛ kun srɛli Zezi kɛ ɔ yo i juejue. Kɛ ɔ yoli sɔ’n Zezi kɛnnin i, kpɛkun ɔ seli i kɛ: “Ɔ ti min klun su!” Be ja nun lɛ’n, bian’n i kokowe’n wieli weiin.—Marki 1:40-42.

Zezi mannin sran’m be aliɛ. I sɔ’n kle kɛ ɔ ti aklunyefuɛ.

Zezi kloman kɛ awe kun sran mun. Ɔ maan ɔ mannin sran’m be aliɛ kpɛ sunman. I sɔ yolɛ nun’n cɛn kun’n, kɛ ɔ srɛli kpanwun nin jue kanngan wie’m be su’n, be wa sɔnnin kpa. Ɔ maan sran kpanngban kpa be ɲannin aliɛ be dili. (Matie 14:17-21; 15:32-38) Be dili i lele be ku yili yɛ i wie kali bɔbɔ. Ng’ɔ kali’n sɔnnin kpa.

Zezi cɛnnin be nga be wuli’n. I sɔ’n kle kɛ ɔ si aunnvuɛ.

Cɛn kun’n, angbeti bla kun i wa yasua kunngba cɛ’n wuli. Kɛ Zezi wunnin bla’n “ɔ yoli i annvɔ.” Afin ɔ leman sran niɛnmɛn i lika kun. I sɔ’n ti’n, ɔ cɛnnin bla’n i wa’n.—Liki 7:12-15.

ƝANMIƐN WÁ YRÁ ASIƐ’N SUFUƐ’M BE SU

Zezi w’a dun mmua w’a yi i nglo kɛ Ɲanmiɛn le tinmin naan ɔ kwla yo ninnge kpakpa fanunfanun man sran mun. Ɔ ka kan’n, kɛ nga Zezi fa kannin sa’n, ɔ́ bá kpɛkun ɔ́ fá tinmin nga Ɲanmiɛn m’ɔ kwla like kwlaa yo’n fa mɛnnin i’n, ɔ́ yó abonuan sa mun asiɛ wunmuan’n su.

?Kɛ Ɲanmiɛn wá yía nda ng’ɔ tali Abraamun’n i nuan’n, asiɛ’n su tranlɛ’n yó sɛ? Be nga be klo Ɲanmiɛn mɔ be ɲin yi i’n, ‘mɛn’n [asiɛ’n] ɔ́ wá yó be liɛ.’ Kpɛkun “be wun jɔ́ be kpa fɔuun!” (Jue Mun 37:11) Asa ekun’n, “wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.” —Sa Nglo Yilɛ 21:4.

Kɛ é wá trán mɛn klanman nun tititi asiɛ’n su wa’n, nanwlɛ aklunjuɛ’n kún e kpo. E kunndɛ kɛ amun si ninnge nga Ɲanmiɛn i Famiɛn dilɛ blɛ’n nun’n é wá ɲán be’n, i su ndɛ kpa ekun. I sɔ’n ti’n, amun wɔ e ɛntɛnɛti adrɛsi www.jw.org/bci su.