ƝANMIƐN NDƐ’N NUN NINNGE KPAKPA WIE MUN

Zoova siesieli i nvle’n akpasuaakpasua

[Bo Kalɛ fluwa’n i su fitilɛ video’n.]

Izraɛlifuɛ’m be trannin akpasua nsannsan. (Ka 1:52, 53; w94-F 1/12 9 § 4)

Izraɛlifuɛ’m be kwlaa be nuan ti sran miliɔn nsan (3.000.000) annzɛ miliɔn nsan tra su. (Ka 2:32, 33; it-1-F 385 § 7)

Zoova kunndɛman kɛ i sulɛ nun’n i sufuɛ’m be yo ninnge mun sukusuku. Sɛ Zoova seli Izraɛlifuɛ’m be kɛ nán be yo ninnge mun sukusuku’n, e kusu ɔ fataman kɛ e yo ninnge mun sukusuku.—1Ko 14:33, 40.

Desɛn nga kle wafa nga Izraɛlifuɛ’m be trannin akpasuaakpasua’n. Ɲanmiɛn i tannin sua’n o be afiɛn. Be nga be mantan Ɲanmiɛn i tannin sua’n i wun koko’n be yɛle Levifuɛ mun: Aarɔn o wia afiliɛ, Keatifuɛ’m be o ngua lɔ lika’n nun, Gɛɛsɔnunfuɛ be o wia atɔliɛ lɔ, yɛ Mɛrarifuɛ’m be o nglo lɔ lika’n nun. Izraɛli akpasua 12 be liɛ’n be o Ɲanmiɛn i tannin sua’n i wun mmua. Be nga be o wia afiliɛ lɔ’n be yɛle Isakaa, Zida ɔ nin Zabilɔn. Be nga be o ngua lɔ lika’n nun’n be yɛle Gadi, Ribɛnin ɔ nin Simeɔn. Be nga be o wia atɔliɛ lɔ’n be yɛle Bɛnzamɛn, Efraimun ɔ nin Manase. Be nga be o nglo lɔ lika’n nun’n be yɛle Nɛftali, Dan ɔ nin Azɛɛ.

USA Ɔ WUN KƐ: ‘?Ngue yɛ n kwla yo n kle kɛ n suan Zoova i anuannzɛ’n i bo kpa ekun-ɔn?’