Maan e yi sran klolɛ’n i nglo awlobo’n nun

Klolɛ’n yo maan awlobo nunfuɛ’m be afiɛn mantan kpa. Sɛ be kloman be wun’n be bo su yoman kun. ?Wafa sɛ yɛ awlobo’n nun’n, yasua, bla ɔ nin siɛ nin niɛn’m be kwla kle kɛ be klo be wiengu-ɔ?

Yasua ng’ɔ klo i yi’n ɔ fɛ i ɲin sie i ninnge nga i yi’n mian be wun’n be su yɛ ɔ fɛ i su sie i nuan bo. Asa’n wafa nga i yi’n i wun yo i’n ɔ miɛn i ɲin naan w’a wun i wlɛ wie. (Efɛ 5:28, 29) Like nga i awlobofuɛ’m be mian be wun’n ɔ fa man be yɛ ɔ uka be naan be nin Zoova be afiɛn mantan. Yɛlɛ kɛ ɔ miɛn i ɲin naan b’a kwla su Ɲanmiɛn awlo lɔ titi. (1Ti 5:8) Bla ng’ɔ klo i wun’n kɛ i wun’n fa ajalɛ’n ɔ suɛn i bo yɛ ‘i ɲin yi i kpa.’ (Efɛ 5:22, 33; 1Pi 3:1-6) Maan yasua’n ɔ nin bla’n be yaci be wiengu wun sa cɛ klun ufue su. (Efɛ 4:32) Siɛ nin niɛn nga be klo be mma mun’n, be kle kɛ be mma’m be tinuntinun be ndɛ lo be yɛ be kle be like naan be klo Zoova. (Mml 6:6, 7; Efɛ 6:4) ?Suklu lɔ’n sa benin yɛ ɔ tɔ be mma’m be su-ɔ? ?Wafa sɛ yɛ be jran yalɛ nga be wiengu’m be kle be’n i ɲrun kekle-ɔ? Kɛ awlobo nunfuɛ’m be klo be wun’n be wun kpaja be yɛ srɛ kunman be.

AN NIAN VIDEO NGA BE FLƐ I KƐ MAAN E YI SRAN KLOLƐ’N I NGLO AWLOBO’N NUN TITITI. I SIN’N, AN TƐ KOSAN NGA’M BE SU:

• 

  ?Yasua ng’ɔ klo i yi’n wafa sɛ yɛ ɔ kle kɛ ɔ niɛn i lika-ɔ?

• 

  ?Bla ng’ɔ klo i wun’n wafa sɛ yɛ ɔ kle kɛ i ɲin yi i wun’n kpa-ɔ?

• 

  ?Siɛ nin niɛn nga be klo be mma mun’n ngue like yɛ be yo naan be mma’m b’a klo Ɲanmiɛn Ndɛ’n niɔn?