Atin bolɛ junman’n

Kɛ é sú Zoova mɔ e sunnzun kɛ é yó ninnge wie mun’n, i sɔ’n yo maan e saciman e wunmiɛn’n sa ngbɛn. (1Ko 9:26) Ɔ ka kan’n mɛn’n wíe. Ɔ maan kɛ e fa ninnge wie mun e sie e ɲrun kɛ é yó be’n, i sɔ’n uka e naan y’a fa e blɛ’n y’a yo like kpa. (Efɛ 5:15, 16) Kɛ ɔ́ fɛ́ Sɛptanblu i le 1 m’ɔ́ fá jú afuɛ ng’ɔ́ bá lɛ’n Utu i le 31 su’n, kɛ amún sú Ɲanmiɛn awlo lɔ’n amun kwla bu ninnge nga amun kwla yo be blɛ’n sɔ’n nun’n be akunndan. Kɛ ɔ ko yo naan amun a kwla yo i sɔ liɛ’n e aɲia fluwa nga nun’n, be boboli ninnge nga amun kwla yo be’n be nun wie’m be su. Ɔ maan amun kwla fa amun ɲin sie be su yɛ amun kwla fa wlɛ i srɛlɛ’n nun.—Zak 1:5.

I wie yɛle kɛ amun awlobo’n nun’n amun kwla uka sran kun naan w’a kaci titi atin bofuɛ. Sɛ sran sɔ’n bu i kɛ ɔ kwlá diman dɔ ng’ɔ fata kɛ ɔ di’n, maan ɔ bo su kle atin bofuɛ kun mɔ sa kunngba’n wie o i su’n. (Nya 15:22) Asa’n kɛ amún sú Ɲanmiɛn awlo lɔ’n, amun kwla yia atin bofuɛ kun kpɛkun sran’n kwla usɛ i kosan wie mun. Kpɛkun i sin’n maan ɔ siesie i blɛ’n. Sɛ a yoli atin bofuɛ laa naan a kunndɛ kɛ á yó i ekun’n bu i akunndan nian sɛ a kwla yo-o.

Amun awlobo’n nun’n sran kun kwla fa anglo kun annzɛ anglo kaka di cɛn kunngun atin bolɛ junman’n. Sɛ sa wie ti’n a leman wunmiɛn naan ɔ waan á dí cɛn kunngun atin bolɛ junman’n, aliɛ ba kwlaa nun’n a kwla fa blɛ kan bo jasin fɛ’n. Atrɛkpa’n a di junman annzɛ a kɔ suklu. Ɔ maan lemɔcuɛ afiɛn nun’n a kwlá boman jasin fɛ’n. Sɛ ɔ ti sɔ’n anglo nga i nun lemɔcuɛ’m be ti nnun’n annzɛ kusu blɛ nga a lo wunmiɛn’n nun a kwla di cɛn kunngun atin bolɛ junman’n. Ɔ maan amun fa kanandrie kun naan amun klɛklɛ blɛ nga amun kunndɛ kɛ amún dí cɛn kunngun atin bolɛ junman’n i su.—Nya 21:5.

AN NIAN VIDEO NGA BE FLƐ I KƐ MAAN AMUN YO YAKPAFUƐ: ATIN BOFUƐ MUN. I SIN’N, AN TƐ KOSAN NGA’M BE SU:

• ?Wafa sɛ yɛ Zoova niannin aniaan bla Aamandi i lika-ɔ? ?Ngue yɛ i sɔ’n kle e-ɔ?