LIKE NGA KLISIFUƐ’M BE YO’N
Kɛ be kle ɔ yalɛ suklu lɔ’n fa ɔ wla guɛ i Zoova su
Suklu lɔ’n, suklu ba wie’m be kle be wiengu’m be yalɛ. Ɔ ju wie’n, be kwla yo be like yaya. I ti’n, be wla bo be wun. Sɛ be tanndan e ɲrun Ɲanmiɛn sulɛ nun naan e lo e wun e man be’n, e nin Zoova e afiɛn kwla saci. ?Ngue yɛ a kwla yo naan w’a sasa ɔ wun-ɔn?
Kɛ Zoova i sufuɛ kpanngban be fali be wla be guɛli i su’n, be kwla jrannin be nga be kle be yalɛ’n be ɲrun kekle. (Ju 18:17) I wie yɛle Ɛstɛɛ i liɛ’n. Ɔ kannin like nga Aman kunndɛ kɛ ɔ́ fá yó be’n i ndɛ. (Ɛst 7:1-6) Kwlaa naan w’a yo sɔ kusu’n, ɔ kleli kɛ ɔ lafi Zoova su. Yɛle kɛ ɔ cili nglɛmun. (Ɛst 4:14-16) I sɔ’n ti’n, Zoova yrɛli i su yɛ ɔ sɛsɛli i nin i nvlefuɛ mun.
Gbanflɛn nin talua mun, sɛ sran kun kle amun yalɛ suklu lɔ’n, amun srɛ Zoova kɛ ɔ uka amun. Asa’n, amun bo su kle sran kaklaka kun. Ɔ kwla yo amun si annzɛ amun nin. Amun kwla lafi su kɛ Zoova úka amun kɛ ng’ɔ fa ukali Ɛstɛɛ sa. ?Like uflɛ benin yɛ amun kwla yo naan amun a jran yalɛ nga be kle amun suklu lɔ’n i ɲrun kekle-ɔ?
AN NIAN VIDEO NGA BE FLƐ I KƐ GBANFLƐN NIN TALUA BLƐ’N—?KƐ BE KLE MIN YALƐ SUKLU LƆ’N Ń YÓ SƐ NAAN M’AN JRAN KEKLE? I SIN’N, AN TƐ KOSAN NGA’M BE SU:
?Ngue yɛ Saali nin Ferinin be su ndɛ’n kle gbanflɛn nin talua mun-ɔn?
?Wafa sɛ yɛ ndɛ nga Saali nin Ferinin be kannin’n ɔ kwla uka siɛ nin niɛn mun naan b’a uka be mma mun-ɔn?