Fa JW.ORG i bo bolɛ lika’n bo jasin fɛ’n

Wafa nga be siesieli e ɛntɛnɛti adrɛsi’n i bo bolɛ lika’n ɔ yo ɲɛnmɛn. Afin be siesieli ndɛ wie mun nin video’m be lɔ. Ɔ maan kɛ be nga be suman Zoova’n be kɔ lɔ’n, be kunndɛ kɛ bé sí nun kpa ekun. (Yol 13:48) Kpɛ sunman’n be yiyi sa nga be ju mɛn’n nun’n nin sa nga sran’m be kan be ndɛ’n be nun.

?Wafa sɛ yɛ a kwla fa jw.org i bo bolɛ lika’n bo jasin fɛ’n niɔn?

• Kɔ lɔ tikatika. Klɛ ndɛ nga be yiyi be nun lɔ’n be nun wie mun sie. Yɛ bu wafa nga a kwla fa uka sran kun’n i akunndan. (Sɛ a kunndɛ kɛ á wún ninnge nga be kannin be ndɛ ɔ nin-a cɛman’n, tin kan be klɛli lɛ kɛ “Nian wie ekun” su.) Sɛ e kɔ e ɛntɛnɛti adrɛsi’n su tikatika’n, ɔ́ yó maan jasin fɛ bolɛ nun’n, é ɲán ndɛ é kɛ́n i titi.

• Ndɛ nin video nga be o e ɛntɛnɛti adrɛsi’n i bo bolɛ lika nun’n be uka e naan e nin sran mun y’a bo yalɛ kokolɛ bo. Ninnge sɔ’m be kwla uka e naan y’a si akunndan nga sran nga be o e jasin bowlɛ lika’n nun’n be bu’n.

• Fa e ɛntɛnɛti adrɛsi’n i bo bolɛ lika’n kle sran mun. Fa be ɲin sie i ndɛ ng’ɔ lo be’n su yɛ kle be wafa nga be ngunmin be kwla kunndɛ ninnge’m be lɔ’n.

• Fa ɛntɛnɛti ɲanman’n man sran mun. Sran wie’m be kunndɛman kɛ be nin é kókó yalɛ. Sanngɛ be kwla kplin su kɛ bé kɔ́ e ɛntɛnɛti adrɛsi’n su. Ɔ maan nán e sisi e bo naan y’a fa ndɛ nin video’m be ɛntɛnɛti ɲanman nga be o e ɛntɛnɛti adrɛsi’n i bo bolɛ lika’n nun’n y’a ko man be.