?Wafa sɛ yɛ Ɲanmiɛn srɛlɛ’n kwla uka e-ɔ?

Be flɛ bla kun kɛ Pamela. Kɛ tukpacɛ kekle kun yoli i’n, ɔ ɔli dɔɔtrɔ. Sanngɛ ɔ srɛli Ɲanmiɛn kɛ ɔ ukɛ i naan w’a kwla jran sa sɔ’n i ɲrun kekle. ?Ɲanmiɛn srɛlɛ’n ukɛli i sakpa?

Pamela seli kɛ: “Kɛ bé yó min are’n, ɔ ju wie’n srɛ kunnin min dan kpa. Sanngɛ kɛ n srɛ Zoova’n i sɔ’n yo maan min wla gua ase. Kpɛkun srɛ kunman min kun. Kannzɛ min tukpacɛ’n nin-a wieman’n sanngɛ Ɲanmiɛn srɛlɛ’n uka min naan min akunndan’n w’a sannganman. Kɛ sran’m be usa min wafa nga min wun yo min’n, n se be kɛ n timan juejue sɔ sanngɛ n di aklunjɔɛ.”

Ɔ fataman kɛ e minndɛ kɛ tukpacɛ kekle wie yo e annzɛ sa kekle wie’m be tɔ e su ka naan y’a srɛ Ɲanmiɛn. Sa tɔ e kwlakwla e su yɛ ɔ ju wie’n ɔ fata kɛ be uka e naan y’a jran sa sɔ’m be ɲrun kekle. ?I lɛ nun’n, wafa sɛ yɛ Ɲanmiɛn srɛlɛ’n kwla uka e-ɔ?

Biblu’n se kɛ: “To ɔ ti su trɔ’n yi i Zoova su, yɛ ɔ́ súan ɔ bo. Ɔ su kplinman su le kɛ sran kpa’n ɔ tɔ.” (Jue Mun 55:22) Nanwlɛ, ndɛ sɔ’n wla fanngan dan. ?Ɔ maan wafa sɛ yɛ Ɲanmiɛn srɛlɛ’n kwla uka e-ɔ? Kɛ e srɛ Ɲanmiɛn kɛ ng’ɔ nin i fata’n sa’n, ɔ man e like kwlaa nga e sa miɛn i wun’n, naan y’a kwla jran e su sa’m be ɲrun kekle.—An nian kuku nga be flɛ i kɛ “?Wafa sɛ yɛ Ɲanmiɛn srɛlɛ’n kwla uka wɔ-ɔ?” i nun.

?Wafa sɛ yɛ Ɲanmiɛn srɛlɛ’n kwla uka wɔ-ɔ?

Kɛ e srɛ Ɲanmiɛn’n e wla gua ase

“Sa kwlaa ng’ɔ o amun su’n, an koko kle Ɲanmiɛn. […] Yɛ aunjɔɛ nga Ɲanmiɛn man mɔ sran fi kwlá simɛn i bo’n, ɔ́ yó maan Klisi Zezi ti’n amun wla guá ase, yɛ amun akunndan’n su sannganman.” (Filipufuɛ Mun 4:6, 7) Sɛ e kan sa kwlaa ng’ɔ o e su’n e kle Ɲanmiɛn’n, ɔ́ yó maan e wla gúa ase kpɛkun é yó ninnge mun ngwlɛlɛ su.

Kɛ e srɛ Ɲanmiɛn’n ɔ man e ngwlɛlɛ

“Sɛ amun nun wie wunman sa wlɛ’n, maan ɔ srɛ Ɲanmiɛn titi kɛ ɔ mɛn i ngwlɛlɛ. Like ng’ɔ srɛ i’n, ɔ́ fá mɛ́n i. Afin Ɲanmiɛn liɛ’n, ɔ man sran’m be kwlaa be like klun ufue su, yɛ kɛ ɔ́ yó sɔ’n ɔ ijɔmɛn i sin.” (Zaki 1:5) Kɛ sa kekle wie o e su’n, blɛ sunman nun e fa ajalɛ tɛ. Sɛ e srɛ Ɲanmiɛn kɛ ɔ man e ngwlɛlɛ’n, ɔ kwla yo maan e wla kpɛn Biblu’n nun ndɛ wie mɔ be kwla uka e’n be su.

Kɛ e srɛ Ɲanmiɛn’n ɔ fɔnvɔ e kpɛkun ɔ man e wunmiɛn

“Sa kwlaa nun’n, sran ng’ɔ man min tinmin’n ti’n, n le wunmiɛn.” (Filipufuɛ Mun 4:13) Zoova kwla like kwlaa yo. Ɔ maan ɔ kwla man e wunmiɛn naan y’a jran sa kwlaa nga be tɔ e su’n, be ɲrun kekle. (Ezai 40:29) Biblu’n se kɛ Zoova “ti Ɲanmiɛn m’ɔ fɔnvɔ sran sa kwlaa nun.” Ɔ maan ɔ fɔnvɔ e “sa kwlaa nga be tɔ e su’n be nun.” —2 Korɛntifuɛ Mun 1:3, 4.

?ƝANMIƐN SRƐLƐ’N I SU YE BENIN YƐ A KWLA ƝƐN I-Ɔ?

Zoova mianman sran fi kɛ ɔ srɛ i. Sanngɛ ɔ wla e fanngan kɛ e yo sɔ. (Zeremin 29:11, 12) Kannzɛ ɔ yo wɔ kɛ Ɲanmiɛn tɛman ɔ srɛlɛ’n be su’n, sanngɛ nán ɔ sa sin bubu wɔ. Nán cɛn ngba yɛ siɛ nin niɛn’m be yo like nga be mma’m be kunndɛ kɛ be yo be man be’n niɔn. Kpɛkun be yoman like sɔ’n blɛ nga ba’m be kunndɛ’n i nun. Like nga ti yɛ be yo sɔ’n yɛle kɛ be bɔbɔ yɛ be si like ng’ɔ ti kpa man be mma mun’n niɔn. Sanngɛ siɛ nin niɛn’m be uka be mma mun titi.

Zoova ti Siɛ kpa kun m’ɔ leman wunsu-ɔ. Yɛ ɔ kunndɛ kɛ ɔ́ úka wɔ wie. Sɛ a bu ninnge nga e kannin be ndɛ’n be akunndan kpa naan a nanti be su’n, sɛ a srɛ Ɲanmiɛn’n ɔ́ tɛ́ ɔ́ sú kɛ ng’ɔ nin i fata’n sa.—Jue Mun 34:15; Matie 7:7-11.