?Ngue yɛ a kwla yo naan w’a tran mɛn uflɛ’n nun wie-ɔ?

E wunnin i kɛ ɔ ka kan’n, Ɲanmiɛn wá núnnún klunwifuɛ mun. Kpɛkun ɔ́ yó mán mɛn’n nun sa’m bé wíe. E kwla lafi ndɛ sɔ’n su. Afin Biblu’n m’ɔ ti Ɲanmiɛn nuan Ndɛ’n seli kɛ:

“Mɛn’n su sin.”—1 ZAN 2:17.

Sanngɛ sran wie’m bé ɲán be ti. Afin Biblu’n nun ndɛ mma kunngba’n seli kɛ:

“Sran ng’ɔ yo Ɲanmiɛn klun sa’n, ɔ́ ká lɛ tititi.”

Ɔ maan sɛ e kunndɛ kɛ é fíte nun’n, ɔ fata kɛ e yo Ɲanmiɛn i klun sa’n. Kusu sɛ e siman Ɲanmiɛn’n, e kwlá yomɛn i klun sa’n.

SƐ ‘A SI’ ƝANMIƐN’N Á FÍTE NUN

Foto mun: 1. Dɔɔtrɔ bla kun ti asiɛ wun. W’a fɛ yɛ i wla bo i wun. 2. Ɔ ti kafe nɔnwlɛ kun nun ɔ su nɔn kafe. Blɛ sɔ’n nun’n, ɔ sie i nzɔliɛ kɛ i wiengu junman difuɛ kun su kanngan fluwa kun nun naan ɔ di aklunjuɛ. 3. Bla sɔ’n i wiengu junman difuɛ’n su kanngan Biblu’n nun ndɛ mma kun nun kle i. Kpɛkun ɔ fali fluwa kpekpe ng’ɔ kan e ɛntɛnɛti adrɛsi i ndɛ’n mɛnnin i wie.

Zezi seli kɛ: “Kɛ ɔ ko yo naan b’a ɲan nguan m’ɔ leman awieliɛ’n, ɔ ti cinnjin kɛ be si wɔ mɔ ɔ kunngba cɛ yɛ a ti Ɲanmiɛn’n.” (Zan 17:3) Ɔ maan sɛ ɔ waan á fíte nun naan á trán nguan nun tititi’n, ɔ fata kɛ ‘a si’ Ɲanmiɛn. Kɔlɛ’n a si Ɲanmiɛn i su ndɛ wie mun annzɛ a si kɛ Ɲanmiɛn o lɛ. Sanngɛ i sɔ’n ngunmin kwlá ukaman wɔ naan w’a si Ɲanmiɛn kpa. Ɔ fata kɛ a trɛ i janvuɛ wie. Ɲanmiɛn i janvuɛ tralɛ kusu’n ɔ ti kɛ e klɔ sran mun e janvuɛ tralɛ’n sa. Sɛ e kunndɛ kɛ é trá sran kun i janvuɛ’n, ɔ fata kɛ e nin i e yo ninnge wie mun likawlɛ naan y’a si i kpa. Ɔ maan sɛ e waan é trá Ɲanmiɛn i janvuɛ’n, ɔ fata kɛ e suɛn i su like naan y’a si i kpa. Siɛn’n, maan e kan Biblu’n nun ndɛ wie mɔ be kwla uka e naan y’a tra Ɲanmiɛn i janvuɛ kpa’n be ndɛ.

Ninnge wie mɔ Biblu’n ti’n e si be’n

E si kɛ Ɲanmiɛn kunndɛli kɛ e tran Mɛn klanman’n nun

Kɛ Ɲanmiɛn yili Adan nin Ɛvu’n, ɔ fali be sieli i lika klanman kpa kun nun. Be flɛ lika sɔ’n kɛ Edɛnin fie. Kɛ Ɲanmiɛn yili be’n, fɔ nunman be nun. Yɛ ɔ fali ninnge kwlaa nga be sa miɛn i wun’n mannin be. Afin ɔ kunndɛ kɛ be di aklunjɔɛ. Sanngɛ be yoli ɲin kekle Ɲanmiɛn su. I sɔ’n ti’n, be nin i be afiɛn sacili kpɛkun i agualiɛ su’n be wuli. Sɛ ɔ ti kɛ be yoli Ɲanmiɛn i janvuɛ titi sa’n, nn be trannin nguan nun tititi.

E si sa nga ti yɛ e wun e ɲrun’n

Kɛ mɔ Adan yoli ɲin kekle Ɲanmiɛn su’n ti’n, nguan m’ɔ leman awieliɛ’n fili i bɔbɔ nin i mma’m be sa. Biblu’n se kɛ: “Sran kunngba ti yɛ sa tɛ yolɛ’n bali mɛn’n nun-ɔn. Yɛ sa tɛ’n kusu ti yɛ wie’n bali-ɔ. Yɛ wie’n wo sran’m be kwlaa be su, afin be kwlaa be yoli sa tɛ.” (Rɔmunfuɛ Mun 5:12) Sɛ tukpacɛ tɛ wie o sran kun wun naan ɔ wu ba’n, tukpacɛ sɔ’n kwla sɛ i wa’n. I wafa kunngba’n, sa tɛ nga Adan yoli’n kacili i wun kɛ tukpacɛ tɛ wie sa. Yɛ kɛ ɔ wuli i mma mun’n, tukpacɛ sɔ’n sali be. Kɛ mɔ e kwlaa e ti Adan i mma mun ti’n, e kwlaa e yo kpɛnngbɛn kpɛkun e wu.

E si like nga Ɲanmiɛn yoli naan y’a kwla ɲan e ti’n

Biblu’n kannin like sɔ’n i ndɛ seli kɛ: “Ɲanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ kle kɛ ɔ lafi i su’n w’a mlinman, sanngɛ ɔ ɲan nguan m’ɔ leman awieliɛ’n.” (Zan 3:16) Ɔ maan Ɲanmiɛn sunmannin Zezi asiɛ’n su wa naan ɔ wa fɛ i nguan’n kpɔ e ti. Kɛ Ɛndi bian kun m’ɔ le afuɛ 86 bu like nga Ɲanmiɛn yo mannin e’n i akunndan’n ɔ yo i fɛ dan. I ti’n ɔ seli kɛ: “N wun i wlɛ kɛ Zoovaa klo min dan. Yɛ n lafi su kɛ cɛn wie lele’n ń trán nguan nun tititi.”

E si like nga e kwla yo fa kle kɛ e klun jɔ like nga Ɲanmiɛn yo mannin e’n su’n

Biblu’n se kɛ sɛ e kunndɛ kɛ é klé kɛ e klun jɔ like nga Ɲanmiɛn yo mannin e’n su’n, ɔ fata kɛ “e nanti i mmla’m be su.” (1 Zan 2:3) Zoova kle e like nga e kwla yo naan y’a di aklunjɔɛ dɔ nga su’n. (Ezai 48:17, 18) Ɲanmiɛn kunndɛman kɛ e fɛ. I sɔ’n ti’n, ɔ kpɛli mmla wie mun mannin e. I waan sɛ e nanti mmla sɔ’m be su’n, é dí aklunjɔɛ dɔ nga su. Kpɛkun e ɲrun lɔ’n é ɲán nguan m’ɔ leman awieliɛ’n.

KANNGAN BIBLU’N NUN CƐN KWLAKWLA

Be wunmiɛn lolɛ blɛ nun’n, dɔɔtrɔ bla kun su kanngan Biblu’n nun. W’a wie Biblu’n nun kanngan yɛ ɔ mɛn i ɲin su nian nglo lɔ. — Sɛ a kunndɛ kɛ á fíte nun’n, srɛ Ɲanmiɛn kɛ ɔ uka wɔ naan a yo i klun sa’n.

Cɛn kwlakwla’n, e di like naan y’a kwla ka nguan nun. Sanngɛ Zezi seli kɛ: “Nán kpanwun ngunmin yɛ ɔ kwla yo maan sran tran nguan nun-ɔn, sanngɛ ndɛ kwlaa ng’ɔ fin Zoova nuan fite’n niɔn.”—Matie 4:4.

Andɛ’n, Zoova i nuan ndɛ’n wo Biblu’n nun. Sɛ a suan fluwa sɔ’n i nun like’n, á sí like nga Ɲanmiɛn yoli i laa’n, nin ng’ɔ yo i dɔ nga su’n, ɔ nin ng’ɔ́ wá yó i e ɲrun lɔ’n.

SRƐ ƝANMIƐN NAAN Ɔ UKA WƆ

?Sɛ ɔ waan á nánti Ɲanmiɛn i mmla’m be su naan ɔ ti kekle man wɔ’n, ngue yɛ ɔ kwla uka wɔ-ɔ? I lɛ nun’n, sɛ a si Ɲanmiɛn kpa’n ɔ́ kwlá úka wɔ kpa.

Be flɛ bla kun kɛ Sakura. Laa’n, ɔ kunndɛ bian sukusuku. Sanngɛ kɛ ɔ wa suannin Biblu’n nun like’n, ɔ wunnin i kɛ Ɲanmiɛn kunndɛ kɛ e “kpalo bla nin bian kunndɛlɛ sukusuku’n.” (1 Korɛntifuɛ Mun 6:18) Sakura srɛli Ɲanmiɛn kɛ ɔ ukɛ i naan ɔ wlɛ i ayeliɛ tɛ sɔ’n i ase. Sanngɛ i sɔ yolɛ’n w’a yoman pɔpɔ i sa nun. Ɔ seli kɛ: “Kɛ sa sukusuku yolɛ akunndan ba min ti nun’n, n srɛ Zoova tankaan kpa kɛ ɔ uka min. Afin n si kɛ sɛ w’a ukaman min’n, n su kwlá wlɛmɛn i ase. Zoova i srɛlɛ’n yoli maan e nin i e afiɛn mantannin kpa.” Kɛ sran miliɔn kaka be sili Ɲanmiɛn’n, be wlali be ayeliɛ tɛtɛ’m be ase. Kpɛkun be yoli like ng’ɔ jɔ Ɲanmiɛn klun’n. Kɛ Sakura sa’n, Ɲanmiɛn mannin be wunmiɛn naan b’a kwla yo sɔ.—Filipufuɛ Mun 4:13.

Sɛ a si Ɲanmiɛn kpa’n, i kusu ‘sí wɔ’ kpa wie. Yɛ ɔ́ bú wɔ kɛ i janvuɛ kpa kun sa. (Galasifuɛ Mun 4:9; Jue Mun 25:14) I sɔ’n yɛ ɔ́ úka wɔ naan w’a ɲan ɔ ti naan w’a tran mɛn uflɛ nga i waan ɔ́ fá mán e’n i nun wie-ɔ. ?Sanngɛ mɛn sɔ’n i nun tranlɛ’n wá yó sɛ? Ndɛ ng’ɔ́ bá lɛ́’n, ɔ́ wá tɛ́ kosan sɔ’n su.

a Biblu’n se kɛ Ɲanmiɛn i dunman’n yɛle Zoova.