?Ngue yɛ ɔ kwla uka e naan e liɛ w’a yo ye-ɔ?

Kɛ nga e fa wunnin i ndɛ akpasua nga be sinnin lɛ’n be nun sa’n, sran wie’m be bu i kɛ sran kun annzɛ like wie yɛ ɔ siesie e ɲrun lɔ sa mun-ɔn. Ɔ maan be yo ninnge wie mun naan sran sɔ’n annzɛ like sɔ’n yo naan be liɛ yo ye. Sran wie mun ekun be liɛ’n, be bu i kɛ sɛ be di suklu dan annzɛ be ɲan sika kaka annzɛ be yo sran kpa’n, be liɛ yó ye. Sanngɛ ninnge sɔ’m b’a kwlá ukaman be naan be liɛ w’a yo ye sakpa. ?I sɔ’n kle kɛ like fi kwlá ukaman e naan e liɛ w’a yo ye? Cɛcɛ, nɛ́n i sɔ-ɔ.

SRAN KUN M’Ɔ KWLA UKA E KPA’N

Kpɛ sunman’n, kɛ e waan é fá ajalɛ kun’n, e usa sran kun m’ɔ ti kpɛnngbɛn tra e’n annzɛ ɔ si ngwlɛlɛ kpa’n i ngwlɛlɛ afɛ. I wafa kunngba’n, sɛ e kunndɛ kɛ e liɛ yo ye’n ɔ fata kɛ e fa afɔtuɛ nga Sran kun m’ɔ ti kpɛnngbɛn tra sran’m be ngba’n ɔ man e’n su. Sran sɔ’n kusu i ngwlɛlɛ liɛ’n leman wunsu. Ɔ yoli maan be klɛli ngwlɛlɛ ndɛ wie mun fluwa kun nun. Be klɛli fluwa sɔ’n i afuɛ kɔe 3.500 yɛ. Fluwa sɔ’n yɛle Biblu’n.

?E kwla lafi Biblu’n nun ndɛ’n su? Ɛɛn, afin Sran nga Biblu’n fin i’n, i ngwlɛlɛ’n leman wunsu. Asa’n, i kpɛnngbɛn tra be kwlaa nga be o nglo lɔ’n nin asiɛ’n su wa’n. I sɔ’n ti’n, Biblu’n flɛ i kɛ “sran oke.” I kpa bɔbɔ’n, kwlaa naan ‘mɛn’n w’a bo i bo’n’ nn ɔ o lɛ. (Daniɛl 7:9; Jue Mun 90:2) I yɛ ɔ ‘yili nglo’n nin asiɛ’n niɔn.’ (Ezai 45:18) I dunman’n yɛle Zoova.—Sa Nglo Yilɛ 4:11.

E kwlaa e ti Sran nga Biblu’n fin i’n i sa nuan like. I sɔ’n ti’n, Biblu’n se kɛ aniɛn kwlaa be sɛ. Asa’n, ɔ kle kɛ kannzɛ e wunnɛn kplo’n timan kun’n, sanngɛ e kwlaa e sɛ. Afɔtuɛ nga be o Biblu’n nun’n be ti kpa titi, yɛ sran wafawafa kwlaa kwla ɲan su ye. Be yili Biblu’n aniɛn kaka nun tra fluwa kwlaa. Yɛ w’a tru kpa w’a tra fluwa ngba.a I sɔ’n ti’n, sran ngba kwla kanngan Biblu’n nun yɛ ɔ kwla ɲan afɔtuɛ ng’ɔ o nun’n i su ye. I kwlaa sɔ’n kle kɛ ndɛ yɛ mɔ Biblu’n kannin’n ti nanwlɛ. Ɔ seli kɛ:

“Ɲanmiɛn kpaman sran nun. Sanngɛ nvle kwlaa nun’n, sran ng’ɔ sro i m’ɔ yo sa ng’ɔ ti kpa’n, i sɔfuɛ’n yɛ i klun jɔ i wun-ɔn.”—SA NGA BE YOLI’N 10:34, 35.

Siɛ nin niɛn nga be klo be mma mun’n, be kle be atin naan be liɛ yo ye. I wafa kunngba’n, e Si Zoova m’ɔ klo e’n ɔ sin Biblu’n i lika kle e atin naan e liɛ yo ye. (2 Timote 3:16) E kwla lafi i nuan Ndɛ’n su. Afin i yɛ ɔ yili e-ɔ, yɛ ɔ si like ng’ɔ kwla uka e naan e liɛ w’a yo ye sakpa’n.

E KWLA LAFI BIBLU’N SU

E kwla lafi Biblu’n nun ndɛ’n su. Afin kɛ ɔ bo sa kun su’n, sa sɔ’n ju sakpa. I wie yɛle kɛ i afuɛ kɔe 2.000 yɛ, Biblu’n seli kɛ sa wie’m bé wá jú naan sran’m bé wá yí ayeliɛ wie’m be nglo. Andɛ’n, ndɛ sɔ mɔ Biblu’n kannin’n kpɛn su.

SA MUN

“Nvle kun wá jáso nvle uflɛ wun, yɛ famiɛn kun wá jáso famiɛn uflɛ wun. Asiɛ’n wá kéje dan kpa lika fanunfanun nun. Awe’n wá kpɛ́n, yɛ tukpacɛ m’ɔ sa ndɛndɛ’n, ɔ́ wá trú.”—LIKI 21:10, 11.

SRAN’M BE AYELIƐ’N

“Mɛn’n i awieliɛ blɛ nun’n, lika’n wá yó kekle kpa. Afin sran’m bé bú be bɔbɔ be wun akunndan, bé yó sika klofuɛ, bé dí be nuan, bé tú be wun, bé sáci Ɲanmiɛn nin sran wun, be ɲin su yiman be si nin be nin mun, be su siman ye, be nin be wiengu’m be su nantiman klanman, be su kloman be wiengu, be su kunndɛman kɛ be nin be wiengu’m bé tí be wun aniɛn, bé sáci sran wun, be su siman be wun su nian, bé yó wlɛ, be su kloman like ng’ɔ ti kpa’n, bé kpɛ́ be wiengu’m be bo waka, bé yó ɲin kekle, bé dí tutre. Be su kloman Ɲanmiɛn, fɛ dilɛ’n yɛ bé kló i-ɔ.”—2 TIMOTE 3:1-4.

?Kɛ e wun i kɛ ndɛ nga Biblu’n kannin’n kpɛn su andɛ’n, ngue ndɛ yɛ e kwla kan-ɔn? Ndɛ kunngba nga Ɔnkɔngu lɔ bian kun kannin’n, i wie yɛ é kán-ɔn. Be flɛ i kɛ Lewungu. Ɔ seli kɛ: “Biblu’n boli sa sɔ’m be su w’a cɛ kpa. Ɔ nin i sɔ ngba’n, be kpɛn su sɛsɛsɛ. Nanwlɛ, klɔ sran fi kwlá kanman e ɲrun lɔ sa kun i ndɛ kpɛkun ɔ́ kpɛ́n su kɛ ngalɛ’n sa. I sɔ’n kle weiin kɛ Biblu’n fin sran kun m’ɔ si ngwlɛlɛ tra e lele’n.”

Be diman sa nga Biblu’n boli su mɔ be kpɛnnin su’n be yalɛ.b I sɔ’n kle kɛ Biblu’n ti Ɲanmiɛn nuan Ndɛ sakpa. I sɔ’n kusu boman e nuan, afin Zoova bɔbɔ seli kɛ: “Nyanmiɛn’n yɛle min, sran fi nin min sɛman. N dun mmua n bo sa’m be su lele yɛ be ju-ɔ.” (Ezai 46:9, 10) I kwlaa sɔ’n ti’n, e kwla lafi su kɛ sa nga Biblu’n waan bé wá jú’n, bé jú sakpa.

A KWLA ƝAN BIBLU’N NUN AFƆTUƐ’M BE SU YE ANDƐ NIN AINMAN

Sɛ a fa Biblu’n nun afɔtuɛ’m be su’n, á ɲán su ye. Afɔtuɛ sɔ’m be nun wie mun yɛ:

SIKA NIN JUNMAN DILƐ

“Wunmiɛn lolɛ kan’n, ɔ ti kpa tra junman kekle dilɛ’n, m’ɔ ti kɛ sran kun waan ɔ́ fúan aunmuan’n naan ɔ́ kó trɛ́ i sa’n.”—AKUNNDANFUƐ’N 4:6, NWT.

AWLOBO TRANLƐ FƐ

“Maan sran kun klo i yi kɛ ɔ fa klo i bɔbɔ wun’n sa. Yɛ kusu maan bla’m be ɲin yi be wun’m be kpa.”—EFƐZIFUƐ MUN 5:33.

E NIN E WIENGU MUN E NANTILƐ

“Gua ya ble’n i ase, yaci ya’n mlɔnmlɔn.”—JUE MUN 37:8.

Sɛ a fa Biblu’n nun afɔtuɛ’m be su’n, á ɲán su ye dɔ nga su. Sanngɛ á ɲán su ye ainman wie. Biblu’n se kɛ Ɲanmiɛn wá yó ninnge nga mun mán e:

É TRÁN FƆUN NUN

“Yalɛfuɛ mun yɛ mɛn’n ɔ́ wá yó be liɛ-ɔ. Be wun jɔ́ be kpa fɔuun!”—JUE MUN 37:11.

SRAN KWLAKWLA ƝƐ́N I BƆBƆ I SUA YƐ ALIƐ’N BÚ

“Sɛ min sran’m be kplan sua’n, bé trán be nun, sɛ be ta vinyi’n, bé dí i su mma.”—EZAI 65:21.

TUKPACƐ’N NIN WIE’N BE SU TRANMAN LƐ KUN

“Wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.”—SA NGLO YILƐ 21:4.

?A kunndɛ kɛ á ɲán ninnge sɔ mun wie? Sɛ ɔ ti sɔ’n, nian ndɛ akpasua ng’ɔ́ bá lɛ’n nun naan wun like ng’ɔ fata kɛ a yo’n.

a Sɛ a kunndɛ kɛ á sí wafa nga be kacili Biblu’n aniɛn’m be nun’n ɔ nin like nga ti yɛ Biblu’n w’a tru kpa’n, kɔ www.jw.org su naan tin LA BIBLE ET VOUS > LA BIBLE ET L’HISTOIRE su.

b Sɛ a kunndɛ kɛ á sí nun ndɛ kpa ekun’n, nian fluwa nga be flɛ i kɛ ?Ngue like yɛ Biblu’n kle i sakpasakpa ɔ? i bue 23-25 be nun. Zoova i Lalofuɛ mun yɛ be yili fluwa sɔ’n niɔn. Ɔ o www.jw.org su. Kɔ lɔ naan tin NINNGE NGA E YILI BE’N > FLUWA NIN FLUWA PƐPLƐƐPLƐ MUN su.