1921—I afuɛ ya kun yɛ

JASIN BOFUƐ YAKPAFUƐ WIE MUN

Kɛ ɔ ko yo naan Biblu’n nun Like Suanfuɛ’m b’a kwla bo jasin fɛ’n lele b’a guɛ i ti nin i bo’n, ɔ fata kɛ be yo yakpafuɛ. Afin bé wá bó “jasin fɛ’n” bé klé yalɛfuɛ mun. Sanngɛ kusu bé kán ‘cɛn nga Ɲanmiɛn wá tú i klunngbɔ’n’ i ndɛ bé klé klunwifuɛ mun.

Be flɛ aniaan bian kun kɛ Jɔnun Ɔskinin. Ɔ tran Kanada lɔ. Kannzɛ bɔbɔ be tɛnndɛnnin i ɲrun’n, sanngɛ ɔ boli jasin fɛ’n yakpa su. Afuɛ 1921 nun’n, cɛn kun m’ɔ́ bó jasin fɛ’n ɔ toli asɔnun Metodisi’n be pastɛli kun. Kɛ aniaan bian’n toli i’n, ɔ seli i kɛ: “E kunndɛ kɛ e nin wɔ é kókó Ɲanmiɛn Ndɛ’n i su yalɛ kan. E si kɛ e nuan su sɛman ndɛ wie’m be su. Sɛ i sɔ sa liɛ’n ju naan ɔ fata kɛ e titi nun’n, maan e yo sɔ wɛtɛɛ su.” Sanngɛ be yalɛ kokolɛ’n w’a yoman kɛ nga aniaan bian’n fa sunnzunnin’n sa. Aniaan bian Ɔskinin seli kɛ: “Kɛ n boli min ndɛ’n i kanlɛ bo’n, m’ɔ dili miniti nɲɔn kun’n yɛ gblanwun bian’n ɲinnin i anuan’n niɔn. Kɛ m’ɔ ɲinnin anuan’n i kekle’n ti’n, n buli i kɛ anuan’n i karo’n su wa bo gua bɔbɔ.”

Kpɛkun pastɛli sɔ’n kpannin kekle kpa seli kɛ: “?Ngue ti yɛ amun ko kɛnmɛn i sɔ ndɛ’n kleman be nga be kɔman asɔnun’n niɔn?” Sanngɛ aniaan bian Ɔskinin w’a tɛman su. Kɛ aniaan bian’n kɔ́’n, ɔ seli i klun lɔ kɛ: “Ɔ bɔbɔ mɔ ɔ waan a kɔ asɔnun’n, a yo kɛ be nga be kɔman asɔnun’n be sa.”

Kɛ lika cɛnnin’n, pastɛli sɔ’n ɔli i asɔnun’n nun lɔ. Ɔ ko buali aniaan bian Ɔskinin i su ato kleli i asɔnun’n nunfuɛ mun. Aniaan bian Ɔskinin seli kɛ: “Ɔ seli i asɔnun’n nunfuɛ’m be kɛ n laka sran mun naan be klɔ’n su’n ɔ nin-a wunman gblɛfuɛ kɛ min sa le. Naan i ti’n ɔ fata kɛ be kun min.” Sanngɛ i sɔ liɛ’n w’a bubuman aniaan bian’n i sa sin. Ɔ boli jasin fɛ’n i juejue su titi. I sɔ’n ti’n, i jasin fɛ bolɛ junman’n bali nvlɛ. Ɔ seli kɛ: “Klɔ sɔ’n su jasin fɛ bolɛ’n yoli min fɛ kpa. I kpa bɔbɔ’n, sran wie’m be seli min kɛ be lafi su kɛ n di Ɲanmiɛn junman naan sɛ min sa mian like wun’n, n kan kle be naan bé fá mán min.”

E NGUNMIN E BIBLU’N NUN LIKE SUANLƐ NIN AWLO LƆ ƝANMIƐN SULƐ

Biblu’n nun Like Suanfuɛ’m be yoli like kun fa ukali be nga be klo Ɲanmiɛn ndɛ’n naan b’a wɔ be ɲrun Ɲanmiɛn sulɛ nun. Be klɛli kosan wie mun ɔ nin be su tɛlɛ’n fluwa nga be flɛ i kɛ L’Âge d’Ora i nun. Kosan sɔ’m be nun wie’m be ti ba kanngan’m be liɛ. Be ukali siɛ nin niɛn mun naan be nin be mma’m b’a koko Biblu’n nun ndɛ wie’m be su yalɛ. I sɔ yolɛ nun’n, siɛ nin niɛn’m be fa kosan’m be usa be mma mun kpɛkun be uka be naan be wun i su tɛlɛ’n Biblu’n nun. Kosan sɔ’m be nun wie’m be ukali ba kanngan mun naan b’a wun Biblu’n nun ndɛ nga be wlɛ wunlɛ timan kekle’n be wlɛ. Kosan sɔ’m be nun kun yɛ: “?Biblu’n nun fluwa’m be ti nɲɛ?” Sanngɛ kosan wie’m be liɛ’n, be ukali be naan b’a yo yakpafuɛ jasin fɛ’n i bolɛ’n nun. Be nun kun yɛ: “?A bu i kɛ e mɔ e ti Klisifuɛ kpa’n bé klé e yalɛ?”

Asa kusu’n, ɔ le be nga be si Ɲanmiɛn ndɛ’n i kpa’n be kosan liɛ mun. Kosan sɔ’m be su tɛlɛ’n wo fluwa nga be flɛ i kɛ Étude des Écritures i bue klikli’n nun. Sran kpanngban kpa be ɲannin kosan sɔ mɔ be usali be’n be su ye. Sanngɛ fluwa L’Âge d’Or ng’ɔ fiteli afuɛ 1921 Desanblu 21 su’n i nun’n, be seli kɛ be su usaman kosan sɔ mun fluwa’n nun kun. ?Ngue ti yɛ be fali ajalɛ sɔ’n niɔn?

FLUWA UFLƐUFLƐ KUN

Blɛ sɔ’n nun’n, be nga be dun anuannzɛ’n i ɲrun mmua’n be sieli i nzɔliɛ kɛ ɔ fata kɛ be siesie wafa nga e kle sran’m be Biblu’n nun like’n i kpa ekun. I sɔ’n ti’n, afuɛ 1921 Novanblu nun’n, be yili fluwa nga be flɛ i kɛ La Harpe de Dieu. Be seli be kwlaa nga be fali fluwa sɔ’n kɛ bé wá úka be naan be ngunmin be suan Biblu’n nun like. Like suanlɛ sɔ’n ukali be naan b’a si like nga Ɲanmiɛn sunnzunnin i kɛ ɔ́ yó mán klɔ sran mun’n. ?Sanngɛ wafa sɛ yɛ be suannin like blɛ sɔ’n nun-ɔn?

Kɛ sran kun ko fa fluwa La Harpe de Dieu be mɛn i fluwa kpe kan kun. Fluwa kpe kan sɔ’n kle i fluwa La Harpe de Dieu i bue ng’ɔ fata kɛ ɔ kanngan nun’n. Kpɛkun lemɔcuɛ ng’ɔ su i su’n nun’n, be mɛn i fluwa kpe kan uflɛ. Fluwa uflɛ sɔ’n nun’n, be usa fluwa La Harpe de Dieu i bue ng’ɔ kanngannin nun’n i su kosan wie mun. Kpɛkun fluwa’n i awieliɛ lɔ’n, be kle sran’n fluwa La Harpe de Dieu i bue ng’ɔ fata kɛ ɔ kanngan nun lemɔcuɛ ng’ɔ su i su’n nun’n.

Ɔ maan lemɔcuɛ kwlakwla’n, be man like suanfuɛ’n i fluwa kpe kan kun naan w’a si fluwa La Harpe de Dieu i bue ng’ɔ fata kɛ ɔ kanngan nun’n. Be yo sɔ lele lemɔcuɛ 12. Asɔnun bo ng’ɔ mantan like suanfuɛ’n i tranwlɛ’n be nunfuɛ mun yɛ be mɛn i fluwa sɔ’n niɔn. Kpɛ sunman’n, aniaan nga b’a yo kpɛnngbɛn’n annzɛ aniaan nga sa uflɛ ti’n, be kwlá kɔman awloawlo’m be nun be boman jasin fɛ’n, be yɛ be fa fluwa kpe kan’m be man like suanfuɛ mun-ɔn. Be flɛ aniaan bla kun kɛ Ana Gadinɛɛ. Ɔ tran Etazinin lɔ. Ɔ seli kɛ: “Kɛ be yili fluwa La Harpe de Dieu min niaan bla Teili m’ɔ ti bubuwafuɛ’n wa ɲannin junman kaka dili. Afin lemɔcuɛ kwlakwla’n, ɔ fata kɛ ɔ fa fluwa kpe kan sɔ’n man like suanfuɛ mun.” Kɛ like suanfuɛ kun ko wie fluwa’n i nun like suan’n, be se aniaan kun kɛ ɔ ko niɛn i osu naan ɔ suan Biblu’n nun like wɔ i ɲrun titi.

JUNMAN NG’Ɔ MINNDƐ E’N

Kɛ afuɛ nuan yiali’n, aniaan bian Zozɛfu Ritɛɛfɔdu klɛli asɔnun bo’m be kwlaa be fluwa. Ɔ seli kɛ: “Afuɛ nga nun’n, Ɲanmiɛn Sielɛ’n i jasin fɛ nga e boli’n, ɔ bali nvlɛ trali afuɛ nga be sinnin lɛ’n be liɛ’n.” Ɔ kan guali su kɛ: “Sanngɛ junman kaka te o lɛ. I sɔ’n ti’n, amun wla amun wiengu’m be fanngan naan be fa be wun be wla junman cinnjin sɔ’n nun wie.” E si kɛ Biblu’n nun Like Suanfuɛ’m be nantili ndɛ ng’ɔ kannin’n su. Afin afuɛ 1922 nun’n, be wlali be wun ase kpa ekun be boli Ɲanmiɛn Sielɛ’n i jasin fɛ’n yakpa su. Wafa nga be boli jasin fɛ’n afuɛ sɔ’n nun’n ɔ yoli i liɛ ngunmin kun.