?NGUE YƐ Ɔ KWLA YO MAAN SRAN KPƆLƐ’N WIE-Ɔ?

4 | Ɲanmiɛn kwla uka ɔ naan w’a wla sran kpɔlɛ’n i ase

Ndɛ nga Biblu’n kan’n:

“Nzuɛn nga Ɲanmiɛn wawɛ’n yo maan klɔ sran yi i nglo’n yɛle Ɲanmiɛn nin sran klolɛ, aklunjuɛ dilɛ, alaje dilɛ, awlɛn tralɛ, klun ufue yolɛ, sran ye yolɛ, Ɲanmiɛn sulafilɛ, wɛtɛɛ yolɛ, be wun su nianlɛ.”—GALASIFUƐ MUN 5:22, 23.

Like nga ndɛ sɔ’n kle e’n:

Ɲanmiɛn kwla uka e naan y’a kpɔman sran kun. Nzuɛn wie mɔ e kwlá yiman be nglo’n, Ɲanmiɛn wawɛ’n kwla uka e naan y’a yi be nglo. I sɔ’n ti’n, maan e fa e wla e guɛ i Ɲanmiɛn su naan ɔ uka e naan y’a kpɔman sran kun, afin e ngunmin e lemɛn i sɔ fanngan. Sɛ e yo sɔ’n, e wun yó e kɛ akoto Pɔlu sa. Ɔ seli kɛ: “Afin sa kwlaa nun’n, sran ng’ɔ man min tinmin’n ti’n, n le wunmiɛn.” (Filipufuɛ Mun 4:13) Yɛ é kwlá sé kɛ: “Min ukalɛ’n ɔ fin [Zoova].”—Jue Mun 121:2.

Like nga a kwla yo’n:

“Zoova w’a yo maan sran kun m’ɔ ti wlɛfuɛ’n w’a kaci wɛtɛɛfuɛ.”—WALDO

Tu ɔ klun srɛ Zoova naan ɔ fɛ i wawɛ’n man ɔ. (Liki 11:13) Srɛ i naan ɔ uka ɔ naan w’a yi nzuɛn kpakpa’m be nglo. Biblu’n nun like suanlɛ’n kwla uka ɔ naan w’a yi nzuɛn wie mɔ bé úka ɔ naan w’a kpɔman sran’n be nglo. Be yɛle klolɛ, alaje dilɛ, wɛtɛɛ yolɛ nin be wun su nianlɛ’n. Kunndɛ wafa nga a kwla yi nzuɛn sɔ’m be nglo blɛ kwlaa nun’n. Asa ekun’n be nga be yi nzuɛn sɔ’m be nglo’n, a nin be san nun. Sran sɔ’m be kwla uka ɔ naan ‘w’a klo Ɲanmiɛn nin sran, naan w’a yo sa kpa.’—Ebre Mun 10:24

Sran kun i su ndɛ—WALDO

Ɔ yacili sran kpɔlɛ

Be flɛ bian kun kɛ Waldo. I bakan nun’n, ɔ wunnin i ɲrun kpa. I ti’n kɛ ɔ́ ɲín kɔ́’n, ɔ wa yoli wlɛ. Ɔ seli kɛ: “Blɛ sunman’n, e nin drɔgi atɛ yofuɛ mun mɔ be o akpasua uflɛ nun’n e di utre. Cɛn kun’n, akpasua sɔ’m be nun kun mannin sran kunfuɛ dan kun i sika kɛ ɔ kun min. Ɔ wɔli min laliɛ sanngɛ n yoli blɛblɛ n fiteli nun.”

Kɛ Zoova i Lalofuɛ’m be boli Waldo i yi’n i Biblu’n nun like klelɛ bo’n w’a yomɛn i fɛ. Ɔ seli kɛ: “N kpɔ Zoova i Lalofuɛ mun yɛ kpɛ sunman’n n kan be ndɛ tɛtɛ. Sanngɛ kɛ n yo sɔ’n be fa yoman ndɛ.”

Kɛ ɔ cɛli kan’n Waldo bɔbɔ wa boli Biblu’n nun like suanlɛ bo wie. Ɔ seli kɛ: “Kɛ ɔ ko yo naan m’an nian like nga n suan’n su m’an nanti’n, w’a yoman pɔpɔ. N seli min wun kɛ n su kwlá yaciman ya falɛ nin nzaje sa’m be yolɛ le.” Sanngɛ like kun m’ɔ suɛnnin i Biblu’n nun’n ukɛli i kpa.

Waldo waan: “Cɛn kun’n, aniaan bian Alɛzandro m’ɔ kle min like’n seli min kɛ n kanngan Galasifuɛ Mun 5:22, 23 nun. Alɛzandro yiyili nun kleli min kɛ sɛ Ɲanmiɛn w’a fɛmɛn i wawɛ’n w’a manman min’n n su kwlá yiman nzuɛn sɔ’m be nglo. I sɔ’n kacili akunndan nga n bu’n mlɔnmlɔn.”

Waldo lafili Ɲanmiɛn su yɛ ɔ kplinnin su kɛ ɔ ukɛ i, ɔ maan ɔ wlali sran kpɔlɛ’n i ase. I waan: “Kɛ min mantanfuɛ mun nin min janvuɛ laa’m be wun kɛ m’an kaci’n ɔ bo be nuan.” Ɔ kan gua su kɛ: “Zoova w’a yo maan sran kun m’ɔ ti wlɛfuɛ’n w’a kaci wɛtɛɛfuɛ.”