Like suanlɛ’n i su afɔtuɛ wie mun

Maan e suan “Ɲanmiɛn sulɛ jue” mun naan be ka e klun

Be flɛ aniaan bla kun m’ɔ tran Etazinin lɔ’n kɛ Lorɛnin. Ɔ seli kɛ: “Kɛ min sa sin bubu min dan mɔ n buman min wun sran’n, Zoova sin jue nga be o JW televiziɔn su’n be lika wla min fanngan kpa.”

Kɛ ɔ fɛ i laa lele andɛ’n, Klisifuɛ’m be to jue be manman Ɲanmiɛn. (Kol. 3:16) Sɛ a suan jue sɔ mun lele naan be ka ɔ klun’n, kannzɛ a leman jue tolɛ fluwa annzɛ tablɛti’n, sanngɛ be nun ndɛ’n kwla uka wɔ. Ninnge wie mɔ a kwla yo naan w’a suan jue sɔ mun lele naan b’a ka ɔ klun’n be nun wie mun yɛ.

• Kanngan jue sɔ’m be nun ndɛ’m be nun kpa naan w’a wun be wlɛ. Ndɛ nga a wun i wlɛ kpa’n yɛ ɔ wla kwla kpɛn su-ɔ. Ɲanmiɛn manmanlɛ jue mun’n, maan ɔ yo ba kanngan’m be liɛ annzɛ kpɛnngbɛn’m be liɛ mun-o, i kwlaa o jw.org su. Tin Ninnge nga e yili be mun’n su, yɛ i sin’n tin kan be klɛli i lɛ Jue su.

• Klɛ jue’n i nun ndɛ’n fluwa su. Sɛ a yo sɔ’n, ɔ́ wla kpɛ́n jue’n i nun ndɛ’n su. —Mml. 17:18.

• Maan ɔ nɛn’n su to jue’n. Kanngan nun annzɛ to flan nun.

• To nian sɛ ɔ wla kpɛn i nun ndɛ’n su-o. Kɛ á tó’n nán nian jue’n i nun ndɛ’n. I sin’n nian sɛ a toli i kpa-o.