Sa kpa’n nin sa tɛ’n be wlɛ wunlɛ’n ti cinnjin

?Sɛ ɔ waan á kɔ́ lika kun mɔ a nin-a wɔman lɔ le’n, ngue yɛ á yó-ɔ?

1. 1. A kwla fa atin nga ɔ bɔbɔ a bu i kɛ ɔ ti kpa’n.

2. 2. A kwla se kɛ á sú sran wie’m be su afin a se ɔ wun kɛ atrɛkpa’n be si lɔ.

3. 3. A kwla se kɛ á nían ɛntɛnɛti su, annzɛ á nían lika’n i desɛn nga be jɛjɛli i fluwa su’n, annzɛ á úsa ɔ janvuɛ kun m’ɔ si lika’n i kpa’n.

Sɛ a fa ajalɛ klikli annzɛ nɲɔn su’n, ɔ cɛman naan w’a fɔn. Sanngɛ sɛ a fa ajalɛ nsan su fuɛ’n, á jú lika nga ɔ waan á kɔ́’n.

Ajalɛ nga sran kun fa be’n, e kwla fa sunnzun lika kɔlɛ. Ɔ kunndɛ kɛ ajalɛ sɔ’m be yo maan i liɛ yo ye. Sɛ i liɛ yó ye sakpa, annzɛ ɔ su yoman ye’n, ɔ fin like nga i su yɛ ɔ jran fa ajalɛ’n.

Ajalɛ nga sran kun fa be’n, wie’m be ti cinnjin kpa tra wie mun. Afin like nga e bu i kɛ ɔ ti kpa annzɛ ɔ ti tɛ’n i su yɛ e jran e fa ajalɛ sɔ mun-ɔn. Ajalɛ sɔ’m be kwla yo e bɔbɔ nin e osufuɛ mun nin e janvuɛ mun be ye. Annzɛ be kwla yo maan e wun e ɲrun. Ninnge nga ti yɛ sran kun kwla fa ajalɛ’n be nun wie mun yɛ:

• Bla nin bian nna annzɛ aja ndɛ’n.

• Junman annzɛ sika annzɛ nanwlɛ dilɛ ndɛ’n.

• Ba talɛ ndɛ’n.

• Wafa nga e nin e wiengu mun e tran’n i su ndɛ’n.

?Á yó sɛ naan w’a fa ajalɛ kpa ninnge sɔ’m be nun naan ɔ bɔbɔ nin ɔ osufuɛ mun b’a ɲan su ye?

I lɛ nun’n, ɔ fata kɛ e tinuntinun e usa e wun kɛ: ?Ngue yɛ ɔ kwla uka min naan m’an si sa ng’ɔ ti kpa’n ɔ nin sa ng’ɔ ti tɛ’n niɔn?

Fluwa nga i nun ndɛ’n wá klé e kɛ Biblu’n nun ndɛ’n kwla uka e naan y’a fa ajalɛ kpa.