Fluwa’n nun kannganfuɛ’m be kosan mun
?Kɛ Jue Mun 12:7 se kɛ ‘á sásá be’n,’ “ɲrɛnnɛnfuɛ mun” (ndɛ mma 5) be ndɛ yɛ be kan-ɔn? ?Annzɛ kusu “Zoova i ndɛ’m” (ndɛ mma 6) be ndɛ yɛ be kan-ɔn?
Kɛ e kanngan ndɛ’n i ɲrun nin i sin’n nun’n, e wun kɛ sran’m be ndɛ yɛ be kan-ɔn.
Jue Mun 12:1-4 nun’n, be klɛli i kɛ: “Nanwlɛfuɛ’m be nunman sran’m be afiɛn kun.” I sin’n, Jue Mun 12:5-7 nun’n, ɔ seli kɛ:
“Zoova waan: ‘Ɲrɛnnɛnfuɛ nga be kle be yalɛ’n,
ɔ nin yalɛfuɛ’m be fɛfɛlɛ’n ti’n,
ń má jáso ń fá ajalɛ.
Ń má dé be be nga be yo be finfin’n be sa nun.’
Fiɛn kaan sa nunman Zoova i ndɛ’m be sin.
Be ti kɛ sika mɔ b’a tɔn i fa fuu nun b’a yi i nun fiɛn’n sa, be yili i nun fiɛn’n kpɛ nso.
Zoova, á nían be su,
á sásá be tinuntinun, sran akpasua sɔ’m be lika blɛ kwlaa nun.”
Ndɛ mma 5 nun’n, Ɲanmiɛn kannin like nga ɔ́ wá yó mán “ɲrɛnnɛnfuɛ” mun’n i ndɛ. Ɔ seli kɛ ɔ́ wá dé be.
Ndɛ mma 6 kan gua su kɛ “fiɛn kaan sa nunman Zoova i ndɛ’m be sin,” ‘be ti kɛ sika mɔ b’a yi i nun fiɛn’n sa.’ Kɛ Klisifuɛ’m be bu Zoova i nuan ndɛ’n i sɔ wie-ɔ.—Jue. 18:30; 119:140.
Siɛn’n, maan e fa e ɲin e sie i Jue Mun 12:7 su’n. Ɔ se kɛ: “Zoova, á nían be su, á sásá be tinuntinun, sran akpasua sɔ’m be lika blɛ kwlaa nun.”
I ndɛ mma 6 nun’n, Davidi dun mmua kannin “Zoova i ndɛ’m” be ndɛ, i sin naan ndɛ mma 7 nun’n, w’a se kɛ “á nían be su.” I sɔ’n ti’n sran wie’m be bu i kɛ “Zoova i ndɛ’m” be ndɛ yɛ ɔ su kɛn i ndɛ mma 7 nun-ɔn. Asa’n e si kɛ sran wie’m be yoli like kwlaa nga be kwla yo naan y’a ɲanman Biblu’n. Sanngɛ Ɲanmiɛn sɛsɛli i naan w’a nunnunman.—Eza. 40:8; 1 Piɛ. 1:25.
Sanngɛ ndɛ ng’ɔ o ndɛ mma 5 nun’n, ɔ ti su wie. Zoova deli “ɲrɛnnɛnfuɛ” mun nin be nga sran’m ‘be mianmian be kplɔlɔlɔ’n.’ Yɛ ɔ́ yó sɔ titi.—Zɔb. 36:15; Jue. 6:4; 31:1, 2; 54:7; 145:20.
?Ɔ maan ndɛ mma 7 nun’n, Zoova i ‘ndɛ mun’ be ndɛ yɛ Davidi kan-ɔn? ?Annzɛ kusu sran’m be ndɛ yɛ ɔ kan-ɔn?
Kɛ e fa e ɲin e sie i Jue sɔ’n i nun ndɛ’n su kpa’n, e wun i wlɛ weiin kɛ sran’m be ndɛ yɛ Davidi kan-ɔn.
Jue Mun 12:1 nin 2 nun’n, Davidi kannin Ɲanmiɛn i sufuɛ ‘nanwlɛfuɛ’ mɔ atrɛkpa’n klunwifuɛ’m be lakali be’n be ndɛ. I sin’n, ɔ kannin like nga Zoova wá yó sran sɔ mun’n i ndɛ. Jue Mun 12 kle e kɛ e kwla lafi su kɛ Ɲanmiɛn dé i sufuɛ mun, afin ndɛ ng’ɔ kan’n fiɛn kaan sa nunmɛn i sin.
Ɔ maan ndɛ mma 7 nun’n, kɛ ɔ se kɛ Zoova nían be su yɛ ɔ́ sásá be’n, ɲrɛnnɛnfuɛ nga klunwifuɛ’m be yo be tɛtɛ’n be ndɛ yɛ ɔ kan-ɔn.
Wafa nga be klɛli Biblu’n nun ndɛ sɔ’n lalafuɛ fluwa wie mɔ be klɛli be Ebre nun’n be nun’n, ɔ kle kɛ sran’m be ndɛ yɛ bɛ kɛn i Jue sɔ’n nun-ɔn. Fluwa Sɛptanti’n nun’n, be klɛli “e” kpɛ nɲɔn Jue Mun 12 i ndɛ mma 7 nun. I sɔ’n kle kɛ Ɲanmiɛn i sufuɛ nanwlɛfuɛ mɔ be kle be ɲrɛnnɛn’n be ndɛ yɛ be kan-ɔn. Asa ekun’n, ndɛ mma 7 nun’n, Davidi seli kɛ Ɲanmiɛn sásá “be tinuntinun sran akpasua” sɔ mɔ be klo sa tɛtɛ mun’n be lika. (Jue. 12:7, 8) Ɲanmiɛn Ndɛ nga be kacili i Aramun aniɛn’n nun’n i nun’n, be klɛli i Jue Mun 12:7 nun’n kɛ: “Ee E MIN, á nían sran kpa’m be su, á sásá be sran tɛtɛ nga’m be lika tititi. Lika kwlaa nun’n, klunwifuɛ’m be kle sran’m be yalɛ, kɛ amlɛnmlɛn m’ɔ nɔn sran’m be mmoja’n sa.” I sɔ’n kle kɛ Jue Mun 12:7 nun’n, nán Ɲanmiɛn i ndɛ mun be ndɛ yɛ Davidi kan-ɔn.
I sɔ’n ti’n, ndɛ mma sɔ’n kle kɛ Ɲanmiɛn i sufuɛ “nanwlɛfuɛ mun” be kwla lafi su kɛ Ɲanmiɛn dé be.