Fluwa’n nun kannganfuɛ’m be kosan mun

?Kɛ Zezi kpɛ́ E Min’n i Aliɛ Cɛn dilɛ’n i ba’n, nin yɛ i sɔnnzɔnfuɛ 70 be o-ɔ? ?Be yacili i su sulɛ?

Kɛ Zezi kpɛ́ E Min’n i Aliɛ Cɛn dilɛ’n i ba’n, nn i sɔnnzɔnfuɛ 70 mun be nunman lɛ. Sanngɛ i sɔ’n kleman kɛ i klun jɔman be wun annzɛ be yacili i su sulɛ. Blɛ sɔ’n nun’n, Zezi kunndɛli kɛ ɔ nin i akoto nga be nin i be nantili klanman’n, be ngunmin yɛ ɔ nin bé yó aɲia sɔ’n niɔn.

I akoto 12 mun-o, i sɔnnzɔnfuɛ 70 mun-o, Zezi i klun jɔ be kwlaa be wun. Zezi dun mmua kpali i sɔnnzɔnfuɛ’m be nun sran 12, yɛ ɔ flɛli be kɛ i akoto mun. (Lik. 6:​12-16) Kɛ ɔ o Galile lɔ’n “ɔ flɛli i akoto blu-nin-nɲɔn (12) mun” yɛ “ɔ sunmannin be kɛ be ko kan Ɲanmiɛn Sielɛ’n i ndɛ, yɛ be yo sran’m be juejue.” (Lik. 9:​1-6) I sin’n kɛ Zezi ɔli Zide’n, ɔ “kpali sran ableso (70) ekun. Kpɛkun ɔ sunmannin be nɲɔnnɲɔn.” (Lik. 9:51; 10:1) Ɔ maan Zezi le i sɔnnzɔnfuɛ wie mun lika fanunfanun nun mɔ be bo jasin’n kle sran mun-ɔn.

Zifu sɔ mɔ be kacili Klisifuɛ’n be nin be awlofuɛ’m bé dí Delɛ Cɛn’n be awlo lɔ kɛ nga be fa yo i afuɛ kwlaa nun’n sa. (Tul. 12:​6-11, 17-20) Kɛ ɔ cɛ kan bé kún Zezi’n, ɔ nin i sɔnnzɔnfuɛ’m be ɔli Zerizalɛmun. Sanngɛ w’a yiɛmɛn i sɔnnzɔnfuɛ nga be o Zide nin Galile annzɛ Pere lɔ’n be kɛ be bla naan be di Delɛ Cɛn’n i likawlɛ. I sɔ’n kle kɛ Zezi kunndɛ kɛ ɔ nin i akoto’m be ngunmin yɛ bé yó aɲia sɔ’n niɔn. Ɔ seli be kɛ: “N klo kpa kɛ e nin amun é dí Delɛ Cɛn aliɛ nga, kwlaa naan m’an wun ɲrɛnnɛn.”—Lik. 22:15.

Like kun ti yɛ maan Zezi yoli sɔ-ɔ. Yɛle kɛ bé wá kún i. Afin i yɛ ɔ ti “Ɲanmiɛn i Bua Ba m’ɔ́ wá yí sa tɛ ng’ɔ o mɛn’n nun’n” niɔn. (Zan 1:29) Bé kún i Zerizalɛmun lɔ, afin lika sɔ’n nun yɛ be yi tɛ titi be man Ɲanmiɛn-ɔn. Bua ba nga Izraɛlifuɛ’m be di i Delɛ Cɛn’n nun’n, ɔ kpɛn be wla kɛ Zoova deli be Eziptifuɛ’m be sa nun. Sanngɛ Zezi i tɛ liɛ’n trá ngalɛ’n. Afin sran’m be kwlaa bé ɲán be ti sa tɛ’n nin wie’m be sa nun. (1 Kor. 5:​7, 8) Zezi i tɛ’n ti’n, i akoto 12 mun be su yɛ bé táka Klisifuɛ’m be asɔnun’n niɔn. (Efɛ. 2:​20-22) Biblu’n se kɛ be fali “yɔbuɛ blu-nin-nɲɔn (12)” be wlali Zerizalɛmun m’ɔ ti Ɲanmiɛn liɛ’n i bo ase. Kpɛkun “be klɛli Bua Ba’n i akoto blu-nin-nɲɔn (12) mun be dunman blu-nin-nɲɔn (12) mun yɔbuɛ sɔ’m be su kunngunngun.” (Ngl. 21:​10-14) I sɔ’n kle kɛ akoto’m bé wá dí junman cinnjin kpa kun naan Ɲanmiɛn i klun sa’n w’a kpɛn su. Ɔ maan e wun like nga ti yɛ Zezi kunndɛli kɛ ɔ nin i akoto’m bé dí Delɛ Cɛn kasiɛn’n likawlɛ’n, ɔ nin E Min’n i Aliɛ Cɛn dilɛ’n i wlɛ.

I sɔnnzɔnfuɛ 70 nin be onga’m b’a tranman aliɛ dilɛ sɔ’n i bo wie. Sanngɛ be kwlaa nga be nin Ɲanmiɛn be nanti klanman’n, bé ɲán E Min’n i Aliɛ Cɛn dilɛ’n mɔ Zezi kpɛli i ba’n i su ye. Kɔnguɛ kunngba sɔ’n nun’n, Zezi nin i akoto’m be trali famiɛn dilɛ kun ti aenguɛ. Sanngɛ kɛ ɔ́ wá kɔ́ i ɲrun’n, Klisifuɛ kwlaa nga bé wá kpá be síe be ngunmin’n, bé wlú aenguɛ sɔ’n nun wie.—Lik. 22:​29, 30.