Gbanflɛn nin talua mun, “kɛ ɔ ko yo naan amu’an nyan amun ti mlɔnmlɔn’n, an mian amun nyin di junman kpa”

1. ?Ngue ti yɛ ɔ ti cinnjin kɛ be yo sran kun i batɛmun-ɔn? (An nian foto ng’ɔ o kan like suanlɛ’n bo i bo lɛ’n.)

AFUƐ kwlakwla’n, be nga e kle be Biblu’n nun like’n, be nun akpi kpanngban be fa be wun man Zoova, yɛ be yo be batɛmun. Sran sɔ’m be nun sunman be ti gbanflɛn nin talua. Gbanflɛn nin talua sɔ’m be nun wie’m be si nin be nin mun yɛ be kleli be ndɛ nanwlɛ’n niɔn. ?Amun o i sɔfuɛ’m be nun wie? Sɛ amun o be nun wie’n, é yó amun mo. Afin an fali ajalɛ kpa. Sran ng’ɔ kunndɛ kɛ ɔ́ ɲán anannganman nguan’n, ɔ fata kɛ be yo i batɛmun naan ɔ kaci Klistfuɛ.​—Matie 28:19, 20; 1 Piɛr 3:21.

2. ?Ngue ti yɛ ɔ fataman kɛ batɛmun yolɛ’n kun amun srɛ-ɔ?

² Kɛ be yo sran kun i batɛmun’n, Zoova yrɛ i su dan. Sanngɛ, ninnge wie’m be o lɛ m’ɔ fata kɛ ɔ yo be-ɔ. ?Ninnge sɔ mun yɛle benin? Kɛ bé wá yó amun batɛmun’n, aniaan ng’ɔ ijɔli nzra nun’n usali amun kɛ: “?E ti tɛ mɔ Zezi Klist fɛli i wun yili’n ti’n, amun wlali sa tɛ yolɛ’n i ase yɛ amun fali amun wun mannin Zoova kɛ amún yó i klun sa?” Amun tɛli su kɛ, ɛɛn. I sɔ’n kle kɛ amun tali Zoova i nda kɛ amún kló i, yɛ i klun sa yolɛ’n yó amun cinnjin trá like kwlakwla. ?Ɔ fata kɛ nda sɔ mɔ amun tali’n, ɔ yo amun nsisɔ? Ɔ fataman kɛ ɔ yo amun nsisɔ. Afin, kɛ amun fali amun wun mannin Zoova kɛ ɔ sie amun’n, i sɔ’n ti kpa dan. Be nga be siman Zoova’n, be yo Satan i klun sa. Satan kusu nianman be lika. I kpa bɔbɔ’n, be ndɛ lomɛn i. Sɛ amun fa amun wun mɛn i’n, ɔ́ yó i fɛ dan. Afin, ɔ si kɛ amun su ɲanman anannganman nguan.

3. ?Kɛ amun fali amun mannin Zoova mɔ be yoli amun batɛmun’n, wafa sɛ yɛ ɔ yrali amun su-ɔ?

³ Kɛ amun fali amun mannin Zoova mɔ be yoli amun batɛmun’n, wafa ng’ɔ yrali amun su’n, amun bu i akunndan be nian. Kɛ mɔ amun ti Zoova liɛ’n ti’n, amun kwla se kɛ: “Anannganman jin min sin, n sroman like fi. ?Kɛ nguɛ like sa yɛ sran’m be kwla yo min-ɔn?” (Jue Mun 118:6) Sran ng’ɔ fɛ i wun man Ɲanmiɛn kɛ ɔ sie i’n, i liɛ su ti ye.

SRAN KUN BƆBƆ YƐ Ɔ SUƐ I TRƆ’N NIƆN

4, 5. (a) ?Ngue yɛ sran uflɛ kwlá yoman manman e-ɔ? (b) ?Sa benin mun yɛ be kwla ju Klistfuɛ kwlakwla su-ɔ?

⁴ Amun si nin amun nin’m be kwla yo ninnge wie’m be man amun. I wie yɛle kɛ, be kwla wla amun telefɔnun nun sika. Sanngɛ, nán be yɛ bé yó naan amun nin Zoova amun afiɛn w’a mantan-ɔn. Kannzɛ amun te o be bo wun’n, sanngɛ, amun bɔbɔ yɛ ɔ fata kɛ amun mian amun ɲin yo ninnge wie mun naan amun nin Zoova amun afiɛn w’a mantan-ɔn. ?Ngue ti yɛ ɔ ti cinnjin kɛ amun wun i sɔ liɛ’n i wlɛ-ɔ? E nun wie fi simɛn i ɲrun sa. Atrɛkpa’n, amun bakan nun yɛ be yoli amun batɛmun-ɔn. Siɛn mɔ amun a yo gbanflɛn annzɛ talua’n, amun bu ninnge wie’m be akunndan. Yɛ sa wie’m be ju amun su. Talua kun seli kɛ: “Wie liɛ’n, kɛ suklu lɔ bakanngan’m bé dí be awuliɛ cɛn’n, be cɛ be gato. Kɛ bakan ng’ɔ ti Zoova i Lalofuɛ’n diman wie’n, ɔ yomɛn i ya. Sanngɛ, kɛ ɔ ko ɲin mɔ bla annzɛ bian kunndɛlɛ akunndan bɛ i ti nun’n, ɔ timan pɔpɔ. I lɛ’n nun yɛ ɔ fata kɛ ɔ wun i wlɛ weiin kɛ Zoova i mmla’m be su nantilɛ’n ti like kpa-ɔ.”

⁵ Nán gbanflɛn nin talua’m be ngunmin yɛ sa wie’m be kle be yalɛ-ɔ. Be nga be ti kpɛnngbɛn mɔ be yo be batɛmun’n, sa wie mɔ b’a sunnzunman’n kwla kle be yalɛ. Wie liɛ’n, be nin be yi annzɛ be wun be afiɛn ndɛ wie ti’n, annzɛ tukpacɛ wie ti’n, Ɲanmiɛn sulɛ’n kwla yo kekle man be. Wie liɛ kusu’n, ɔ kwla yo junman ndɛ. I gbanflɛn nin talua o, i kpɛnngbɛn o, sa fanunfanun’m be kwla ju e su. I sɔ’n ti, ɔ fata kɛ e kwlakwla e mian e ɲin naan e nin Zoova e nanti klanman titi.​—Zak 1:12-14.

6. (a) ?Wafa sɛ yɛ e kwla kle kɛ nán sran kun ti yɛ e su Zoova-ɔ? (b) ?Ngue yɛ ndɛ ng’ɔ o 2 Korɛntfuɛ Mun 4:7 nun’n kle-ɔ?

⁶ Nda nga an tali Zoova’n, nán amun wla fi su le. I liɛ’n, amun nin i bé nánti klanman titi. Amun tɛli i nda kɛ amún sú i tititi. I sɔ’n kle kɛ kannzɛ amun janvuɛ, annzɛ amun si, annzɛ amun nin yaci Zoova sulɛ’n, amún sú i tititi. (Jue Mun 27:10) Maan sa’n kwlaa nun’n, amun srɛ Zoova. I liɛ’n, ɔ́ úka amun naan amun a yia nda nga amun tali’n i nuan.​—An kanngan 2 Korɛntfuɛ Mun 4:7 nun.

7. ?Ngue yɛ ɔ fata kɛ amun yo naan amun a ‘ɲan amun ti mlɔnmlɔn-ɔn’?

⁷ Zoova kunndɛ kɛ amun yo i janvuɛ naan amun a ɲan amun ti. Sanngɛ, ɔ fata kɛ amun mian amun ɲin naan i sɔ liɛ’n w’a yo ye. Filipfuɛ Mun ndɛ tre 2 i mma 12 se kɛ: “Kɛ ɔ ko yo naan amu’an nyan amun ti mlɔnmlɔn’n, an mian amun nyin di junman kpa.” Like nga é yó naan sa’n kwlaa nun e nin Zoova e afiɛn w’a mantan titi’n, ɔ fata kɛ e bu i akunndan. Nán maan e lafi e wun su dan. Be nga be su Zoova w’a cɛ kpa bɔbɔ’n, be nun wie’m be nin i b’a nantiman klanman titi. ?Ngue yɛ amún yó naan amun nin Zoova b’a nanti klanman titi, naan amun a ɲan amun ti mlɔnmlɔn-ɔn?

Ɔ TI CINNJIN KƐ AMUN SUAN BIBLU’N NUN LIKE

8. (a) ?Ngue yɛ sran ng’ɔ suan Biblu’n nun like’n, ɔ yo-ɔ? (b) ?Ngue ti yɛ i sɔ yolɛ’n ti cinnjin-ɔn?

⁸ Sɛ e waan é yó Zoova i janvuɛ’n, ɔ fata kɛ e tie ndɛ ng’ɔ kan’n, yɛ maan e kan e klun ndɛ e kle i. Kɛ e suan Biblu’n nun like’n, yɛ e tie ndɛ nga Zoova kan’n niɔn. Sran ng’ɔ suan Biblu’n nun like’n, ɔ kanngan Biblu’n nin fluwa nga anuannzɛ’n yi be’n, be nun wie. Kpɛkun, ɔ bu su akunndan. Suklu ba’m be suan like naan ɔ ka be klun, naan sɛ be bo be ta’n b’a ɲɛn i. Biblu’n nun like suanlɛ’n timan sɔ. E kunndɛ kɛ é sí Zoova kpa, i ti yɛ e suan Biblu’n nun like-ɔ. Kɛ e yo sɔ’n, e fa e wun e mɛntɛn i, kpɛkun ɔ fɛ i wun mantan e wie.​—Zak 4:8.

9. ?Ninnge benin wie mun yɛ amun kwla fa suan Biblu’n nun like-ɔ?

⁹ Zoova i anuannzɛ’n yili ninnge kpanngban naan amun fa suan Biblu’n nun like. I wie yɛle kɛ jw.org/fr su’n, be siesieli ndɛ akpasua wie mun lɔ. Ndɛ akpasua kun (Tin LA BIBLE ET VOUS > ADOLESCENTS > EXPLORE LA BIBLE su.) kwla uka amun naan amun a nanti like nga amun suan’n su. Be flɛ ndɛ akpasua kun ekun kɛ “Qu’enseigne réellement la Bible ?”. Ndɛ nga be o lɔ’n, be kwla uka amun naan amun a lafi Ɲanmiɛn su kpa. Yɛ be kwla uka amun naan sɛ be usa amun kosan’n, amun a kan like nga ti yɛ an lafi Ɲanmiɛn su’n i ndɛ. Amun kwla wun ndɛ wie mun ekun afuɛ 2009, Avrili nun fluwa nga be flɛ i kɛ Réveillez-vous ! i bue 23 nun. Kɛ be suan like mɔ be bu su akunndan’n, i sɔ’n ti kpa. Sɛ amun mian amun ɲin be yo sɔ titi’n, amún ɲán amun ti mlɔnmlɔn.​—An kanngan Jue Mun 119:105 nun.

Ɔ TI CINNJIN KƐ AMUN SRƐ ƝANMIƐN

10. ?Ngue ti yɛ ɔ fata kɛ Klistfuɛ kwlakwla srɛ Ɲanmiɛn-ɔn?

¹⁰ Kɛ e suan Biblu’n nun like’n, e ti ndɛ nga Zoova kan’n. Kpɛkun, kɛ e srɛ i’n, e kan e klun ndɛ e kle i. Ɔ fataman kɛ e bu i kɛ Ɲanmiɛn srɛlɛ’n ti like m’ɔ fata kɛ e yo i titi sa ngbɛn-ɔn. Yɛ nán e bu i kɛ sran ng’ɔ srɛ Ɲanmiɛn’n i su sa’m bé ká lɛ wíe. Kɛ e srɛ Ɲanmiɛn’n, e nin i e koko yalɛ. Zoova kunndɛ kɛ e kan e klun ndɛ e kle i. (An kanngan Filipfuɛ Mun 4:6 nun.) Biblu’n se kɛ, maan e fa sa ng’ɔ o ɔ su’n kwlaa e “wlɛ i Anannganman sa nun.” (Jue Mun 55:23) Aniaan kpanngban be kwla se amun kɛ afɔtuɛ sɔ’n i su falɛ’n yoli be ye. Sɛ amun fa su’n, ɔ́ yó amun ye wie.

11. ?Ngue ti yɛ ɔ fata kɛ e la Zoova i ase cɛn kwlakwla-ɔ?

¹¹ Nán e minndɛ kɛ e sa mian naan y’a srɛ Zoova. Biblu’n se kɛ: “Like kwlaa nga Nyanmiɛn yo man amun’n, nán amun wla fi.” (Kolɔsfuɛ Mun 3:15) Wie liɛ’n, sa nga be o e su’n ti’n, e wla fi ninnge kpakpa kwlaa nga Zoova yo man e’n. I sɔ’n ti’n, ninnge nga Zoova yo man amun aliɛ ba kwlaa nun’n, amun bu be nun nsan be akunndan nian. Amún wún kɛ ɔ fata kɛ amun lɛ i ase dan, ninnge sɔ’m be ti. Be flɛ talua kun kɛ Abigaɛli. Kɛ bé yó i batɛmun’n, nn ɔ le afuɛ 12. Ɔ seli kɛ: “N bu i kɛ sran ng’ɔ fata kɛ e le i ase dan’n yɛle Zoova. Ɔ fata kɛ e lɛ i ase cɛn kwlakwla, ninnge kpakpa ng’ɔ fa man e’n ti.” Ɔ ju wie’n, Abigaɛli fa kosan kun m’ɔ tili i sran kun nuan nun’n fa usɛ i wun. Ɔ se kɛ: ‘?Sɛ n tinnge ainman nglɛmun’n, naan like nga ti yɛ n lali Zoova i ase andɛ’n i ngunmin yɛ ɔ o min sa nun’n, like benin yɛ ɔ́ trán min sa nun-ɔn?’a (An nian nzɔliɛ’n i su ndɛ’n.)

MAAN AMUN BƆBƆ AMUN WUN KƐ ZOOVA TI KPA DAN

12, 13. (a) ?Ngue yɛ amun sieli i nzɔliɛ m’ɔ kle kɛ Zoova ti kpa dan-ɔn? (b) ?Ngue ti yɛ ɔ ti cinnjin kɛ amun bu wafa nga Zoova jrannin amun sin’n, i akunndan-ɔn?

¹² Zoova fanngan nun’n, Famiɛn Davidi jrannin kekle sa fanunfanun ɲrun. I sɔ’n ti, ɔ seli kɛ: “Amun sie amun nyin ase be nian. Amún wá wún kɛ Anannganman ti kpa dan! Sran ng’ɔ fiɛ i nun’n, i liɛ su ti ye!” (Jue Mun 34:9) Ndɛ sɔ’n kle kɛ, ɔ fata kɛ e bɔbɔ e wun i wlɛ weiin kɛ Zoova ti kpa dan. Kɛ amun kanngan Biblu’n, nin fluwa nga anuannzɛ’n yi be’n be nun’n, mɔ amun kɔ aɲia’m be bo’n, amun wun kɛ Zoova jrɛnnin i sufuɛ wie’m be sin naan b’a yacimɛn i sulɛ. Sanngɛ, kɛ amún sú Zoova kɔ́’n, ɔ fata kɛ amun sie wafa nga Zoova uka amun’n i nzɔliɛ. ?Kɛ amun boli amun ɲin ase be niannin’n, amun wunnin kɛ Zoova ti kpa dan?

¹³ Klistfuɛ kwlakwla be wun i wlɛ weiin kɛ Zoova ti kpa dan. Zoova kunndɛ kɛ e fa e wun e mɛntɛn i bɔbɔ nin i Wa’n. Zezi seli kɛ: “Sran fi kwlá ba-man n sin saan be nga n Si b’ɔ sunmannin min’n ɔ maan be ba n sin’n.” (Zan 6:44) ?Amun wun i wlɛ kɛ Zoova bɔbɔ ti yɛ amun bɛli i sin-ɔn? ?Annzɛ amun se amun klun lɔ kɛ, ‘min si nin min nin be su Zoova yɛ n su be su-ɔ’? Nán amun wla fi ndɛ nga su. Yɛle kɛ, kɛ ɔ fin cɛn mɔ be yoli amun batɛmun’n, ɔ ti kɛ amun nin Zoova amun a tra janvuɛ sa. Ɔ maan, ɔ si amun. Biblu’n se kɛ: “Sran ng’ɔ klo Nyanmiɛn’n, Nyanmiɛn si i sɔfuɛ’n.” (1 Korɛntfuɛ Mun 8:3) Kɛ Zoova maan amun o i sufuɛ’m be nun wie’n, ɔ fata kɛ ɔ yo amun fɛ dan.

14, 15. ?Ngue ti yɛ sɛ amun bo jasin fɛ’n, amún láfi Ɲanmiɛn su kpa-ɔ?

¹⁴ Like kun ekun nga amun kwla yo naan amun a wun kɛ Zoova ti kpa dan’n, yɛle kɛ amun bo jasin fɛ’n. Amun kwla bo i suklu lɔ, nin amun tranwlɛ lɔ. Gbanflɛn nin talua wie’m be boman jasin fɛ’n be suklu lɔ. Afin ɲannzuɛn kun be. Be kwlá ijɔman sran kpanngban ɲrun. ?I lɛ nun’n, ngue yɛ amun kwla yo-ɔ?

¹⁵ Like nga ti yɛ amun lafi Ɲanmiɛn su’n, amun bu i akunndan. Sɛ ndɛ akpasua nga gbanflɛn nin talua’m be fa suan like’n o jw.org su amun aniɛn nun’n, amun nanti afɔtuɛ nga be o lɔ’n be su. I liɛ’n, like nga amun lafi su’n, ɔ nin sa nga ti yɛ amun lafi like sɔ’n su’n, amún kwlá yíyí nun klé sran uflɛ. Sɛ amun wun ndɛ’m be wlɛ kpa naan amun siesie amun wun kpa’n, Zoova i ndɛ kanlɛ yó amun fɛ.​—Zeremi 20:8, 9.

16. ?Ngue yɛ amun kwla yo naan amun a kan Ɲanmiɛn ndɛ’n i juejue su-ɔ?

¹⁶ Wie liɛ’n, an siesie amun wun kpa. Sanngɛ, kɛ ɔ ju ndɛ’n i kanlɛ’n, kpɛkun srɛ kun amun. Aniaan bla kun le afuɛ 18. Kɛ bé yó i batɛmun’n, nn ɔ le afuɛ 13. Ɔ seli kɛ: “N si sa nga ti yɛ n lafi Ɲanmiɛn su’n. Sanngɛ blɛ sunman’n, n kwlá yiyiman nun weinwein.” I sɔ’n ti’n, kɛ ɔ́ kán Ɲanmiɛn ndɛ klé sran mun’n, ɔ miɛn i ɲin ijɔ kɛ ng’ɔ fa ijɔ titi’n sa. Ɔ seli ekun kɛ: “Min wiengu suklu ba’m be kan ninnge nga be yo be’n, be ndɛ kle sran mun. Srɛ kunman be. Ɔ fata kɛ n yo kɛ be sa. I sɔ’n ti’n, n kan sa wie mɔ n yoli’n i ndɛ. N bo i bo kɛ, ‘kɛ cɛn kun ń klé sran kun i Biblu’n nun like’n ...’ Kpɛkun, n su kan ndɛ’n. Kannzɛ n kanman Biblu’n nun ndɛ trele n kleman be’n, sanngɛ blɛ sunman’n, be kunndɛ kɛ bé sí wafa nga n kle sran’m be Biblu’n nun like’n. Wie liɛ’n, be usa min i su kosan wie mun. Kɛ n fa ajalɛ sɔ’n titi’n, Ɲanmiɛn ndɛ’n i kanlɛ yo pɔpɔ min sa nun, srɛ kunman min. Kpɛkun, n ɲan kɔmin.”

17. ?Ngue ekun yɛ amun kwla yo naan amun a kan Ɲanmiɛn ndɛ’n i weinwein-ɔn?

¹⁷ Sɛ sran’m be wun kɛ amun ɲin yi be’n, be kusu be ɲin yí amun. Kpɛkun, bé bú Ɲanmiɛn ndɛ mɔ amun kan’n, i like cinnjin. Be flɛ talua kun kɛ Olivia. Ɔ le afuɛ 17. Kɛ bé yó i batɛmun’n, nn ɔ ti bakan. Ɔ seli kɛ: “N bu i kɛ sɛ e nin min wiengu mun é kókó yalɛ naan n kan Biblu’n i ndɛ’n, bé sé kɛ n klo i sɔ ngboko.” I sɔ’n ti’n, srɛ kun i. Sanngɛ, ɔ wa buli akunndan uflɛ. Ɔ seli kɛ: “Gbanflɛn nin talua sunman be siman Zoova i Lalofuɛ mun. E bɔbɔ yɛ e kwla yo naan b’a si e-ɔ. ?Sɛ ɲannzuɛn kun e, annzɛ e sa ɲan naan e kwlá kanman ndɛ’n, ɔ́ yó sɛ naan b’a si e? Be kwla bu i kɛ e bɔbɔ e lafiman ndɛ nga e kan’n su. Yɛ be kwla kpalo e nuan ndɛ’n. Sanngɛ, sɛ be wun kɛ e bɔbɔ e lafi ndɛ nga e kan su sakpa’n, naan e kɛn i weinwein’n, bé bú i ndɛ.”

AN MIAN AMUN ƝIN DI JUNMAN NAAN AMUN A ƝAN AMUN TI

18. ?Ngue yɛ ɔ fata kɛ amun yo naan amun a ɲan amun ti mlɔnmlɔn-ɔn?

¹⁸ E wunnin kɛ ɔ ti cinnjin kpa kɛ amun mian amun ɲin di junman naan amun a ɲan amun ti mlɔnmlɔn. Kɛ ɔ ko yo naan i sɔ liɛ’n w’a yo ye’n, ɔ fata kɛ amun kanngan Ɲanmiɛn Ndɛ’n nun, yɛ amun bu su akunndan. Asa ekun’n, ɔ fata kɛ amun srɛ Zoova. Yɛ amun bu wafa ng’ɔ jrannin amun sin sa sunman nun’n, i akunndan. Sɛ amun yo sɔ’n, amún wún i wlɛ weiin kpa kɛ Zoova ti amun janvuɛ. Ɔ maan, kɛ amún kɛ́n i ndɛ’n, srɛ su kunman amun.​—An kanngan Jue Mun 73:28 nun.

19. ?Ngue ti yɛ ɔ fata kɛ amun mian amun ɲin-ɔn?

¹⁹ Zezi seli kɛ: “Sran nga i waan ɔ́ sú n su’n, maan ɔ klɛn i wun man min, yɛ ɔ́ súɛ i waka’n naan ɔ́ sú n su.” (Matie 16:24) Nanwlɛ, sɛ amun waan amún sú Zezi su’n, ɔ fata kɛ amun fa amun wun man Zoova naan be yo amun batɛmun. Sran ng’ɔ yo sɔ’n, i liɛ’n yó ye. Yɛle kɛ, ɔ́ ɲán anannganman nguan Ɲanmiɛn i mɛn uflɛ’n nun lɔ. I sɔ’n ti’n, amun mian amun ɲin di junman naan amun a ɲan amun ti mlɔnmlɔn.