Like nga á yó naan Biblu’n nun like suanlɛ’n w’a yo ɔ fɛ, naan w’a ɲan su ye’n

Zozie su kanngan Ɲanmiɛn Mmla’n nun; Zeriko lɔ talɛ’m be ngba be bubuli, saan Raabu i sua liɛ’n yɛ ɔ kali lɛ-ɔ; Zozie w’a mɛn i sa’n su ɔ su la Ɲanmiɛn i ase

ZOZIE yɛ be sieli i kɛ ɔ dun Izraɛlifuɛ’m be ɲrun naan ɔ fa be wlu mɛn nga Ɲanmiɛn seli kɛ ɔ́ fá mán be’n nun-ɔn. I sɔ’n timan pɔpɔ. I sɔ’n ti, Zoova wlɛli i fanngan. Ɔ seli i kɛ: “Jran kekle, ?A tili? Yo yakpafuɛ.” Ɔ seli i ekun kɛ sɛ ɔ kanngan Mmla’n nun naan ɔ nanti su’n, ɔ́ yó ngwlɛlɛfuɛ. Yɛ ajalɛ ng’ɔ́ fá be’n, be bo’n gúa kpa.—Zozie 1:7, 8.

Blɛ nga e o nun yɛ’n ti kekle. (2 Timote 3:1) Sɛ ɔ waan ɔ liɛ’n yo ye kɛ Zozie liɛ’n sa’n, ɔ fata kɛ a nanti afɔtuɛ nga Zoova mɛnnin i’n su wie. Yɛle kɛ, kanngan Biblu’n nun titi. Kpɛkun, jran Biblu’n nun ndɛ’n su naan w’a fa ajalɛ.

Nanwlɛ, Biblu’n nun like suanlɛ’n ti cinnjin kpa. Sanngɛ atrɛkpa’n, e nun wie’m be siman wafa nga be suan Biblu’n nun like’n, annzɛ wafa nga bé yó naan i nun like suanlɛ’n w’a yo be fɛ’n. Afɔtuɛ wie’m be o ndɛ akpasua nga be flɛ i kɛ “Nanti afɔtuɛ nga’m be su” i nun. Sɛ a kanngan nun’n, á wún ajalɛ wie mɔ a kwla fa naan kɛ á súan Biblu’n nun like’n w’a ɲan su ye’n. Asa ekun’n, á wún like ng’ɔ fata kɛ a yo naan Biblu’n nun like suanlɛ’n w’a yo wɔ fɛ kpa w’a tra laa’n.

Jue tofuɛ’n seli kɛ: ‘Fa min sin atin nga ɔ mmla’n kle’n su, afin n klo i ngboko.’ (Jue Mun 119:35) Ɔ kusu, a kwla klo Ɲanmiɛn Ndɛ’n i nun like suanlɛ wie. Sɛ a suan Biblu’n nun like titi’n, á wún kɛ i nun ndɛ’m be ti kpa dan.

Ɔ ti su kɛ a dunman nvle wie i ɲrun kɛ Zozie fa yoli’n sa. Sanngɛ, ɔ le sa nga be o ɔ su-ɔ. I sɔ’n ti, nian Zozie i ajalɛ’n su. Yɛle kɛ, suan Ɲanmiɛn Ndɛ’n nun like, yɛ fa su. Sɛ a yo sɔ’n, á fá ajalɛ kpa, yɛ ɔ liɛ’n yó ye.

NANTI AFƆTUƐ NGA’M BE SU

Srɛ Ɲanmiɛn ka naan w’a suan like. Zoova i nuan ndɛ’n yɛ ɔ o Biblu’n nun-ɔn. Be klɛli ndɛ sɔ mun naan ɔ liɛ yo ye. I sɔ’n ti, kɛ á kánngan Biblu’n nun’n, srɛ Zoova kɛ ɔ tike ɔ ɲin naan a wun i nun ndɛ’n i wlɛ. Srɛ i kɛ ɔ uka ɔ naan ɔ wla kpɛn ndɛ sɔ’m be su, naan a nian su fa ajalɛ.—Ɛsdras 7:10.
Kɛ á kánngan Biblu’n nun annzɛ e fluwa’m be nun’n, usa ɔ wun kosan wie mun. Usa ɔ wun kɛ: ‘?Ngue like yɛ ndɛ nga n su kanngan nun’n, ɔ kle min Zoova su-ɔ? ?Wafa sɛ yɛ ndɛ sɔ’n nin Biblu’n nun ndɛ bɔbɔ ba’n, be kɔ likawlɛ-ɔ? ?Wafa sɛ yɛ n kwla fa ndɛ sɔ’n n uka sran uflɛ-ɔ?’
Bu like nga a suan’n i su akunndan. Kɛ á kánngan ndɛ kun nun’n, jran kan. Kpɛkun, bu su akunndan. Usa ɔ wun kɛ: ‘?Wafa sɛ yɛ ndɛ sɔ’n yo min-ɔn? ?Ngue ti yɛ ɔ yo min sɔ-ɔ? ?Ndɛ sɔ’n ti’n, n wla kpɛn sa wie m’ɔ juli min su laa’n, annzɛ sa wie m’ɔ o min su kɛ é sé yɛ’n su? ?Ndɛ sɔ’n ti’n, n kwla si min ɲrun lɔ sa? ?Wafa sɛ yɛ n kwla nanti Biblu’n nun afɔtuɛ sɔ’m be su-ɔ? (Zɔb 23:5; Jue Mun 49:4) Kɛ á bú ndɛ’m be su akunndan’n, sa nga ti yɛ Zoova se i sufuɛ mun kɛ nán be yo ninnge wie mun’n, nian sɛ a kwla yiyi nun o. Sɛ a su kanngan sran kun i su ndɛ’n nun’n, usa ɔ wun kɛ: ‘?Sɛ ɔ ti kɛ sran’n fali ajalɛ uflɛ’n, nn wafa sɛ yɛ i bo guali-ɔ?’—Mmla’n 32:28, 29.
Kɛ á kánngan ndɛ kun nun’n, maan ɔ yo wɔ kɛ a wunnin nun sa. Wienun-ɔn, a su kanngan Zozɛfu i su ndɛ’n nun. Maan ɔ yo wɔ kɛ, kɛ i niaan’m bé yó i atɛ Ismaɛlifuɛ’m be sa nun’n, a wunnin nun sa. (Bo Bolɛ 37:18-28) Maan ɔ yo wɔ kɛ a o lɛ wie, naan a ti ninnge nga sran sɔ’m be yo be atɛ’n i nvan’n sa. Maan ɔ yo wɔ kɛ a ti ndɛ nga Zozɛfu i niaan’m be su kan’n sa. Asa ekun’n, maan ɔ yo wɔ kɛ a si sran kwlaa sɔ’m be klun akunndan’n sa. Nanwlɛ, kɛ á kánngan Biblu’n nun’n, sɛ a bu su akunndan kpa’n, á wún ndɛ’m be wlɛ weiin.
Kɛ á súan like’n, fa fluwa wie mun uka ɔ wun. Kɛ ɔ ko yo naan y’a wun ndɛ’m be bo kpa’n, anuannzɛ’n yili fluwa wie mun. A kwla fa fluwa sɔ mun ɛntɛnɛti su wie. Ɔ fata kɛ a suan wafa nga a kwla fa uka ɔ wun’n. I lɛ nun’n, sɛ a usa aniaan wie’n, ɔ kwla kle wɔ wafa nga be yo’n. Be flɛ fluwa sɔ’m be nun kun kɛ Index des publications Watch Tower. Be flɛ kun ekun kɛ Zoova i Lalofuɛ’m be like kunndɛlɛ fluwa. Fluwa nɲɔn sɔ’m be kwla uka ɔ naan w’a wun e fluwa nga be yiyi ndɛ cinnjin wie’m be nun’n, ɔ nin Biblu’n nun ndɛ mma wie’m be nun’n. Asa ekun’n, sɛ a nian La Bible. Traduction du monde nouveau i awieliɛ lɔ’n, á wún lika wie mun, nin sa wie mɔ Biblu’n kan be ndɛ’n, be su ndɛ’n i wlɛ kpa.
Bo ndɛ cinnjin’m be kpɔlɛ. I liɛ’n, ɔ wla kpɛ́n like nga a suannin’n su. Asa ekun’n, kan like nga a suan’n i ndɛ kle ɔ wiengu. Sɛ ɔ nin i fata’n, kɛ á bó jasin fɛ’n, a kwla bo su kle sran mun. Sɛ a yo sɔ’n, ɔ wla su fiman ndɛ cinnjin’m be su. Kpɛkun ɔ wiengu’m bé ɲán like nga a suan’n, i su ye wie.