“Lafi Zezi su”—?Zezi i su lafilɛ ngunmin kwla yo maan e ɲan e ti?
Ndɛ nga Biblu’n kan’n
Klisifuɛ’m be lafi su kɛ klɔ sran’m be sa tɛ’m be ti yɛ Zezi wuli-ɔ. (1 Piɛli 3:18) Sanngɛ sɛ e lafi su ngbɛn kɛ Zezi ti e defuɛ’n, i sɔ’n ngunmin kwlá yoman naan y’a ɲan e ti. Mmusu mun bɔbɔ be si kɛ Zezi ti “Ɲanmiɛn i Wa.” Ɔ nin i sɔ ngba’n, be su ɲanman be ti. Nunnunlɛ yɛ Ɲanmiɛn wá núnnún be-ɔ.—Liki 4:41; Zidi 6.
?Ngue yɛ ɔ fata kɛ n yo naan m’an ɲan min ti-ɔ?
Ɔ fata kɛ a lafi su kɛ e sa tɛ’m be ti yɛ Zezi wuli-ɔ. (Sa Nga Be Yoli’n 16:30, 31; 1 Zan 2:2) I sɔ’n kle kɛ ɔ fata kɛ a lafi su kɛ Zezi ti sran jrɛiin kun, naan i su ndɛ kwlaa nga Biblu’n kan’n ɔ ti nanwlɛ.
Ɔ fata kɛ a suan like nga Biblu’n kle i sakpasakpa’n. (2 Timote 3:15) Biblu’n se kɛ cɛn kun’n akoto Pɔlu nin Silasi be seli bisua sunianfuɛ kun kɛ: ‘Lafi e Min Zezi su. I liɛ’n, á fíte nun.’ Kpɛkun be kannin “Zoovaa i ndɛ’n” kleli i. (Sa Nga Be Yoli’n 16:31, 32) I sɔ’n kle kɛ sɛ bisua sunianfuɛ sɔ’n w’a suanman Ɲanmiɛn ndɛ’n, ɔ kwlá lafiman Zezi su sakpa. Ɔ fata kɛ ɔ suan Ɲanmiɛn Ndɛ’n naan ɔ si i kpa naan w’a kwla lafi Zezi su.—1 Timote 2:3, 4.
Kaci ɔ akunndan’n. (Sa Nga Be Yoli’n 3:19) Ɔ fata kɛ a kaci ɔ akunndan’n, yɛ a kle kɛ sa tɛ nga a yoli be laa’n be yo ɔ nsisɔ. Asa’n, yaci ninnge nga Ɲanmiɛn kloman be’n be yolɛ. Kpɛkun yo ‘sa nga be kle kɛ w’a kaci ɔ akunndan’n.’ I liɛ’n, sran’m be kwlaa bé wún kɛ w’a kaci ɔ akunndan’n sakpa.—Sa Nga Be Yoli’n 26:20.
Maan be yo ɔ batɛmun. (Matie 28:19) Zezi seli kɛ be nga be kunndɛ kɛ bé káci i sɔnnzɔnfuɛ’n, ɔ fata kɛ be yo be batɛmun. Bisua sunianfuɛ nga e kɛnnin i ndɛ’n, be yoli i batɛmun wie. (Sa Nga Be Yoli’n 16:33) I wafa kunngba’n, kɛ akoto Piɛli kannin Zezi i su ndɛ nanwlɛ’n kleli sran wie mun’n, be kwlaa “nga be sɔli i ndɛ’n nun aklunjɔɛ su’n, be yoli be batɛmun.”—Sa Nga Be Yoli’n 2:40, 41.
Fa ndɛ nga Zezi kannin’n su. (Ebre Mun 5:9) Be nga be ‘nian ndɛ kwlaa nga Zezi kannin’n su’ be nanti’n, be kle kɛ be ti i sɔnnzɔnfuɛ sakpa. (Matie 28:20) Sran sɔ mun ‘be timan Ɲanmiɛn ndɛ’n i ngbɛn sa, sanngɛ be fa su wie.’—Zaki 1:22.
Jran kekle lele ju i awieliɛ. (Marki 13:13) Ɔ fata kɛ Zezi i sɔnnzɔnfuɛ’m be kwlaa ‘be tra be awlɛn’ naan b’a kwla ɲan be ti. (Ebre Mun 10:36) I wie yɛle akoto Pɔlu liɛ’n. Kɛ ɔ kacili Klisifuɛ’n, ɔ fali ndɛ nga Zezi kannin’n su titi, yɛ ɔ trɛli i awlɛn suli Ɲanmiɛn kpa lele yɛ ɔ fa wuli-ɔ.—1 Korɛntifuɛ Mun 9:27.
?Sɛ n yo “sa tɛ yofuɛ’n i srɛlɛ’n,” ń ɲán min ti?
Ɲanmiɛn sulɛ wafa wie’m be nun’n, sran’m be le be Ɲanmiɛn srɛlɛ wafa kun mɔ be flɛ i kɛ “sa tɛ yofuɛ’n i srɛlɛ’n.” Yɛle kɛ be srɛ Ɲanmiɛn be di i nanwlɛ kɛ be ti sa tɛ yofuɛ naan be lafi su kɛ be sa tɛ’m be ti yɛ Zezi wuli-ɔ. Kpɛkun be srɛ Zezi kɛ ɔ de be. Sanngɛ Biblu’n i lika wie fi kanman srɛlɛ wafa sɔ’n i ndɛ, yɛ ɔ seman e kɛ e yo sɔ.
Sran wie’m be bu i kɛ, kɛ sran kun ko yo “sa tɛ yofuɛ’n i srɛlɛ” sɔ’n, kannzɛ ɔ yo sɛ ɔ yo sɛ, ɔ́ ɲɛ́n i ti. Sanngɛ Ɲanmiɛn srɛlɛ’n ngunmin kwlá yoman naan y’a ɲan e ti. Kɛ mɔ fɔ o e nun’n ti’n, e fɔn titi. (1 Zan 1:8) I sɔ’n ti yɛ Zezi seli i sɔnnzɔnfuɛ’m be kɛ be srɛ Ɲanmiɛn titi kɛ ɔ yaci be sa tɛ mun cɛ be’n niɔn. (Liki 11:2, 4) Asa’n, Klisifuɛ wie mɔ laa be o atin kpa su’n, be kacili be sin sili Ɲanmiɛn. Ɔ maan b’a ɲanman be ti kun.—Ebre Mun 6:4-6; 2 Piɛli 2:20, 21.
?Nin yɛ “sa tɛ yofuɛ’n i srɛlɛ” sɔ’n fin-ɔn?
Fluwa sifuɛ’m be nuan sɛman lika nga “sa tɛ yofuɛ’n i srɛlɛ’n” fin’n, i su. Wie’m be waan afuɛ 1517 nun kɛ sran wie’m be jasoli Katoliki asɔnun’n nun mɔ be ko kpɛli be bɔbɔ be asɔnun liɛ’m be ba’n, yɛ sran’m be boli i sɔ yolɛ bo-ɔ. Wie mun ekun be waan afuɛ 1700 nin 1800 be afiɛn’n nun, yɛ be boli i sɔ yolɛ bo-ɔ. Sanngɛ i kwlaa yoli-o, srɛlɛ wafa sɔ’n takaman Ɲanmiɛn Ndɛ’n su. I kpa bɔbɔ’n, ɔ nin ndɛ nga Biblu’n kan’n be sansan be wun.
a Biblu’n kle kɛ Ɲanmiɛn i dunman’n yɛle Zoova.