N fɔnnin awlo lɔ mmla kun—?Ngue yɛ n kwla yo-ɔ?

Awlo kwlaa nun’n, siɛ nin niɛn’m be kpɛ mmla be man be mma mun. I wie yɛlɛ dɔ nga i su yɛ ɔ fata kɛ ba’m be sa be sin awlo’n, nin blɛ nga be fa ajulisu manzi’m be yo like’n ɔ nin wafa ng’ɔ fata kɛ be nin be wiengu’m be tran awlo nun’n.

?Yɛ sɛ a fɔn mmla nga ɔ si nin ɔ nin be kpɛli’n nin? Sa kun yɛ ɔ juli-ɔ. Ɔ maan ɔ fata kɛ a kunndɛ i trawlɛ. Ndɛ nga nun’n á wá wun like ng’ɔ fata kɛ a yo’n.

• Like ng’ɔ fataman kɛ a yo’n

• Like ng’ɔ fata kɛ a yo’n

• Ndɛ nga ɔ wiengu’m be kan’n

Like ng’ɔ fataman kɛ a yo’n

• Sɛ ɔ si nin ɔ nin be siman kɛ w’a fɔn mmla kun’n a kwla se kɛ á fía su.

• Sɛ ɔ si nin ɔ nin be si kɛ w’a fɔn mmla kun’n, kɛ a di i nanwlɛ kle be’n a kwla se kɛ nán ɔ wun fu-ɔ annzɛ á fá guɛ́ i sran uflɛ su.

Ajalɛ sɔ’m be nun wie fi timan kpa. Afin sɛ a fia like nga a yoli’n su’n ɔ si nin ɔ nin be su kwlá lafiman ɔ su. Ɔ maan ɔ ayeliɛ sɔ’n klé be kɛ a te yo bakan.

“Ato bualɛ’n timan kpa. Ɔ́ cɛ́-ɔ ɔ́ cɛ́ ngbɛn, nanwlɛ’n tɛ́ nglo. Kpɛkun fɔ nga bé tú wɔ’n ɔ́ yó tɛtɛ kpa.”—Diana

Like ng’ɔ fata kɛ a yo’n

• Di like nga a yoli’n i nanwlɛ. Biblu’n se kɛ: “Sran ng’ɔ fia sa tɛ ng’ɔ yo be’n be su’n, i liɛ su yoman ye.” (Ɲanndra Mun 28:13) Ɔ si nin ɔ nin be si kɛ fɔ o ɔ nun naan ɔ ju wie’n a kwla fɔn. ?Ɔ maan sɛ a fɔn’n á dí i nanwlɛ klé be?

  “Sɛ a di like nga a yoli’n i nanwlɛ kle ɔ si nin ɔ nin’n, bé si ɔ aunvuɛ kpɛkun bé yáci cɛ́-ɔ. Blɛ kwlaa nga a di nanwlɛ’n ɔ si nin ɔ nin bé láfi ɔ su kpa ekun.”—Olivia

• Kpata be. Biblu’n se kɛ: “Amun lo amun wun man amun wiengu.” (1 Piɛli 5:5) Sɛ a yoli sa wie naan ɔ si nin ɔ nin be su tu ɔ fɔ’n, nán se kɛ á kplí ɔ ti. Lo ɔ wun naan kpata be.

  “Be nga kɛ be fɔn mmla’n be fa ndɛ’n guɛ i sran uflɛ su’n, kɛ ɔ́ kɔ́ i ɲrun’n be akunndan’n su buman be fɔ kun. Ɔ maan i agualiɛ su’n, sɛ be yo like ng’ɔ timan su’n ɔ su yoman be like fi kun.”—Ɛfɛɛ

• Sɛ be tu ɔ fɔ’n sɔ nun klanman. Biblu’n se kɛ: ‘Amun sɔ fɔ nga be tu amun’n i nun klanman.’ (Ɲanndra Mun 8:33) Like nga ɔ si nin ɔ nin be se wɔ kɛ a yo’n yo, nán plan.

  “Sɛ fɔ nga be tu wɔ’n ti’n a plan dan’n, ɔ su sa’n yó tɛ trá laa’n. Mian ɔ ɲin naan sɔ fɔ nga be tu wɔ’n nun, nán fa ɔ ɲin sie i like nga a su kwlá yomɛn i kun’n su.”—Jezɔnun

• Yo maan be lafi ɔ su ekun. Biblu’n se kɛ: “Amun wla amun nzuɛn laa’n i ase. Afin i su yɛ amun nian nantili laa-ɔ.” (Efɛzifuɛ Mun 4:22) Mian ɔ ɲin yo like ng’ɔ ti kpa’n titi i liɛ’n, ɔ si nin ɔ nin bé láfi ɔ su ekun.

  “Sɛ blɛ sunman a fa ajalɛ kpa’n naan a kle ɔ si nin ɔ nin be kɛ a su yoman sa nga a yoli’n kun’n, kɛ ɔ́ kɔ́ i ɲrun’n be kwla lafi ɔ su ekun.”—Karɛnin

Like kun mɔ a kwla yo’n: Yo like nga a kwla yo naan b’a lafi ɔ su ekun’n. I wie yɛle kɛ sɛ a fite naan a su sa ɔ sin awlo’n, flɛ ɔ si annzɛ ɔ nin naan se i kɛ a su ba. Kannzɛ bɔbɔ á sí kɛ á jú awlo lɔ dɔ su’n sanngɛ yo sɔ. Sɛ a yo sɔ’n, ɔ ti kɛ a su se be kɛ be lafi ɔ su ekun sa.